नेपालका राजनीतिक दलले कलाकारलाई प्रयोग मात्र गरे : कुलपति रायन  - कला - कान्तिपुर समाचार
कान्तिपुर वेबसाईट
AdvertisementAdvertisement

नेपालका राजनीतिक दलले कलाकारलाई प्रयोग मात्र गरे : कुलपति रायन  

कान्तिपुर संवाददाता

काठमाडौँ — नेपाल संगीत तथा नाट्य प्रज्ञा प्रतिष्ठानका कुलपति नारायणभक्त श्रेष्ठ ‘रायन’ले नेपालको राजनीतिक दलले कलाकार र स्रष्टालाई आवश्यक पर्दा प्रयोग मात्र गरेको भन्दै तिक्तता पोखेका छन् । 

संविधान दिवसका सन्दर्भमा हालै नक्सालस्थित प्रतिष्ठानको नवनिर्मित सभाहलमा भएको ‘नेपालको संविधान: नेपाली संगीत, नाट्य, कलाको संरक्षण र संवर्द्धन’ विषयक परिचर्चामा रायनले देश तथा समाज परिवर्तनमा कलाकार र स्रष्टाहरुले उल्लेखनीय भूमिका खेलेको बताए ।

‘देशमा समाज परिवर्तन र अग्रगमनका लागि राजनीतिकर्मीभन्दा ठूलो योगदान स्रष्टा र कलाकारहरूको दिएका छन्’, उनले भने,‘कलाकारहरू देशका गहनाका रूपमा मात्र नभई पाँचौ अंगका रुपमा स्थापित हुन अब सबै स्रष्टा/कलाकारहरु एक जुट भई आवाज उठाउनुपर्छ ।’

रायनको भनाइलाई समर्थन गर्दै नेपालको संविधानमा संगीत, नाट्य कला साहित्यलाई समाहित गर्न कञ्जुस्याइँ गरेको संगीतकार तथा संगीत रोयल्टी संकलन समाजका अध्यक्ष सुरेश अधिकारीले जिकिर गरे । उनले भने,‘संविधान निर्माणका क्रममा गीतकार, संगीतकार संघ तथा रोयल्टी संकलन समाजका स्रष्टा कलाकारहरुले संविधानमा संगीत, नाट्य, कला साहित्यलाई अटाउनुपर्छ भनी पहल गरिएको थियो । तर नीतिनिर्माण गर्ने क्रममा यसप्रति बेवास्ता भयो ।’

उनले देश संघीय संरचनामा गए पनि राज्य भने केन्द्रीय रूपमा नै सीमित हुँदा मौलिक हकका रुपमा रहेको स्रष्टाको बौद्धिक सम्पत्तिको सम्मान हुन नसकेको आशय व्यक्त गरे ।

कार्यक्रमा संविधानविदसमेत रहेका गीतकार भीमार्जुन आचार्यले नेपालको वर्तमान संविधानमा नेपाली संगीत, नाट्य, तथा कलाको संरक्षण र स‌ंवर्द्धनमा के–कस्तो व्यवस्था छ भन्नेबारे उल्लेख गर्दै संविधान निर्माणमा राजनीतिक नेतृत्वले नै बेवास्ता गरेको बताए । आचार्यले नेपालको संविधानमा राज्यको निर्देशन सिद्धान्तमा धर्म, संस्कृति, संस्कार जस्ता पदावलीको प्रयोग भए पनि संगीत, नाट्य, साहित्यलाई छुट्टै धाराको व्यवस्था नरहेको प्रस्ट्याए ।

प्रकाशित : आश्विन ४, २०७९ १७:१३
प्रतिक्रिया
पठाउनुहोस्

जलविद्युत् र पर्यटनमा लगानी भित्र्याउन प्रधानमन्त्री देउवाको आग्रह

रासस

काठमाडौँ — प्रधानमन्त्री शेरबहादुर देउवाले नेपालको जलविद्युत्‌, पर्यटन र अन्य सम्भावित क्षेत्रमा इन्डोनेसियाको लगानी भित्र्याउने काममा सहजीकरण गर्न नेपालका लागि इन्डोनेसियाका राजदूतलाई आग्रह गरेका छन् ।

प्रधानमन्त्री देउवासँग मंगलबार शिष्टाचार भेट गर्न प्रधानमन्त्री निवास बालुवाटार पुगेका नेपालका लागि इन्डोनेसियाका राजदूत हेरु हारतान्तो सुबोलोसँगको भेटमा प्रधानमन्त्री देउवाले सो आग्रह गरेका हुन् ।

'प्रधानमन्त्रीज्यूले पर्यटन, जलविद्युत् तथा अन्य सम्भावित व्यवसायमा इन्डोनेसियाको लगानी भित्र्याउन र नेपालको हिमाली पर्यटनलाई इन्डोनेसियाका पर्यटकबीच प्रवर्द्धन गर्न आग्रह गर्नुभयो,' प्रधानमन्त्रीलाई उद्धृत गर्दै भेटमा सहभागी नेपालका लागि इन्डोनेसियाका अवैतनिक वाणिज्यदूत एवं नेपाल उद्योग वाणिज्य महासंघका वरिष्ठ उपाध्यक्ष चन्द्रप्रसाद ढकालले बताए ।

सो अवसरमा प्रधानमन्त्री देउवाले नेपालमा गणतन्त्र इन्डोनेसियाको आवासीय दूतावास स्थापनाका लागि इन्डोनेसियाको सरकारलाई आग्रह पनि गरे । प्रधानमन्त्री देउवाले शान्तिका अग्रदूत गौतम बुद्धको जन्मभूमि नेपाल भ्रमणका लागि राजदूत सुबोलोमार्फत इन्डोनेसियाली जनतालाई आग्रह गरेको ढकालले जानकारी दिए ।

भेटमा नेपालका लागि गणतन्त्र इन्डोनेसियाका राजदूत सुबोलोले नेपालमा आवासीय दूतावास स्थापनाका लागि आफू सकारात्मक रहेको र प्रधानमन्त्रीको यो सन्देश इन्डोनेसियाली सरकारसमक्ष पुर्‍याउने बताए ।

राजदूत सुबोलोले कूटनीतिक तथा सरकारी राहदानीबाहकलाई भिसा सहजीकरणका लागि दुई देशबीच छिट्टै सम्झौता हुने बताए । आगामी अक्टोबरमा इन्डोनेसियामा आयोजना हुने ‘ट्रेड एक्स्पो’ प्रवर्द्धनका क्रममा राजदूत सुबोलोले नेपाल र इन्डोनेसियाबीच द्विपक्षीय व्यापार तथा लगानीका लागि भूमिका निर्वाह गर्ने बताए ।

प्रकाशित : आश्विन ४, २०७९ १७:०५
पूरा पढ्नुहोस्
प्रतिक्रिया
पठाउनुहोस्
×