‘गतिशील र ऊर्जाशील कांग्रेस बनाउने मेरो योजना’- कुराकानी - कान्तिपुर समाचार
कान्तिपुर वेबसाईट
AdvertisementAdvertisement
अन्तर्वार्ता

‘गतिशील र ऊर्जाशील कांग्रेस बनाउने मेरो योजना’

कान्तिपुर संवाददाता

काठमाडौँ — कांग्रेसका भावी नेतृत्व चयन गर्न सोमबार मतदान हुँदै छ । सत्ता र शक्तिको केन्द्रमा रहेका सभापति शेरबहादुर देउवालाई चुनौती दिन चार जनाले उम्मेदवारी दिएका छन् ।

संस्थापनइतर एउटा टिमको नेतृत्व गरिरहेका शेखर कोइराला आफ्नो उम्मेदवारी अनुहार परिवर्तनका लागि मात्र नभएर विचार, कार्यक्रम र युवा टिमलाई बलियो आधार मान्छन् । कोइरालासँग कांग्रेस महाधिवेशन र उम्मेदवारीका सन्दर्भमा कान्तिपुरका कुलचन्द्र न्यौपाने र ऋषिराम पौड्यालले गरेको कुराकानीको सम्पादित अंश :

पाँचपटक प्रधानमन्त्री, कांग्रेस (प्रजातान्त्रिक) सहित दुईपटक पार्टी सभापति भइसक्नुभएका शेरबहादुर देउवासँग प्रतिस्पर्धामा उत्रिनुभएको छ, तपाईंको जित्ने आधार के छ ?

उहाँ प्रजातन्त्रका लागि दुःख गर्नुभएको छ । तर मैले बितेको पाँच वर्ष देशभर भ्रमण गर्दा कांग्रेसका साथीहरूले पार्टी गलत दिशामा गएको भनेका छन् । पार्टी अत्यन्त लथालिंग हिसाबले चलेको छ । शेरबहादुरजीको प्रतिस्पर्धामा मलाई कुनै भारीको महसुस भएको छैन । उहाँले राम्रो काम गरेको भए, विधिअनुसार कांग्रेस चलाएको भए आज कांग्रेसको यो अवस्था हुन्थेन । शेरबहादुरजीले आफ्नै गृहजिल्ला डडेलधुरामा पुलिस लगाएर पार्टीको निर्वाचन गराउनुपर्ने अवस्था आयो । देशको प्रधानमन्त्री र पार्टीको सभापति भएको व्यक्तिले किन त्यस्तो गर्नुपर्‍यो ? उहाँले जे भने पनि साथीहरूको मानिहाल्थे । उहाँलाई आदर गर्छन्, सम्मान छन् ।

पार्टीको महाधिवेशनमा राज्य शक्तिको दुरुपयोग गरिएकाले निर्वाचन निष्पक्ष छैन भन्न खोज्नुभएको हो ?

यसमा कुनै शंका छ र ? मलाई त शंका छैन । देशभरिको कुरा गर्दै छु । प्रहरी प्रशासन र गृह प्रशासनले खेलेको भूमिका हेर्नुस् । मन्त्रीहरू गएर डीआईजी कार्यालयको गेस्टहाउसमा भेटघाट गर्न थालेपछि के सोच्ने ? यो कांग्रेसको संस्कार होइन । कांग्रेसको संस्कृति त गाउँमा साथीहरूसँग भेटेर कुरा गर्ने हो ।

केन्द्रको महाधिवेशनमा पनि त्यस्तो अवस्था देखिएको छ र ?

दुईचार दिनअघिको कुरा हो, उहाँ (देउवा) ले इन्टिलिजेन्टका मान्छे मेरै घरमा पठाउनुभयो । मैले ती व्यक्तिलाई सोधें । त्यसपछि आईजीलाई फोन गरें । मेरो घरमा इन्टिलिजेन्सका व्यक्ति किन पठाउनुपर्‍यो ? शेखर कोइरालाको ‘मोमेन्ट’ कहाँ छ भनेर पत्ता लगाउन खोजिएकै होला । प्रहरीसँग कांग्रेसका प्रतिनिधि कसकसले जितेको छ भनेर लिस्ट माग्नुहुन्छ । कांग्रेसभित्रको कुरा किन प्रहरीसँग माग्नुपर्‍यो ? त्यसले पार्टी कता जाँदै छ भन्ने देखाउँछ । यो अत्यन्तै गम्भीर कुरा हो । अति भइसकेपछि मैले यो कुरा आज खोल्नुपर्‍यो । निर्वाचन समितिबाट पनि गलत निर्णय भइरहेका छन् । निर्वाचन समितिका मान्छे हाम्रा न्यायाधीश हुन् । उहाँहरूले सबै निर्णय सभापतिको पक्षमा गर्दै हुनुहुन्छ । तर पनि हामी प्रतिस्पर्धा गर्दै छौं, त्यो सबैभन्दा ठूलो कुरा हो ।

विधि–विधान मिचेको र पार्टी लथालिंग भएको भन्नुभयो, तपाईं सभापति चुनिनुभयो भने कसरी पार्टी चलाउने योजना छ ?

पार्टीको विधान छ । त्यसैमा टेकेर हिँड्ने हो । मलाई विधानका धेरै कुरा चित्त बुझेको छैन । बौद्धिक सर्कल र कांग्रेसका नेताहरू बसेर एउटा सानो टिमले विधान परिमार्जन गरोस् । विधान हुबहु पालना गर्नुपर्छ ।

प्रतिस्पर्धाबाट रामचन्द्र पौडेल बाहिरिएपछि तपाईंले दोस्रो पुस्ताको प्रतिनिधित्व गर्नुभएको छ । तर उमेरमा ६/७ वर्षको मात्रै फरक छ । देउवाभन्दा आफूलाई कसरी फरक ठान्नुहुन्छ ?

लोकतन्त्रका लागि उहाँले खेलेको भूमिकाको कदर गर्नैपर्छ । तर उहाँ गुटको राजनीति गर्दै हुनुहुन्छ । गिरोहको राजनीति गर्दै हुनुहुन्छ । त्यो अन्त्य गर्नुपर्छ । गिरोहले कांग्रेसलाई समाप्त गर्न लागेको छ । अहिलेकै अधिवेशनमा जसरी पैसाको चलखेल भएको छ, जसरी खर्च गरिरहनुभएको छ, त्यो कल्पना गर्न नसकिनेछ । तपाईंहरू विश्वास नै गर्न सक्नुहुन्न । त्यसरी पार्टी चल्छ ? पार्टीको आमकार्यकर्ता निमुखा छन् । लडाइँ लडेर आएका छन् । पार्टी बचाउन आएका हुन् । काठमाडौंमा बसेका दुई/चार जना ठूला घरानाले पार्टी चलाउने होइन । तर त्यो भइरहेको छ । विकृति विसंगति कांग्रेसमा छिरिसकेको छ । त्यो कल्पना बीपी कोइरालाले गर्नुभएको थियो र ? गणेशमान र किसुनजीले गर्नुभएको थिएन । गिरिजाबाबुले गर्नुभएको थिएन । सुशीलदाको त कुरै छाडौं ।

इमानदार कार्यकर्ता पाखा पर्ने, धनवाद र डनवाद भित्रिने गरेको भनेर पार्टीभित्रै धेरै आवाज उठ्ने गर्छ । तपाईं सभापति हुनुभयो भने यसलाई अन्त्य गर्ने सामर्थ्य राख्नुहुन्छ ?

त्यसको अन्त्य गर्नैपर्छ । नत्र कांग्रेस चल्न सक्दैन । यस्तो विकृतिले कांग्रेसलाई पछाडि धकेल्दै छ ।

शासकीय अनुभव त तपाईंसँग भएन । पार्टीमा पनि लामो अनुभव नभएको भनेर भन्ने गरिन्छ । तपाईं आफैं सभापति हुनुभयो भने यो पार्टीलाई कसरी चलाउँछु भन्ने लागेको छ ?

अनभव भएका व्यक्तिहरूले मुलुक बिगारेका छन् । विगतमा जेजस्ता संसदीय विकृति भए, त्यो अनुभव भएकै व्यक्तिबाट भएका हुन् । पजेरो काण्ड मैले गरेको होइन । अनुभव भएकै व्यक्तिबाट भएको हो । अहिले देशमा भ्रष्टाचार र विकृति बढेको ग्राफ आइरहेको छ, त्यो सबै अनुभव भएका व्यक्तिहरूबाट भएका हुन् । मैले एउटा संस्था (धरानको बीपी कोइराला स्वास्थ्य विज्ञान प्रतिष्ठानको उपकुलपति छँदा) लाई विकास गर्न मौका पाएको थिएँ । अहिले किन बिग्रियो र म हुँदा कस्तो थियो भन्ने कुरा तपाईंहरूले हेर्नुहोस् ।

दोस्रो कुरा म केन्द्रीय सदस्य नै हो । मलाई जुनियर हो भन्ने चार्ज पनि लाग्यो । हो, म कहिल्यै सिनियर हो कहिल्यै भन्दिनँ । कोही सिनियर मेरै घर आउनुभयो भने पनि म कुर्सीबाट उठ्दिन्छु । सम्मानसाथ बस्नुहोस् भनेर राख्छु । अनुभव र सिनियर भन्नेले मात्रै हुन्न । राजनीतिक संस्कार पनि चाहिन्छ । राजनीतिमा नैतिकतामा आधारित संस्कार हुनुपर्छ । नैतिकता गुमाउन थाल्यो भने त्यहाँ राजनीति रहन्न । नैतिकता र संस्कार गुमेको पार्टी पार्टी हुन सक्दैन । अहिलेको नेतृत्वले नैतिकता गुमाइसक्नुभएको छ ।

शेरबहादुर देउवासँग देश चलाएको लामो अनुभव र सबैलाई मिलाउन सक्ने क्षमता छ भनेजस्तै तपाईंको पछाडिको बल के हो ?

विचार, टिम र कार्यक्रम नै मेरो पछाडिको बल हो । नयाँ सोच र नयाँ ऊर्जाका साथ पार्टीलाई अघि बढाउन युवालाई अघि लगाउनुपर्छ । युवाको टिमलाई सँगै लैजान सकिएन भने हामी अघि बढ्न सक्दैनौं । युवालाई अघि नबढाई गतिशील कांग्रेस बन्दैन । अनुभव भएका साथीहरू पनि केन्द्रीय सदस्यमा आउनुहुन्छ । रामचन्द्रजी हुनुहुन्छ । अहिलका सभापति हुनुहुन्छ । उहाँहरू सबैलाई साथ लिएर जान्छु । उहाँलाई बेवास्ता गरेर हिँड्न खोजेको छैन । कांग्रेस अब एउटा व्यक्तिको सोचले चल्दैन । सामूहिक सोच र चिन्तनलाई अघि बढाउन खोजेको छु । रामचन्द्रजीप्रति हाम्रो त्यत्तिकै सम्मान हुन्छ । उहाँ सम्मानित व्यक्ति हो । शेरबहादुरजीको पनि उत्तिकै अनुभव छ । अनुभवका राम्रा पक्षलाई हामी लिन्छौं ।

तपाईंको पछाडि रहेका युवाले विचार र सपनासँग तपाईंको गति कत्तिको मेल खान्छजस्तो लाग्छ ?

मैले नेतृत्व गरेको टिममा उपसभापतिमा धनराज गुरुङ र चन्द्र भण्डारी हुनुहुन्छ । उहाँहरू भ्रष्टाचारविरुद्धको मिसनमा हिँड्नुभएको छ । जवाफदेहिता, पारदर्शिता, उत्तरदायित्वलाई साथ लिएर हिँड्ने हाम्रो प्रण छ । महामन्त्रीमा गगनजी, मीनेन्द्रजी, दिलेन्द्रजी हुनुहुन्छ । पदाधिकारीमा सबै युवा हुनुहुन्छ । कोही दुई, कोही तीनचोटि केन्द्रीय सदस्य बनिसकेको हुनुहुन्छ । हाम्रो भावना र गति मिलेकै कारणले त यो टिम बनेको हो ।

सभापति हुँदा यस्तो कांग्रेस बनाउने भन्ने तपाईंको आफ्नै योजना के छ ?

गतिशील र ऊर्जाशील कांग्रेस बनाउने नै मेरो योजना हो । नयाँ विचार र कार्यक्रमको सोच लिएर अघि बढेका छौं । त्यसलाई मूर्तरूप दिन खोजेका छौं । मैले सातवटा संकल्प पनि अघि सारेको छु । संविधानको कार्यान्वयन मेरो पहिलो प्र्राथमिकता छ । अहिले संघीय गणतन्त्रमाथि नै धावा बोलिँदै छ । धरापमा पार्न खोजिएको छ । संविधानको बलियो कार्यान्वयनले मात्रै यो परिवर्तनलाई स्थायित्व दिन सकिन्छ । अहिलेको नेतृत्वमा वैचारिक स्पष्टता छैन । राष्ट्रियताका बारेमा प्रस्ट दृष्टिकोण छैन । समाजवाद भनिएको छ, तर ‘भेग’ छ । नेपाललाई सुहाउँदो के ठीक हुन्छ, त्यसैलाई हामीले लिएर अघि बढ्नुपर्छ । जस्तो– शिक्षा र स्वास्थ्यमा हाम्रो प्राथमिकता हुनुपर्छ । पार्टी संगठनलाई ऊर्जाशील बनाउन भ्रातृ संस्था र शुभेच्छुक संस्थालाई क्रियाशील बनाउनुपर्छ । भ्रातृ संस्थाहरू क्रियाशील नभई पार्टीको संगठन अघि बढ्न सक्दैन । कुनै पनि भ्रातृ संस्थाको अधिवेशन वर्तमान नेतृत्वले गर्न सकेन । गुटको मानिस भेला हुने, भागबन्डा गर्ने र त्यसैका आधारमा चलाउने गरियो । भागबन्डा र गुटको अन्त्य गर्ने मेरो संकल्प छ । अनुभव र ऊर्जाको संम्मिश्रण नै मेरो शक्ति हो । त्यसलाई साथ लिएर अघि बढ्छु ।

तपाईंले ‘एकपटक, यसैपटक’ भन्ने नारा बनाउनुभएको छ । किन ?

मैले अहिले मात्रै होइन, सुशील कोइराला सभापति छँदा पनि भनेको विषय हो । सुशीलदाले, दोस्रोपटक पनि सभापति उठ्ने निधो गरिसक्नु भएको थियो । तर, म त्यसविरुद्ध थिएँ । मैले दोस्रोपटक रामचन्द्रजीलाई साथ दिएर हिँडेको थिएँ । सुशीलदा मसँग रिसाउनुभयो । मैले कान्तिपुर हेडलाइनरमा अन्तर्वार्ता दिँदै केन्द्रीय सभापति एक पटक मात्रै उठ्नुपर्छ भनेर सार्वजनिक रूपमै भनिदिएँ । एकपटक मात्रै सभापति हुने अवस्था बनेन भने गुटबन्दी सुरु हुन्छ भनेको थिएँ । त्यस बेलादेखि आजको दिनसम्म पनि म आफ्नो बोलीमा अडिग छु । म जे बोल्छु, त्यसलाई पालना गरेरै छाड्छु । त्यसैले मैले ‘एकपटक, यसैपटक’ भन्ने नारा ल्याएको हो । यो मेरो अन्तरआत्माले बोलेको हो, हचुवाको भरमा होइन ।

सभापति भएपछि प्रधानमन्त्री नबन्ने भन्नुभएको छ । यो पनि लागू हुन सक्ला त ?

अहिले पनि भन्दै छु, म लागू गर्छु । विश्वास दिलाउन चाहन्छु । त्यसमा ढुक्क हुनुहोस् । यसमा कुनै द्विविधा राख्नुपर्ने अवस्था छैन । कांग्रेसमा पार्टी संगठित भयो, राम्रो हुँदै गयो भने पछि पार्टी सभापति नभए पनि प्रधानमन्त्री बन्न सकिन्छ । पार्टीको संगठन नै राम्रो भएन भने प्रधानमन्त्री बन्न धेरै कुरा मिल्नुपर्छ । गुटबन्दी हुन्छ ।

तपाईंको आफ्नै समूह एक ठाउँमा उभिन सकेको छैन । कोइराला परिवार पनि विभाजित बन्न पुगेको छ । यस्तो अवस्थामा तपाईंले आफूलाई कसरी बलियो उम्मेदवार मान्नुहुन्छ ?

बलियो त कार्यकर्ताले बनाउने हो । कार्यकर्ताको उत्साह र उमंग नेतृत्व परिवर्तनप्रति छ । हो, हाम्रो समूहमा समस्या नउठेको होइन । समस्या आउँदैन भन्ने पनि होइन । सुरुमा त रामचन्द्रजीलाई अभिभावक भएर बसिदिनुहोस् भनेर मैले नै भनेको हो । उम्मेदवार मनोनयनको नजिक आउँदा मैले उहाँलाई सहमतिको उम्मेदवार हुनुभयो भने मलाई आपत्ति छैन, म छाडिदिन्छु भनेको हो । अन्तिम पटक पनि रामचन्द्रजीले अहिले म बसिरहेकै कुर्सीमा बसेर मेरो नाममा सहमति गरौं भनेर भन्नुभयो । मैले मानेकै हो । प्रकाशमानजीले स्वीकार गर्नुभएन । प्रकाशमानजीले नमानेपछि रामचन्द्रजीलाई उठ्न राम्रो हुन्न भन्ने मेरो सुझाव थियो । रामचन्द्रजी हाम्रो सम्मानित नेता हो । देशको परिस्थिति एकदमै नाजुक छ । अहिलेको सरकारले पनि काम गर्न सकेको छैन । न्यायपालिका त्यस्तै हालतमा छ । संविधान धरापमा पर्छ कि भन्ने चिन्ता छ । कोही न कोही एउटा व्यक्ति बाहिर हुँदा राम्रो हुन्छ । जस्तो गणेशमानजीले बाहिर बसेर लड्नुभएको थियो । त्यस्तै रामचन्द्रजीले पनि बाहिर बसेर देश र पार्टीभित्रका विकृति, विसंगति लड्नुभयो भने राम्रो हुन्छ भनेर मैले भनेको हो । प्रकाशमानजीले नछाडेपछि त्यसो भए म उठ्दिन भन्नुभयो । यसलाई उहाँले अन्यथा लिनुभएको छ भने म क्षमा माग्छु । उहाँ यति सम्मानित व्यक्तित्व हुनुहुन्छ कि, मलाई कुरा गर्न पनि अहिले अप्ठ्यारो भइरहेको छ ।

तपाईंकै समूहबाट सभापतिमा प्रकाशमान सिंहको पनि उम्मेदवारी छ । त्यसलाई कसरी लिनुभएको छ ?

म पहिलो चरणमै सफल हुन्छु भन्ने विश्वासमा छु ।

त्यसका आधार के छन् ?

कार्यकर्ताको बडी ल्याङ्वेजले मेरो आत्मविश्वास बढाएको छ । मनोनयनमै उपस्थित मेचीमहाकालीका साथीहरूको मप्रति जुन विश्वास देखें, त्यही नै मेरो मुख्य आधार हो ।

शेरबहादुर देउवाले आफूले जित्न नसके गठबन्धनको सरकार जान्छ, फेरि ओलीको शासन सुरु हुन्छ भन्नुभएको छ नि ?

देशका प्रधानमन्त्री र पार्टीका सभापति यति निरीह हुनुहुन्छ भन्ने मैले कल्पना नै गरेको थिइनँ । उहाँ हावादारी र गलत कुरा भनिरहनुभएको छ । झूटको खेती गर्दै हुनुहुन्छ । उहाँको नेतृत्व जाँदै छ । हाम्रो टिमले जितेपछि यो सरकार, यो गठबन्धन अझै सुदृढ हुन्छ । गठबन्धनलाई आगामी चुनावसम्मै लैजान्छौं । यहाँ गठबन्धन रहने–नरहने कुरा शेरबहादुरजीले किन गरिरहनुभएको हो ? कांग्रेसको महाधिवेशनमा प्रचण्ड र माधव नेपालले भोट दिने हो र ?

प्रकाशित : मंसिर २७, २०७८ ०७:००
प्रतिक्रिया
पठाउनुहोस्

नेतृत्व छान्दै कांग्रेस पंक्ति

महाधिवेशन प्रतिनिधिले आज चयन गर्ने नेतृत्वले तीन तहका आगामी निर्वाचनमा कांग्रेसको अगुवाइमात्र गर्ने छैन, आगामी ५ वर्षसम्म देशकै राजनीति प्रभावित गर्नेछ 
कुलचन्द्र न्यौपाने

काठमाडौँ — कांग्रेसको नयाँ नेतृत्व चयनका लागि ४ हजार ७ सय ४३ महाधिवेशन प्रतिनिधिले सोमबार मतदान गर्दै छन् । उनीहरूको मतबाट सभापति, २ उपसभापति, २ महामन्त्री, ८ सहमहामन्त्रीसहित १३ पदाधिकारी र १ सय २१ सदस्य निर्वाचित हुनेछन् । यही टिमले आगामी तीन तहका निर्वाचनमा कांग्रेसको नेतृत्व गर्नेछ भने पाँच वर्षसम्म नेपाली राजनीतिलाई प्रभावित गर्नेछ । 

शीर्षस्थ नेतृत्वका लागि शेरबहादुर देउवा र शेखर कोइरालाबीच मुख्य प्रतिस्पर्धा देखिएको छ । तर प्रकाशमान सिंह र विमलेन्द्र निधिको उम्मेदवारीले प्रतिस्पर्धालाई पेचिलो बनाएको छ । सभापतिका कुनै पनि उम्मेदवारले ५० प्रतिशत मत कटाउन नसकेमा शीर्ष दुईबीच प्रतिस्पर्धा हुनेछ । त्यसैले सिंह र निधि पहिलो चरणलाई अनिर्णीत बनाउन सके दोस्रो चरणमा आफूहरूको भूमिका सार्थक हुनेमा आशावादी छन् ।

निर्वाचन परिणाम आफ्नो पक्षमा पार्न देउवा र कोइरालाले धारिलो प्रचारप्रसार गरिरहेका छन् । प्रतिनिधिहरूले खाना खाइरहेकै स्थलमा पुगेर आइतबार देउवाले हात जोड्दै भोट मात्रै मागेनन्, प्लास्टिकको कुर्सीमा बसेर खाना खाए । अघिल्लो महाधिवेशनमा पनि उनले हरेक प्रतिनिधिलाई व्यक्तिगत रूपमा पत्र लेखेर मत मागेका थिए

तस्बिर : रासस

देउवाले कांग्रेसको निर्वाचनले देशको राजनीतिलाई नै मोड दिने भएकाले स्थायित्वका लागि मतदान गर्न प्रतिनिधिलाई आह्वान गरेका छन् । पार्टी नेतृत्वमा आफूले निरन्तरता पाए मात्रै वर्तमान सत्ता गठबन्धनले निरन्तरता पाउने र कांग्रेसले स्थानीय तहदेखि केन्द्रसम्ममा बहुमत ल्याउने दाबी उनको छ ।

‘सभापति र प्रधानमन्त्री एउटै नभए त्यसले पार्टी र सरकारभित्रै अस्थिरता ल्याउँछ, सभापतिमा हारेको प्रधानमन्त्रीको नेतृत्वमा निर्वाचनमा जाने होइन, जितेका प्रधानमन्त्रीको नेतृत्वमा उच्च मनोबलका साथ जानुपर्ने हुन्छ,’ उनको भनाइ छ, ‘फेरि केन्द्र, प्रदेश र स्थानीय तहमा सरकार बनाएर कांग्रेसलाई पुरानै अवस्थामा ल्याउन सफल हुनेछ ।’

देउवाको यो भनाइलाई प्रतिस्पर्धी कोइरालाले खरो प्रतिवाद गरेका छन् । उनले आफ्नो टिमले जितेपछि पनि वर्तमान गठबन्धन चुनावसम्मै बचाएर लग्ने प्रतिबद्धता व्यक्त गरे । ‘देशको प्रधानमन्त्री र पार्टीका सभापति यति निरीह हुनुहुन्छ भन्ने मैले कल्पनै गरेको थिइनँ । उहाँले हावादारी र गलत कुरा भनिरहनुभएको छ,’ कोइरालाले कान्तिपुरसँग भने, ‘देउवाको नेतृत्व अब जाँदै छ । हाम्रो टिमले जितेपछि यो सरकार, यो गठबन्धन अझै सुदृढ हुन्छ, गठबन्धनलाई हामी आगामी चुनावसम्मै लैजान्छौं ।’

नेपाली कांग्रेसको चौधौं महाधिवेशनअन्तर्गत सोमबार हुने मतदानका लागि राष्ट्रिय सभागृहमा मतदानस्थल तयार गरिँदै । तस्बिर : हेमन्त श्रेष्ठ/कान्तिपुर

पहिलो चरणमा विजयी हुन नसके दोस्रो चरणमा झनै जोखिम हुने ठानेरै देउवाले मैदानमै उत्रिएर मत मागेको कांग्रेस नेताहरूको भनाइ छ । देउवालक कोइरालालाई पनि आफ्नो टिममा राख्न अन्तिमसम्म प्रयास गरेका थिए । उनको यो प्रयास असफल भए पनि सम्मानजनक स्थान दिएर सिटौलाको टिमलाई समेटेका छन् । देउवा टिमबाट महामन्त्रीका दाबेदार बालकृष्ण खाँण, ज्ञानेन्द्रबहादुर कार्की, एनपी साउद, रमेश लेखकले केन्द्रीय सदस्यमा मनोनयन दिएका छन् । ‘तपाईंहरूले मलाई महामन्त्रीका रूपमा हेर्नुभएको थियो । तर विविध कारणले हुन सकिनँ,’ कमलपोखरीको अग्रवाल हाउसमा आयोजित देउवा टिमको कार्यक्रममा खाँणले भने, ‘अब म केन्द्रीय सदस्य नै भएर काम गर्छु ।’ कार्यक्रममा साउद र लेखक भने उपस्थित थिएनन् । असन्तुष्टिबीच पनि सहयोगीहरूले सार्वजनिक रूपमा केही नभनेकाले देउवा जितप्रति विश्वस्त छन् ।

सभापतिका प्रत्याशी कोइरालाले पनि जितप्रति उत्तिकै विश्वास व्यक्त गरेका छन् । कांग्रेस पंक्तिले देउवाको कार्यकाल भोगिसकेकाले अब युवा जोस र जाँगर भएको आफ्नो टिम स्वाभाविक जिम्मेवारीमा आउनेमा उनको भनाइ छ । यद्यपि देउवाको विकल्प खोज्नुपर्छ भन्ने समूहबाट सिंहको उम्मेदवारीले आफ्नोमात्र होइन, देउवाको पनि मत घट्ने उनको आकलन छ । ‘काठमाडौंमा अहिले प्रकाशमानलाई जाने भोट उनी नउठेको भए देउवालाई पनि जान्थ्यो, त्यसैले प्रकाशमानको उम्मेदवारीले घाटामात्र भएको छैन,’ उनको टिमको यही निष्कर्ष छ ।

आफ्नो समूहबाट साझा उम्मेदवार तय गर्न नसकिएको भन्दै चित्त दुखाएका रामचन्द्र पौडेल निवासमा बसिरहेका छन् । शेखरले भने पौडेललाई उम्मेदवार बनाउन आफू तयार हुँदा पनि प्रकाशमानका कारण सम्भव नभएको बताएका छन् । ‘म त तयार नै थिएँ, तर प्रकाशमानजीले किन मान्नु भएन, थाहा भएन,’ उनले भने, ‘मबाट अन्यथा भएको भए माफी माग्न चाहन्छु । रामचन्द्रजी हाम्रो सम्मानित नेता हो । अहिले उहाँसँग कुरा गर्न पनि मलाई अप्ठ्यारो लागिरहेको छ,’ कोइरालाले भने ।

देउवाले पार्टी नेतृत्वमा आफूले निरन्तरता पाए मात्रै वर्तमान सत्ता गठबन्धनले निरन्तरता पाउने र कांग्रेसले स्थानीय तहदेखि केन्द्रसम्ममा बहुमत ल्याउने दाबी गरेका छन् । सभापति र प्रधानमन्त्री एउटै नभए त्यसले पार्टी र सरकारभित्रै अस्थिरता ल्याउने पनि उनको भनाइ थियो । ‘सभापतिमा हारेको प्रधानमन्त्रीको नेतृत्वमा निर्वाचनमा जाने होइन, जितेका प्रधानमन्त्रीको नेतृत्वमा उच्च मनोबलका साथ जानुपर्ने हुन्छ, हाम्रो विधानले सभापतिको दुई कार्यकालको व्यवस्था पनि गरेको छ,’ उनले भने, ‘अब निर्वाचनपछि फेरि केन्द्र, प्रदेश र स्थानीय तहमा सरकार बनाएर कांग्रेसलाई पुरानै अवस्थामा ल्याउन सफल हुनेछ । त्यसका लागि सभापतिमा मलाई र मेरो टिमलाई जिताउनुहोस् । मेरो टिममा परिपक्व नेता पनि छन् । युवा पनि छन् । यसलाई जिताएर जानुपर्छ ।’

पौडेल र शशांक आफ्नै कित्तामा रहेको उनको दाबी छ । ‘यो टिम उहाँहरूकै मार्गदर्शनबाट बनेको हो, यसलाई जिताउन रामचन्द्रजी र शशांक दुवै जुट्नुभएको छ,’ उनले भने, ‘कार्यकर्ताको उत्साह देख्दा पहिलो चरणमै आफ्नो टिम विजयी हुने मैले देखिरहेको छु ।’ देउवा र कोइराला पहिलो चरणमा विजयी हुने कोसिसमा रहेका बेला सभापतिकै प्रत्याशी निधिले भने पहिलो चरणमा कसैले पनि जित्न नसक्ने दाबी नै गरेका छन् ।

‘पहिलो चरणमा कसैले पनि प्रतिशत पुर्‍याउन सक्दैन, दोस्रो चरणको चुनावमा म, शेखर र प्रकाशमान मिलेर नयाँ नेतृत्व चयन हुन्छ । हामीमध्ये जो बने पनि संस्थापनइतर समूहकै नेता सभापति बन्ने हो,’ भृकुटीमण्डपमा मत मागिरहेका निधिले सञ्चारकर्मीसँग भने । सिंहले भने सभापतिका लागि दोस्रो चरणको निर्वाचन भए कसलाई समर्थन गर्ने मुख खोलेका छैनन् ।

प्रकाशित : मंसिर २७, २०७८ ०६:४७
पूरा पढ्नुहोस्
प्रतिक्रिया
पठाउनुहोस्
×