औषधि व्यवसायीलाई रिफ्रेसर तालिम- अन्य - कान्तिपुर समाचार

औषधि व्यवसायीलाई रिफ्रेसर तालिम

कान्तिपुर संवाददाता

काठमाडौँ — नेपाल औषधि व्यवसायी संघ वाग्मती अञ्चल शाखाको आयोजनामा ललितपुरमा सात दिने रिफ्रेसर तालिम सुरु भएको छ ।

तालिममा उपत्यकासहित विभिन्न शाखाबाट १ सय ५० जना सहभागी भएको शाखाका कार्यवाहक अध्यक्ष ध्रुवनारायण श्रेष्ठले जानकारी दिए । २०५४ सालदेखि रोकिएको तालिम तीन वर्षअघि पुनः सुरु भएको थियो ।


औषधि व्यवस्था विभागका कामु महानिर्देशक पानबहादुर क्षेत्री, संघका केन्द्रीय अध्यक्ष मृगेन्द्रमेहर श्रेष्ठलगायतले व्यवसायीलाई समयसापेक्ष बनाउन तालिम गरिएको बताए ।


संघका केन्द्रीय अध्यक्ष श्रेष्ठले औषधि व्यवसायीलाई सरकारकै १० वटा ईकाईले अनुगमन गरेर दुःख दिएको भन्दै असन्तुष्टि जनाए ।

प्रकाशित : कार्तिक २३, २०७६ १९:२८
प्रतिक्रिया
पठाउनुहोस्

राष्ट्रिय तेक्वान्दो टोलीलाई चीनमा सफलता

कान्तिपुर संवाददाता

काठमाडौँ — १३ औं दक्षिण एसियाली खेलकुद (साग)का लागि वैदेशिक प्रशिक्षणमा रहेको राष्ट्रिय तेक्वान्दो टोलीले चीनमा आयोजित आधिकारिक अन्तर्राष्ट्रिय प्रतियोगितामा १ रजत र ५ कांस्य पदक जितेको छ ।

चाइना ओपन अन्तर्राष्ट्रिय तेक्वान्दो प्रतियोगिता विश्व तेक्वान्दो महासंघबाट मान्यताप्राप्त वरीयता निर्धारण गर्ने प्रतियोगिता हो ।

बिहीबारदेखि सुरु प्रतियोगितामा नेपालले शुक्रबार ३ कांस्य जितेको थियो । अन्तिम दिन शनिबार १ रजतसहित २ कांस्य थपेको हो । नेपालका ज्ञानेन्द्र हमालले ६३ केजीमूनि तौल समूहमा रजत पदक जितेका हुन् । विश्व तेक्वान्दोको वरीयता निर्धारण गर्ने प्रतियोगितामा नेपाली खेलाडीले पाएको यो ठूलो सफलता हो ।

ज्ञानेन्द्रले चोटका कारण चीनका खेलाडीसँगको फाइनल खेल खेल्न नसक्दा रजतमा चित्त बुझाउनुपरेको प्रशिक्षक दीपक विष्टले कान्तिपुरलाई बताए । ज्ञानेन्द्रले पहिलो खेल चिनियाँ, क्वार्टरफाइनलमा दक्षिण कोरियाली र सेमिफाइनलमा चिनियाँ प्रतिद्वन्द्वीलाई पराजित गरी फाइनलमा पुगेका हुन् ।

महिला ७३ केजीमाथि तौल समूहमा निशा रावल र पुरुष ८७ केजीमूनि तौल समूहमा भूपेन्द्र श्रेष्ठले शनिबार कांस्य जितेका हुन् । पहिलो खेलमा बाइ पाएकी निशा सेमिफाइनलमा चिनकी खेलाडीसँग पराजित भइन् । भूपेन्द्रले पनि पहिलो खेल बाइ पाएका थिए । क्वार्टरफाइनलमा चिनियाँ खेलाडीलाई हराएका उनले पनि सेमिफाइनलमा चीनकै खेलाडीसँग पराजय बेहोरे ।

शनिबार महिला ७३ केजीमूनिमा मनिता शाही, ६३ केजीमूनिमा अप्सरा कार्की, ६२ केजीमूनिमा संगीता बस्याल र पुरुष ८७ केजीमाथि तौल समूहका सक्षम कार्की भने पहिलो खेलमै पराजित भएका थिए ।

प्रकाशित : कार्तिक २३, २०७६ १९:०९
पूरा पढ्नुहोस्
प्रतिक्रिया
पठाउनुहोस्
×