‘प्रतिस्पर्धाबिनै युवा पनि कसरी अघि आउने ?’ [भिडियो]- कुराकानी - कान्तिपुर समाचार
अन्तर्वार्ता

‘प्रतिस्पर्धाबिनै युवा पनि कसरी अघि आउने ?’ [भिडियो]

कान्तिपुर संवाददाता

काठमाडौँ — कांग्रेसको १४ औं महाधिवेशमा नेतृत्व चयनका लागि सोमबार बिहान मतदान हुँदैछ । पार्टीको केन्द्रीय कार्यसमितिका विभिन्न पदमा सयौं आकांक्षीहरूबीच प्रतिस्पर्धा चलिरहेको छ । महाधिवेशनमा उम्मेदवारका समीकरण, नेतृत्व र एजेन्डाबारे महामन्त्रीका उम्मेदवार प्रदीप पौडेलसँग ऋषिराम पौडेलले गरेको कुराकानी :

महामन्त्री पदमा उम्मेदवारी दिनुभएको छ, तपाईंको एजेन्डा के हो ?

कांग्रेसका आन्तरिक समस्या छन् । पुस्तान्तरणको कुरा उठाएका छौं । आन्तरिक संगठनात्मक व्यवस्थालाई चुस्त र प्रभावकारी बनाउनुपर्नेछ । हाम्रो पार्टीमा पूर्ण एकता निर्माण गर्नुपर्नेछ । एकता नहुँदा निर्वाचनमा हार बेहोर्नुपरेको छ । कुनै पनि समस्यालाई विधिसम्मत ढंगबाट हल गर्ने स्थिति बनाउनु जरुरी छ । बाहिरी समाजमा राष्ट्रिय मुद्दालाई प्रस्ट्याउँदै अगाडि जानुपर्ने अवस्था छ ।

पार्टी नेतृत्वमा केन्द्रित छ, वैचारिक छलफल किन भएन ?

राजनीतिक दलमा विचारमा छलफल नहुने कुरा आउँदैन । पार्टीको दैनन्दिन जीवनमा हरेक मुद्दामा हरेक कार्यकर्ताले आ–आफ्ना दृष्टिकोण राखिरहेका हुन्छन् । त्यस्ता विषयलाई संगठित गरेर महाधिवेशनमा छलफल हुनुपर्थ्यो, त्यो हुन सकेन । अहिले ब्यानर र प्ले–कार्डको प्रतिस्पर्धा भयो । खासमा व्यक्ति कस्तो छ भन्ने आधारमा मत दिने कुरा स्वाभाविक हुन सक्दैन । व्यक्तिले प्रस्तुत गर्ने नीतिका आधारमा मत दिने हुनुपर्थ्यो । एक त नेपालको राजनीतिमा विचार स्खलित भएको छ । विचारमै बहस नहुनु स्वाभाविक हुन सक्दैन । हामीले यो प्रक्रिया बदल्नु जरुरी छ । त्यसमा कुनै एक दुई व्यक्तिको पहल पर्याप्त छैन, सिंगो पार्टी पंक्तिले साथ दिएमा हामीले हाम्रा अभ्यास बदल्नेछौं ।

अघिल्लो महाधिवेशनमा पार्टीमा तीन वटा गुट थिए, अहिले ४–५ वटा गुट प्रकट भएका छन् । त्यसले तपाईंलाई कहाँ लैजाला ?

समूह धेरै भए पार्टीमा अव्यवस्था हुन्छ, समस्या हुन्छ, एकता खलबलिन्छ भन्ने पनि होइन । यस्ता समूह निर्माण व्यक्तिमा सम्बन्धित हुँदैन, व्यक्तिले प्रस्तुत गरेको विचारसँग निर्भर हुनुपर्छ । त्यसैले समूह फरक–फरक भन्दैमा विचारमा फरक हुनुपर्छ भन्ने होइन । धेरै समूह र उम्मेदवार भए धेरै विचार आउन सक्छ । व्यक्ति पराजित भए पनि उसको विचार कार्यान्वयनमा जान सक्छ । व्यक्ति केन्द्रित गुट निर्माण हुनु भने गलत हो ।

तपाईं पार्टी सभापति शेरबहादुर देउवाको प्यानलमा हुनुहुन्छ, आफैं रूपान्तरण हुनुभएन नि ?

मुख्य कुरा हामी (युवा) मध्येबाट सभापतिमै दाबी गर्ने अवस्था रहेन । कसै न कसैसँग जोडिएर अघि बढ्नुपर्ने अवस्था आयो, यो वा त्यो समूहमा । मुख्य विषय हामीले आन्तरिक लोकतन्त्रलाई संगठित गर्ने, पार्टीलाई बलियो बनाउने र निर्वाचनमा विजयी बनाउने योजनालाई प्राथमिकतामा राखेका छौं । त्यसका लागि पार्टीभित्रको प्रतिस्पर्धालाई तिक्त बनाउने होइन, सौहार्द बनाउने र पार्टीमा बृहत्तर एकता निर्माण गर्ने हो । यो विषयमा तल्लो निकायमा अधिवेशनमा समग्रमा उन्नत अभ्यास भएको छ, हामीले त्यसैलाई अझ बलियो बनाउने हो ।

पाँच वर्षसम्म पार्टी विधानसम्मत चलेन भनेर विरोध गर्नुभयो, अहिले त्यही नेतृत्वलाई किन स्विकार्नुभयो ?

पार्टीभित्र उठ्ने प्रश्नहरू कहिल्यै पनि शत्रुतापूर्ण हुँदैनन्, त्यो प्रजातान्त्रिक संस्कारभित्रकै अनिवार्य अभ्यास हुन् । अहिले भइरहेको अधिवेशनमा जितहारपछि पनि हामी कुनै पनि प्रतिस्पर्धीसँग शत्रुतापूर्ण व्यवहार गर्दैनौं, कांग्रेसको त्यो संस्कार पनि होइन । महाधिवेशन भनेको समझदारीको मञ्च पनि हो, धेरै विषय समझादारीमै टुंग्याएका हौं । त्यसमा सभापति शेरबहादुर देउवाले उदारता देखाउनुभएकै हो । सबै कुरा एजेन्डागतभन्दा व्यक्तिगत हिसाबले ध्रुवीकरण हुने स्थिति बन्यो । हामी यो वा त्यो जुन समूहमा भए पनि यी विषय आउँछन् । त्यसलाई अन्यथा मान्नुहुन्न । हामी सबैको मुख्य उद्देश्य पार्टी र लोकतन्त्रलाई बलियो बनाउने हो ।

विद्यार्थी राजनीतिका सहयात्री विश्वप्रकाश शर्मा, गगन थापासँगै एउटै पदमा उम्मेदवारी दिनुभएको छ । यो संयोग मात्र हो कि योजनाबद्ध ?

युवाहरूले आपसमा प्रतिस्पर्धा नगरेको भए हुन्थ्यो भन्ने भावनलाई सम्मान गर्न सकिन्छ, तर प्रतिस्पर्धालाई अस्वाभाविक रूपमा लिनु हुँदैन । बृहद् राजनीतिक परिवर्तनको महत्त्वाकांक्षा बोकेर अघि बढेपछि प्रतिस्पर्धा अहिले नभए पनि कुनै बेला हुन्थ्यो नै । हामी युवा हौं, आपसमा प्रतिस्पर्धाबिना नै नेतृत्वमा जान्छौं भन्ने स्विकार्य हुन सक्दैन । काबिल ढंगले प्रतिस्पर्धा गरेर अघि जाने संस्कृतिलाई नै हामीले महत्त्व दिँदै आएका छौं ।

तपाईंको योजना के छ ?

मेरो आग्रह कांग्रेसले आफ्नो सम्पूर्ण शक्तिलाई संगठित गर्न नसकेको र पार्टीका मान्छेहरूबीच पनि बेमेल भएकाले सशक्त संगठन बनाउन सकेनौं । निर्वाचनमा पराजित भयौं । त्यसैले पहिले हामीले हाम्रो शक्ति पनि संगठित गर्नुपर्छ । महाधिवेशन सकिएपछि एकीकृत ढंगबाट एउटै लक्ष्यका सहयात्रीका रूपमा अघि बढ्नुपर्छ । लोकतान्त्रिक प्रक्रियामा प्रतिस्पर्धा गर्न आइसकेपछि त्यसको परिणामले लामो समयसम्म असर गर्नु हुँदैन । आफैंभित्र बहुदलीय प्रक्रिया प्रयोग गर्न हामी अभ्यस्त हुनुपर्छ । म एकता र समन्वय गर्न चाहन्छु । पार्टीलाई एकीकृत ढंगबाट अगाडि लैजाने अवस्था रहनुपर्छ ।

प्रकाशित : मंसिर २७, २०७८ ०७:३३
प्रतिक्रिया
पठाउनुहोस्

‘उमेरसँगै एजेन्डा महत्त्वपूर्ण हो’– शर्मा

कान्तिपुर संवाददाता

काठमाडौँ — कांग्रेसको १४ औं महाधिवेशमा नेतृत्व चयनका लागि सोमबार बिहान मतदान हुँदैछ । पार्टीको केन्द्रीय कार्यसमितिका विभिन्न पदमा सयौं आकांक्षीहरूबीच प्रतिस्पर्धा चलिरहेको छ । महाधिवेशनमा उम्मेदवारका समीकरण, नेतृत्व र एजेन्डाबारे महामन्त्रीका उम्मेदवार विश्वप्रकाश शर्मासँग कलेन्द्र सेजुवालले गरेको कुराकानी :

महामन्त्रीमा तपाईंको उम्मेदवारी किन ?

हाम्रो पार्टीलाई बदलिएको कांग्रेस र बलियो कांग्रेस बनाउनुपर्ने राष्ट्रिय अपेक्षा छ । देशले यो बेला कांग्रेस खोजेको छ । कांग्रेसले यो बेला नवीन आत्मविश्वास खोजेको छ । यो अवधिसम्म मैंले जेजति काम गरें, अनुभव लिएँ, त्यसको जगमा पार्टीलाई रूपान्तरित र आधुनिक बनाउने सन्दर्भमा मैले गर्न सक्ने कार्य भनेको महामन्त्रीको जिम्मेवारी हो । त्यस कारण म जागरुक भएर उभिएको हुँ ।

तपाईं आफ्नो पक्षमा परिणाम आउनेमा कत्तिको विश्वस्त हुनुहुन्छ ?

एउटा अत्यन्त सुखद तथ्य छ । कांग्रेसको महामन्त्रीमा युवाले नेतृत्व गर्ने अवस्था बनेको छ । कांग्रेसलाई समग्रतामा युवामय बनाउनुपर्ने अवस्था छ । ६१ दशमलव ६३ प्रतिशत क्रियाशील सदस्य ५० वर्षमुनिका हुनुहुन्छ । ५० वर्षमुनिको महाधिवेशन प्रतिनिधिको संख्या ५० प्रतिशत छ । त्यो पुस्ताले आफ्नो नेतृत्व खोज्नु स्वाभाविक छ । उहाँहरूले खोज्ने नाम हुन सकेको छु । ५० वर्षभन्दा माथिका पाकाहरूले पनि मैदानमा हिँड्दै गर्दा ‘ल बाबु कांग्रेस राम्रो बनाएस्, गुट–उपगुट हामी जान्दैनौं तिमीलाई हाम्रो सहयोग छ’ भनेर शिरमा हात राखेर हार्दिकतापूर्वक आशीर्वाद दिनुभएको छ । त्यसकारण मेरो पक्षमा परिणाम आउनेमा विश्वस्त छु ।

तपाईंका प्रमुख एजेन्डा के–के हुन् ?

सांगठनिक, राजनीतिक र सामाजिक रूपान्तरणसँग सम्बन्धित थुप्रै एजेन्डा छन् । मैले महाधिवेशन हुनुअघि नै दुई वटा दस्ताबेज सार्वजनिक गरेको थिएँ । ‘हिजो राजनीतिक परिवर्तन अब राजनीतिमा परिवर्तन’ भनेर २४ वटा बुँदाको र त्यसपछि ‘दलमा रूपान्तरण, देश रूपान्तरणको अनिवार्य सर्त’ भनेर ४३ बुँदासहित सार्वजनिक गरेको छु । त्यसमा एकपटकभन्दा बढी राष्ट्रपति, दुई पटकभन्दा बढी प्रधानमन्त्री, तीन पटकभन्दा बढी मन्त्री र चार पटकभन्दा बढी सांसद हुन नपाउने, कसैलाई मन्त्री बनाउनुपर्ने अवस्था आए प्रधानमन्त्रीले बाहिरबाट पनि ल्याउन सक्ने व्यवस्था हुनुपर्‍यो भन्ने छ । अर्को कुरो, दलमा रूपान्तरण नभईकन देश रूपान्तरण हुन सक्दैन । राजनीतिक दलहरू आधुनिक बन्न पर्‍यो । दलहरूको आधुनिकीकरणको सुरुवात कांग्रेसबाट गर्नुपर्‍यो । सामाजिक रूपान्तरणका असर र मुद्दालाई बिर्सेर देश बन्दैन । त्यसकारण सामाजिक विसंगति अन्त्य दलहरूको साझा विषय बन्नुपर्छ । समृद्धिको सन्दर्भमा पनि बीपी कोइरालाले राखेको जस्तै सपनाका साथ जानुपर्छ । दुई वटा प्रकाशित र दुई वटा अप्रकाशित दस्ताबेजको जगमा म महामन्त्रीको उम्मेदवारमा छु ।

कांग्रेसमा किन विचारले जित्दैन ?

त्यसो पनि होइन । कांग्रेसमा जे स्थापित विचार हो, सबैले त्यसैलाई बोकेर आएका छन् । कुनै फरक प्रकारको विचारका बीचमा द्वन्द्व थिएन । हिजोको साझा विचार थियो– लोकतन्त्र स्थापना, गणतन्त्र स्थापना । अहिले हाम्रो पुस्तामा आइपुग्दा समाजले हिजोभन्दा फरक सोच्न थालेको छ । पार्टी रूपान्तरणको खाका प्रस्तुत नगर्ने हो भने हामी भोलि धेरै प्रश्नको घेरामा उभिनुपर्छ । म त्यो प्रश्नको घेराभन्दा अलि पर उभिएर उत्तरका साथ तयारी छु ।

महामन्त्रीमा युवा उम्मेदवार धेरै हुँदा युवापुस्ता छनोटमा अलमल पर्दैन ?

उमेर मात्रै होइन, एजेन्डाको कुरा पनि छ । एजेन्डाको कुरामा देशभरि एक खालको माहोल छ । महाधिवेशन प्रतिनिधिहरूलाई यी दुई युवा महामन्त्री भए भने कांग्रेसलाई सही ढंगले अगाडि बढाएर राम्रो काम गर्न सक्छन् भन्ने परिसकेको छ ।

पार्टी प्रवक्ता हुनुभयो, आफूलाई कसरी आत्ममूल्यांकन गर्नु हुन्छ ?

मैले प्रवक्ता हुनुका साथै प्रचार विभागमा रहेयता के—के काम गरें भन्ने कुरालाई क्रमशः हेर्दै गयो भने म एकदमै सन्तुष्ट भइहाल्छु भन्दिनँ । तर साथीहरूले भन्नुहुन्छ । म आएपछि पार्टीको वेबसाइट अत्याधुनिक भयो । पार्टीको देशभरिको रेकर्ड पद्धति भयो । आज पार्टीको वडा तहको नेतृत्वमा को छ भनेर सबै डाटा वेबसाइटमा हेर्न पाइन्छ । कांग्रेसका धारणा वेबसाइटमा देखिने, सुनिने र बुझिने गरी प्रचार विभागले राखेको छ । एउटा घरलाई व्यवस्थित गर्न कसको के दायित्व रहन्छ, त्यो दायित्व निर्वाह गर्ने सन्दर्भमा सबैको जिम्मेवारी हुन्छ । मेरो दायित्व पार्टीको प्रचारप्रसार व्यवस्थापन गर्ने थियो । त्यो काम मैले राम्रो गरेको छु । पार्टीको महामन्त्रीले गर्ने भनेको व्यवस्थापन, प्रचार, पार्टीको विचार निर्माण हो । तीन वटै खुट्टा भएको ओदान जस्तो भएर भूमिका निर्वाह गर्न म तयार छु ।

महाधिवेशनपछिको कांग्रेस कस्तो हुनुपर्छ ?

महाधिवेशनबाटै बलियो कांग्रेस र बदलिएको कांग्रेस भन्ने सन्देश दिने ढंगले युवाको बढोत्तरीलाई जोगाएर संस्थागत गरेर जानुपर्छ । यो आपसी चुनाव हो । महाधिवेशनपछि एकताबद्ध भएर चुनावमा कम्युनिस्टसँग लड्नु छ । त्यसपछि फेरि सबै एकढिक्का भएर देशको गरिबी र पछौटेपनसँग लड्नु छ भन्ने सन्देश दिनुपर्छ ।

प्रकाशित : मंसिर २७, २०७८ ०७:२९
पूरा पढ्नुहोस्
प्रतिक्रिया
पठाउनुहोस्
×