स्व. गिरीको स्मृतिमा दीप प्रज्वलन गर्न नेविसंघको निर्देशन- अन्य - कान्तिपुर समाचार
कान्तिपुर वेबसाईट
AdvertisementAdvertisement

स्व. गिरीको स्मृतिमा दीप प्रज्वलन गर्न नेविसंघको निर्देशन

कान्तिपुर संवाददाता

काठमाडौँ — नेपाल विद्यार्थी संघले कांग्रेस नेता एवम् समाजवादी चिन्तक स्वर्गीय प्रदीप गिरिको १३ औं दिनको पुण्य तिथिमा देशभर दीपप्रज्वलन गर्न निर्देशन गरेको छ । बिहीबार गिरीको निधन भएको १३ औं दिन पुग्दैछ ।


नेविसंघका केन्द्रीय अध्यक्ष दुजाङ शेर्पाले बुधबार ७७ वटै जिल्ला कार्यसमिति र मातहतका इकाइहरूलाई परिपत्र गर्दै स्वर्गीय नेता गिरीप्रति श्रद्धाञ्जली अर्पण गर्दै उनको योगदानको चर्चा, स्मरण र सो अवसरमा रचनात्मक कार्यक्रम तथा साँझ दीप प्रज्वलन गर्न निर्देशन दिएका हुन् ।

उनले काठमाडौं उपत्यकामा भने बिहीबार साँझ साढे पाँच बजे शान्ति बाटिकामा दिप प्रज्वलन गर्ने र श्रद्धाञ्जली अर्पण गर्ने जानकारी दिए ।

बिहीबार दिउँसो कांग्रेसले राष्ट्रियसभामा शोकसभा राखेको छ भने अन्य विभिन्न संघसंस्थाले गिरीको स्मरणमा चर्चा र वृक्षारोपण कार्यक्रमहरु राखेका छन् ।

घाँटीको क्यान्सरबाट पीडित नेता गिरिको मेडिसिटी अस्पतालमा उपचारको क्रममा साउन ४ गते राति निधन भएको थियो । ५ साउनमा पशुपति आर्यघाटमा राजकीय सम्मानसहित उनको अन्तिम संस्कार गरिएको थियो ।

सिरहाको बस्तीपुरमा २००४ सालमा बुबा मित्रलाल गिरि र पुण्यप्रभा गिरिको कोखबाट जन्मिएका गिरिले भारतको जवाहरलाल नेहरू विश्वविद्यालयबाट दर्शनशास्त्र र अर्थशास्त्रमा स्नातकोत्तर थिए ।

अध्ययन, अनुसन्धान र लेखनमा रुचि राख्ने गिरीका लेलिनको जीवनी, नारी, मार्क्सवाद र अर्थशास्त्रलगायत विषयमा एक दर्जनभन्दा बढी पुस्तक प्रकाशित छन् ।

प्रकाशित : भाद्र १५, २०७९ १९:२२
प्रतिक्रिया
पठाउनुहोस्

चन्दननाथका टोलटोलमा सरसफाई शिक्षा

डीबी बुढा

जुम्ला — जुम्लाको चन्दननाथ नगरपालिकाले टोलटोलमा सरसफाई अभियान सुरु गरेको छ । पहिलो चरणमा ५ गाउँलाई केन्द्रित गरेर एक हप्ताको सरसफाई अभियान थालिएको हो । अभियानभित्र टोलमा जनप्रतिनिधि, सरसफाई अभियानकर्ता, साझेदार संस्था र स्वयंसेवा पुगेर सचेतना फैलाउने काम भइरहेको छ । 

'टोलमा रहेका हरेक व्यक्तिसँग भेटेर सरसफाईले स्वास्थ्यमा हुने फाइदाका विषयमा छलफल चलाइन्छ । चन्दननाथ नगरपालिकाको पहिलो लक्ष्य भनेको सरसफाईयुक्त नगर बनाउने हो । खलंगालाई स्वच्छ सहर र सफा नगर बनाउन अभियान थालेका हौं,' नगरप्रमुख राजुसिंह कठायतले भने,‘नगर सफा भएमात्र हामी स्वस्थ हुन सक्छौं । नगरमा बजेटको आकार निकै सानो छ । त्यही बजेटको दायराभित्र सुन्दर नगर बनाउने अभिभारा छ ।’

नगर क्षेत्रको सरसफाईका लागि पेस नेपाल, एसएनभी नेपाल र मित्र समाजले साथ दिएका छन् । अहिले टोलटोलमा सरसफाई शिक्षा र घरदैलो भेटघाट चलिरहेको छ । स्थानीय निर्वाचनमा नगर सरसफाई मुख्य मुद्दा बनेको थियो । हरेक उम्मेदवारले नगर सफा र हराभरा बनाउने गरी घोषणापत्र तयार गरेका थिए ।

नगरप्रमुख कठायतले भने,‘निर्वाचनमा विजय भएदेखि नै नगरपालिका सरसफाईमा ध्यान केन्द्रित भएको थियो । निकट भविष्यमै सुन्दर र हराभरा नगर बनाउने अठोट छ । यो अभियानमा नगरबासीको पूर्ण साथ चाहिन्छ । ’

उनले सरसफाईको विषयमा हरेक निकाय जिम्मेवाररुपमा प्रस्तुत हुनुपर्नेमा जोड दिए । चन्दननाथ १ हैतीबाडा, ३ खोलीकोट, ४ सिंगाचौर, ८ स्यालबाडा र ९ वयालकाटियामा सरसफाई अभियान थालिएको हो । सरसफाईसँगै सामाजिक व्यवहार परिवर्तनसम्बन्धी सचेतना फैलाइन्छ । पेस नेपाल जुम्लाका कार्यकारी अध्यक्ष किशोर न्यौपानेले अभियानअन्तर्गत घरदैलोमै पुगेर कुहिने र नकुहिने फोहोर छुट्याएर राख्न आग्रह गरिएको छ ।

बजारमा संकलित फोहोर दैनिकरुपमा उठाउने र आफ्नो आगनको फोहोर आफै उठाउने गरी अभियान सुरु भएको उनले बताए । तर बजारमा नगरपालिकाले फोहोर नियमित उठाउन नसकेको व्यापारीहरुको गुनासो छ । चन्दननाथमा हरेक ३ महिनामा ‘हेप्पी हेल्दी विक’ मनाइन्छ । यो पटक ७ दिनमा ५ वटा गाउँमा सरसफाई अभियान गरेर ‘हेप्पी हेल्दी विक’ मनाइएको थियो । सदरमुकाम खलंगामा र्‍यालीसमेत निकालियो ।

'चन्दननाथको सुखी स्वस्थ सहर, मेरो चन्दननाथ मेरो पहिचान' भन्ने नारालाई साकार पार्न सरसफाइ अभियान तीव्र बनेको नगरपालिकाले जनाएको छ । भदौ ९ गते पहिलो दिन चन्दननाथ नगरपालिका ९ को बयालकाटिया र चनदननाथ ८ को स्यालबाडामा महिलालाई महिनावारीका विषयमा सचेत बनाउँदै छाउपडी प्रथाका असरबारे जनचेतना जगाइएको थियो । व्यवहार परिवर्तनसम्बन्धी सरसफाइ साप्ताहिक अभियानमा महिनावारी स्वच्छता, सफा शौचालय प्रयोग, हात धुने अवस्था र विधिका विषयमा व्यवहारिक ज्ञान प्रदान गरिएको छ ।

बस्ती बस्तीमा पुगेर हात धुने विधि, सफा शौचालयको प्रयोग, ढल निकासको अवस्था र महिनावारी स्वच्छता लगायतका सूचकहरु निर्धारण गरिएको छ । नमुना बस्तीका रुपमा छनोट गरिएका बस्तीले सरसफाईका सूचक पूरा गर्नुपर्ने मित्र समाजका संयोजक भरत बोहराले बताए ।

प्रकाशित : भाद्र १५, २०७९ १९:२०
पूरा पढ्नुहोस्
प्रतिक्रिया
पठाउनुहोस्
×