गण्डकी — मिस नेपाल २०२३ का दुई वटा विधाअन्तर्गतका फाइनल पोखरामा हुने भएको छ । यसअघिका प्रतियोगिता काठमाडौं केन्द्रित भएको आरोप लागेको भन्दै आयोजक हिडन ट्रेजरले दुई प्रमुख विधाका फाइनल पोखरामै गर्ने जनाएको हो । 

ट्रेजरका निर्देशक प्रमोद कंसाकारले वैशाख १५ गते पोखरामा दुई विधाका फाइनल गराइने जनाएका छन् । ‘अन्तिम २४ प्रतिस्पर्धीलाई पोखरा ल्याएर फाइनल गराउने सोच छ । योसँगै हामी पहिलो पटक काठमाडौं बाहिर मिस नेपालको इभेन्ट गर्नेछौं,’ उनले भने । पोखरामा पहिलो पटक हुन लागेको अडिसनबारे जानकारी दिन सोमबार आयोजित कार्यक्रमका क्रममा कंसाकारले त्यसको तयारीका लागि मिस नेपालको ताज पोखरा ल्याइएको पनि जनाए ।

बुधबार हुने पोखरा अडिसनका लागि आयोजकले मंगलबार अभिमुखीकरण गर्दै छ । ‘प्रतियोगिता साँघुरो भएको, काठमाडौंमा मात्रै केन्द्रित भयो भन्ने आरोप लाग्ने गरेको छ । यसकारण क्षेत्रीय अडिसन गर्न लागेका हौं,’ हिडन ट्रेजरका निर्देशक सुवर्ण क्षत्रीले भने । हिडन ट्रेजरले मिस नेपाल २०२३ का लागि आवेदन खुला गरिसकेको छ । चैत १ सम्म आवेदन खुला रहने बताइएको छ । मिस नेपालमा ५ फिट ३ इन्च उचाइका १८ वर्षदेखि २७ वर्षसम्मका अविवाहित युवतीले आवेदन दिन सक्छन् । यस वर्ष मिस नेपाल वर्ल्ड, मिस नेपाल अर्थ र मिस नेपाल इन्टरनेसनल गरी ३ मुख्य विधा राखिएको छ । मिस नेपाल २०२३ को फाइनल भने ललितपुरको सनराइज कन्भेन्सन सेन्टरमा गरिँदै छ ।