दबंग शैली- अन्य - कान्तिपुर समाचार
कान्तिपुर वेबसाईट
AdvertisementAdvertisement

दबंग शैली

आफ्नो चरित्रमा यु–टर्न मार्न सफल सलमान खानले पछिल्लो दशक पात्रको चरित्रमा भने दबंग शैली समातेका छन् । पर्दामा गुन्डावाला पुलिसको दादागिरी देखाउनमा बढी रमाएका छन् ।
सुशील पौडेल

डेढ दशक अघिसम्मका सलमान खान आजका जस्ता थिएनन्  । अभिनेत्री ऐश्वर्या रायसँगको प्रेम सम्बन्धले वियोगान्तको मोड लिएपछि उनी उग्र बने  ।

ऐशलाई सुटिङ सेटमा नै आएर हातपात गर्नेदेखि पछि उनीसँग जोडिने अन्य प्रेमीको पनि दुहाई गरे । कतिका करिअर नै चौपट पार्न कम्मर कसेर लागे । त्यसताक सलमानलाई ‘ब्याड ब्वाई’ कै उपनाम पनि दिइन्थ्यो । तर फिल्म भने हम दिल चुके सनम, तेरे नाम, मुझ से सादी करोगे जस्ता प्रेमिल गर्थे । तीनै फिल्मबाट दर्शकको दिलमा राज पनि गरिरहेका थिए ।
तर समय बदलियो । सलमान सुध्रिए । हिट एन्ड रन केस होस् वा कालो हरिण मारेको अभियोगमा मुद्दाले टाउको खान थाल्यो, तब सलमानले विस्तारै आफ्नो छवि सुधार्नतर्फ लागे । यतिबेला सलमान बलिउडकर्मीका लागि देवदूत जस्तो बनेर हरपल सहयोगमा जुट्छन् । अझ महिला, युवतीका लागि त उनी जस्ता असल प्राणी विरलै कोही होलान् । यतिबेला उनी सबैका प्रिय अभिनेता बनिरहेका छन् ।
आफ्नो चरित्रमा यु–टर्न मार्न सफल सलमान पछिल्लो दशक पात्रको चरित्रमा भने दबंग शैली समातेका छन् । पर्दामा गुन्डावाला पुलिसको दादागिरी देखाउनमा बढी रमाएका छन् । आफ्नी प्रेमिकालाई अप्ठ्यारोमा पार्ने गुन्डालाई बर्दीमै भए पनि सुटआउट गरिदिन्छन् ।
शुक्रबारदेखि सलमान दबंग ३ मार्फत पुनः चुलबुल पाण्डे बनेर फर्किएका छन् । अविनाश कश्यपले नौ वर्षअघि ल्याएको दबंगले सलमानलाई वान्टेडपछि लगातार तीन फिल्मको फ्लप यात्रालाई तोडिदिएको थियो । दुई वर्षपछि अरबाज खानको निर्देशन यसको सिक्वेलमा आए । फिल्म ठीकठाक मात्रै थियो तर व्यावसायिक रूपमा सलमानले राम्रै छलाङ मारे ।
सलमान बलिउडका ठूला स्टार त हुन् तर उनलाई सधैं ढंगले नाच्न र अभिनय गर्न नजान्ने अभिनेताको आरोप लागिरहन्छ । अब त समीक्षकहरू उनका फिल्मको समीक्षा गर्नु नै बेकार हो भन्न थालिसकेका छन् । फेरि एकपटक सलमानले दबंग ३ ल्याएर समीक्षकलाई बेकारको काम थपिदिएका छन् । यसपटक दबंग ३ मा उनले खेलेका मात्रै छैनन्, कथादेखि पटकथासमेत आफैंले तयार पारिदिए । फिल्म निर्माणको तौर–तरिका हेर्दा लाग्छ, सलमानबाट दबंग ३ बाट राम्रो फिल्म बनाउनमा भन्दा पनि धेरै पैसा कमाउनमा उद्यत देखिन्छन् ।
सलमानका प्रायः फिल्ममा उनको उपस्थिति नै अह्म रहन्छ । भूमिका र चरित्रमा उनले खास ठूलो मिहिनेत नगर्दा पनि फिल्मले व्यावसायिक सफलता हात पारिरहेकै हुन्छन् । विषयवस्तु पनि त्यति उम्दा नहुँदा पनि चल्छ । सायद यही चुरो कुरो सलमानले पनि थाहा पाए होलान् र दबंग ३ मा आफैं पटकथा लेख्न कस्सिए । गीत र फाइट सिनका लागि परिस्थितिको जोरजाम गरेपछि त्यसलाई सूत्रबद्ध शैलीमा ढाल्न सन् १९८८ देखि फिल्म खेल्दै र भोग्दै आएका सलमानका लागि नौलो थिएन । उनले दबंग ३ लाई ८० र ९० को दशकदेखि चल्दै आएको बलिउड फर्मूलामा हल गरिदिए ।
तर अब बलिउड चेपुवामा परिसकेको छ । सूत्रबद्ध र फाइट दृश्यका फिल्मका लागि दर्शकले बलिउड फिल्मभन्दा दक्षिण भारतीय फिल्म रुचाउन थालिसके भने विषयपरक फिल्मको लहर बोकेर आयुष्मान खुराना, राजकुमार राव, नवाजुद्दिन सिद्दिकीदेखि महिलाप्रधान फिल्मबाट अभिनेत्रीहरू फ्रन्टलाइनमा उभिसके । अब यस्तोमा सलमान खान वा शाहरुख खान जस्ता ठूलो जमातका दर्शकको ढुकढुकी बनेर लामो वर्षदेखि जागिरहेका अभिनेताले दबंग ३ ल्याउनु अब समीक्षकको लागिमात्रै बेकार हैन, दर्शक पनि अघाउन थालिसके । पात्रको चरित्रमा पनि सलमानको यु–टर्न मात्र जरुरी छ । जीउ देखाएरै भिलेनसँग निहुँ खोजेकै भरमा अब टिकिरहन गाह्रो हुन सक्छ ।
दबंग ३ कै कुरा गर्दा पनि, फिल्ममा सलमान हिरो भए पनि चर्चा र वाहवाही भिलेनको चरित्रमा देखिएका सुदीप सन्दीप (किच्चा) ले बटुलेका छन् । कारण, सलमानभन्दा उनी बढी चरित्रमा आफूलाई फिट देखिएका छन् । फिल्ममै पनि आफ्नो चरित्रका कारणभन्दा सलमान नै देखिएर बढी दर्शक सिट्टी पाउने सलमानले दबंग ३ लाई चुलबुल पाण्डेको चरित्र निर्माणको घेराबाट देखाउन खोजेका छन् । उनकै फ्यान पनि चुलबुल पाण्डे कसरी दबंग बन्यो भन्ने हेर्नमा भन्दा सलमानले कसरी पर्दामा दबंग शैली पस्कन्छन् भन्ने हेर्न चाहन्छन् । उनीहरूकै लागि पनि दबंग ३ को लामा–लामा फ्ल्यासब्याकले नीरस बनाउन सक्छ ।

प्रकाशित : पुस ११, २०७६ १०:३२
प्रतिक्रिया
पठाउनुहोस्

सपना हराएको मान्छे

सुशील पौडेल

काठमाडौँ — मुलुकवासीका लागि राजधानी सपनाको सहर पनि हो । धेरैले धेरै सपना बोकेर सहर पस्छन् । कतिका सपना पूरा होलान्, कति सहरमै हराउलान् । तर त्यसको कुनै लेखाजोखा छैन तर यतिबेला त्यस्तै सपनाको झोला बोकेर कतार जान गाउँदेखि हिँडेको रुद्रप्रसाद पोखरेलको झोला काठमाडौंमा अचानक हरायो ।

भीसा लागेको पासपोर्ट र ऋण काढेर ल्याएको ८५ हजार नगदसहितको झोला काठमाडौंको भीडभाडबाट हराएपछि रुद्र बिलखबन्दमा परेको छ । झोला खोजेर आफ्नो सपना साकार पार्न रुद्रले गरिरहेको संघर्षको कथालाई समेटेर तयार पारिएको नाटक ‘झोला हराएको मान्छे’ बुधबारदेखि राजधानीको अनामनगरस्थित मण्डला थिएटरमा नियमित मञ्चनमा छ ।

स्लिम जीवनको लेखन तथा दीपेन्द्र शाहीको निर्देशन रहेको उक्त नाटकले झोलाको खोजीमा रहेको रुद्रमार्फत सहरी जीवनको चिरफार गर्ने प्रयास गरेको छ । राजधानीमा रुद्रले मगज हराएकादेखि, संस्कार हराएका र आवाज हराएकासम्मका अनगिन्ती लाचार पात्रहरू भेट्छ । घर बनाएर आमालाई पाल्ने मीठो सपना देखेर पैसा कमाउन कतार जान हिँडेको रुद्रको विदेश उड्नु अघिल्लो दिन नै झोला हराएको छ । झोला खोजिदिने आश्वासनमा गाउँले दाइले दुरुपयोग गर्छ । भाँडा मझाउनेदेखि आफ्ना खुद्रा व्यापारमा लदाउँछ । न झोला भेटिन्छ, न त रुद्रले विदेश जाने सपना त्याग्छ ।

नाटकले केही उपकथामार्फत राजधानी र राजधानीवासीमा हराउँदै गएको मानवीयता, सहयोगी भावना, सामाजिक संस्कारलाई कटाक्ष गरिदिएको छ । नाटकका एक पात्र भन्छन्, यहाँ हर चिजमा मिसावट छ । खुसीसँग दु:ख मिसिएको छ, आफ्नोपनसँग एक्लोपन, धूलोसित धूवाँ, सम्बन्धसँग स्वार्थ मिसिएको छ । रोजगारीको नाममा होस् वा पढाइको, पछिल्लो दशक देशबाट बिदेसिनेको संख्या बर्सेनि बढ्दो क्रममा छ । राजनीतिक अस्थिरता र त्यससँगै मौलाएको भ्रष्टाचार, कुशासनले विकास निर्माण ठप्प छ । युवा बेरोजगार टड्कारो समस्या हो । वियोगान्त शैलीमा प्रस्तुत गरिए पनि नाटक झोला हराएको मान्छेले युवालाई गाउँ फर्केरै आफ्नो सपना साकार पार्न सकिन्छ भन्ने सकारात्मक सन्देश दिन खोजेको छ ।

झोला हराउने मूल पात्र रुद्रको भूमिकामा लेखक स्लिम स्वयं अभिनीत छन् । उनले आफ्नो लेखनलाई अभिनयमार्फत पनि पूरापूर न्याय गरेका छन् । केही दृश्य लामा छन् । जसले नाटकलाई विषयान्तर गराउन खोजे पनि दर्शकका लागि भने मनोरञ्जनात्मक छ । निर्देशकले नाटकमा पात्रको विविधता, संगीत र उपकथाको संयोजनलाई प्रभावकारी बनाएका छन् । अभिनयमा स्लिम जीवन उम्दा देखिएका छन् भने अन्य कलाकार पनि फिक्का लाग्दैनन् । रंगमञ्चमा प्राय: नयाँको बाहुल्य रहेको टिम भए पनि नाटकलाई गहकिलो ढंगले पस्किइएको छ ।

प्रकाशित : पुस १, २०७६ १०:५३
पूरा पढ्नुहोस्
प्रतिक्रिया
पठाउनुहोस्
×