यो समझदारी भत्किन दिन्नौं : गगन थापा

राष्ट्रपतिमा समर्थन लिने मात्रै नभई सत्ता गठबन्धन नै भत्काउनेसम्मको सहमतिले राजनीतिक अस्थिरता बढाउने काम भएन ?

निर्वाचन अघि र पछिको गठबन्धनमा धेरै फरक छ । कि त निर्वाचनअघि गठबन्धन गर्न हुन्थेन । गरिसकेपछि, पाँच वर्षको अवधि पूरा गर्नु नै पर्थ्यो । त्यसमा हामी चुकेका थियौं । अहिले बनेको समझदारीले नयाँ सरकार बन्ने ढोका खुलेको छ । यो भनेको मतदानबाटै अनुमोदित भएर आएको हो । बरु, एमाले र माओवादीसहितको गठबन्धन सरकारले लगातार शृंखलाबद्ध अस्थिरता ल्याइरहन्थ्यो । निर्वाचनपछि बन्ने गठबन्धन अघि बनेजस्तो जनताबाट अनुमोदित भएको हुन्न । सुविधाअनुसार जोसँग पनि मिल्न सक्थ्यो । हामीले पुस १० मा एउटा गल्ती गर्‍यौं, त्यो सच्याउने काम सुरु भएको छ ।

भोलिका दिनमा तपाईंहरूलाई एमालेले पाँच वर्ष सरकार चलाउनुहोस्, माओवादीलाई छाड्नुहोस् भनेर प्रस्ताव गर्‍यो भने फेरि अर्को सरकार बन्ने त होइन ?

त्यही भएर यसपालि हामीहरू पनि छलफलमा बस्यौं । सरकारको नेतृत्वका विषयमा केही कुरा नेताहरूले छुट्टै गर्नुभयो । अब अर्को निर्वाचनसम्मै यो गठबन्धन लैजाने समझदारी नेता–नेताबीचमा नभएर पार्टी–पार्टीबीचमा भएको छ । कांग्रेसको कारणले अब आउने निर्वाचनसम्म समझदारीमा तलमाथि हुँदैन ।

सत्ताका लागि कांग्रेसले जे पनि गर्छ भन्ने सन्देश गयो नि, होइन ?

चुनावअघिको समझदारी जोगाउन नसक्नु हाम्रै कमजोरी थियो । अहिले एउटा परिस्थितिले फर्कने अवस्था बनेको छ । यसमा कांग्रेसको सबैभन्दा ठूलो जिम्मेवारी छ, त्यो कांग्रेसले निर्वाह गर्नुपर्छ ।

समझदारी तलमाथि हुँदैन भन्ने विश्वास के ?

हामी संलग्न भएको पनि त्यही भएर हो । जहिले पनि दुई–तीन जना नेताहरू मात्रै बस्ने । उहाँहरू मात्र संलग्न हुने, कुरा गर्ने । एउटा बिन्दुमा आएपछि उहाँहरूले आफ्नो निजी कुराजस्तो बनाउने गर्नुभयो । समझदारी गर्दा पनि अपारदर्शी र व्यक्ति–व्यक्तिका बीचमा भयो । त्यही भएर यस पटक सिंगो पार्टी यसमा संलग्न छ ।

कसले कति समय सरकारको नेतृत्व लिने समझदारी छ ?

अहिलेलाई हामी सबैको ध्यान राष्ट्रपतिमा छ । यसले नयाँ यात्राको ढोका खुलेको छ । भएका समझदारी र भनिएका कुराहरू पूरा नगर्ने अवस्था आउन हामी दिँदैनौं ।

कांग्रेसले कसलाई उम्मेदवार बनाउँदै छ ?

अनौपचारिक ढंगले विभिन्न चरणमा कुरा गरिरहेका छौं, शनिबार बिहान एकैछिनको बैठकपछि निर्णय आइहाल्छ ।

साझा उम्मेदवार अघि सार्ने काम भएन ?

भएन, सबै दलका नेताहरूले कांग्रेस उम्मेदवारलाई समर्थन गर्ने भन्नुभएको छ ।

सरकारमा जाने र मन्त्रालय भागबन्डाबारे ?

अहँ, त्यसमा छलफल भएकै छैन ।