रागिनी कलाका ‘४५ वर्ष’ प्रदर्शनीमा

काठमाडौँ — कलाकार रागिनी उपाध्याय आफ्नो कला–अध्यन, सिकाइ र व्यवसायिक कार्यकौशलको ४५ वर्षे अवधिमा सिर्जना गरिएका चित्रकलाको प्रतिनिधिमूलक प्रदर्शनीमा व्यस्त रहेकी छन् ।

सन् १९७८ मा लखनउ कलेज अफ आर्ट्समा कला विद्यार्थी हुँदाका पेन्सिल स्केचदेखि पछिल्लो कोभिड संक्रमणकालको स्वास्थ्य सचेतना तथा असुरक्षा केन्द्रित चित्रहरु पनि समेटिएका छन् ।

नेपाल आर्ट काउन्सिल बबरमहलमा जारी रहेको प्रदर्शनीमा सहभागिता जनाउन लखनउ कलेज अफ आर्टका पूर्व प्राचार्य प्रोफेसर जयकृष्ण अग्रवालसमेत आएका छन् । रागिनीले अग्रवालसँग सन् १९७८–८२ मा प्रिन्ट–मेकिङ आर्ट सिकेकी थिइन् ।

‘कला क्षेत्रमा आउने विद्यार्थी र सरोकार राख्ने सबैलाई एउटा कलाकारको सुरुवाती क्षणदेखि आजसम्मको निरन्तरता तथा प्रतिबद्धता देखाउन मैले यो ४५ वर्षको अवधिलाई समेटेकी हुँ,’ कलाकार उपाध्यायले भनिन्, ‘मैले आफ्नो कलाकर्म मार्फत लैङ्गिक सशक्तिकरण र सामाजिक न्यायको सन्देशलाई प्रतिक–बिम्बमार्फत देखाउन चाहेकी छु ।’

४५ वर्षअघि पेन्सिल–स्केचबाट कलायात्रा सुरु गरेकी रागिनीले त्यसबेलाको कला मूल्य १० हजार रुपैयाँ न्यूनतम तोकेकी छन् भने कोभिडकालका ‘लकडाउन किस’ जस्ता अर्थपूर्ण एक्रेलिक चित्रको मूल्य ६ लाख रुपैयाँसम्म राखेकी छन् ।

नेपाल ललितकला प्रज्ञा प्रतिष्ठानकी पूर्वकुलपतिसमेत रहेकी ६३ वर्षीया रागिनी आफ्नो कलाकर्ममा प्राय: हिन्दू देवीदेवताका मिथकीय अर्थ र बिम्बमा खेल्न रुचाउँछिन् । ‘रागिनीको प्रतिनिधिमूलक प्रदर्शनीले एउटा कलाकार र कला स्वयंको लामो यात्राको आरोह–अवरोह सम्झाएको छ,’ पोखराबाट काठमाडौंमा कलाका उत्सवहरु हेर्न आएका कलाकार बुद्धि गुरुङले भने, ‘रागिनीले कलाकर्ममा प्रयोग गरेको विषय र सन्देश निकै अर्थपूर्ण लाग्यो ।’ सिद्धार्थ आर्ट ग्यालरीले आयोजना गरेको प्रदर्शनी चैत १८ सम्म चल्नेछ ।