शैली थिएटरले १४ औं राष्ट्रिय बाल नाटक महोत्सव गर्दै

कोरोना महामारीका कारण दुई वर्ष भर्चुअल रुपमा बाल नाटक महोत्सव सम्पन्न गरेको शैलीले यस वर्ष भने भौतिक उपस्थितिमै महोत्सव गर्न लागेको महोत्सव संयोजक तथा रंगकर्मी सविन न्यौपानेले जानकारी दिए । उनका अनुसार रातोपुलस्थित शैली थिएटर र कमलपोखरीस्थित रुसी सदनमा महोत्सव माघको अन्तिम हप्तामा वा फागुन महिनाको दोस्रो हप्तामा सुरु भएर १० दिनसम्म जारी रहनेछ ।

शैलीले महोत्सवमा सहभागिता जनाउन व्यक्ति, संस्था, नाट्य समूह तथा विद्यालयलाई पुस २५ गतेसम्मका नाटकको आलेख(स्कृप्ट) बुझाउन आह्वान गरेको छ । सहभागिताका लागि भौतिक रुपमा शैली थिएटर र रुसी सदनमा तथा शैलीको आधिकारिक इमेलमा वा अनलाइन माध्यमबाट नाटकको आलेख पठाउन सकिने बताइएको छ । यसका लागि दर्ता शुल्क दुई हजार रुपैयाँ तोकिएको छ ।

संयोजक न्यौपानेले महोत्सवमा सहभागिता जनाउन प्रतियोगी र अप्रतियोगी दुई किसिमले सहभागी हुन सक्ने बताए । उनका अनुसार बालबालिकाको विषयमा समेटिएको र यसभन्दा अघि मञ्चन वा प्रकाशित भएका नाटकसमेत महोत्सवमा समावेश गराइनेछ । जुनसुकै उमेर समूहले अभिनय गर्नसक्ने नाटक एकल वा समूहगत रुपमा कम्तीमा ३० मिनेट र बढीमा ७० मिनेट समयावधिको हुनुपर्नेछ । एउटा नाटकमा पर्दा अगाडि र पछाडि गरी बढीमा १५ जना सम्मको समूह मात्र सहभागी हुन पाइने छ । त्यस्तै नाटकको आलेख जुनसुकै भाषामा दर्ता गर्न सकिए पनि नेपालभित्र बोलिने मातृभाषामा भएका नाटकका आलेख छनोटमा प्राथमिकतामा राखिनेछ । भाषाविहीन नाट्य प्रस्तुतिको हकमा भने पूर्ण विवरण सहितको कथासारलाई आलेखको रुपमा दर्ता गराउन सकिनेछ ।

थिएटरका अनुसार राष्ट्रिय अखण्डतामा आँच पुर्‍याउने तथा राज्यको नीति नियम विपरीतको आलेख महोत्सवका लागि स्वीकार्य नहुने बताइएको छ । नाटकमा सहभागी समूह तथा कलाकारहरुले बालबालिकाको मानोविज्ञान र नैतिक आचरणमा नकारात्मक असर पार्ने कुनै पनि भाषिक र विषयगत कुराको अभ्यास गर्न पाउने छैनन् ।

शैलीको छनोट समितिले अन्तिम मितिसम्म प्राप्त भएका नाटकका आलेखहरु प्रतियोगी र अप्रतियोगी गरी विभाजन गररे ५ देखि १० दिन भित्रमा सार्वजनिक गर्नेछ । छनोट भएका नाटकका मञ्चनका लागि आवश्यक मञ्च, ध्वनि उपकरण, प्रकाश तथा आयोजकसँग उपलब्ध नाट्य सामग्रीहरू निःशुल्क उपलब्ध गराइनेछ ।

महोत्सव समापनसँगै उत्कृष्ट नाटक, उत्कृष्ट अभिनेता (महिला, पुरुष), उत्कृष्ट निर्देशक, प्रोत्साहन पुरस्कार, पब्लिक च्वाइस पुरस्कार गरी क्रमशः १०, ७ र ५ हजार रुपैयाँ नगद र सम्मानपत्र प्रदान गरिनेछ ।