नेपाल बैंकको १० प्रतिशत लाभांश

काठमाडौँ — नेपाल बैंकले सेयरधनीलाई १० प्रतिशत नगद लाभांश दिने भएको छ । हल्चोकमा शुक्रबार सम्पन्न ६०औं वार्षिक साधारणसभाले उक्त निर्णय गरेको हो ।

सभाबाट चुक्ता पुँजीको १० प्रतिशतका दरले हुन आउने ९८ करोड ११ लाख १४ हजार ८ सय नगद लाभांश (लाभांश कर समेत) र चुक्ता पुँजीको १५ प्रतिशतका दरले १ अर्ब ४७ करोड १६ लाख ७२ हजार २ सय बराबरको बोनस सेयर वितरण गर्ने प्रस्ताव सर्वसम्मतिबाट पारित गरेको सञ्चालक समितिका अध्यक्ष वासुदेव अधिकारीले जानकारी दिए ।

सभाबाट आर्थिक वर्ष २०७५/७६ को वार्षिक प्रतिवेदन, लेखा परीक्षकको प्रतिवेदन लगायत पारित गरिएको थियो । त्यस्तै बैंकको अधिकृत पुँजी १० अर्बबाट वृद्धि गरी १५ अर्ब कायम गर्ने, जारी तथा चुक्ता पुँजी बढाएर ११ अर्ब २८ करोड २८ लाख २० हजार २ सय कायम गर्ने प्रस्तावहरु समेत पनि सर्वसम्मत पारित भएको थियो ।