भ्रष्टाचारविरुद्ध कार्टुन प्रदर्शनी- कला - कान्तिपुर समाचार
कान्तिपुर वेबसाईट
AdvertisementAdvertisement

भ्रष्टाचारविरुद्ध कार्टुन प्रदर्शनी

चित्रांग थापा

धनगढी — कार्टुनिस्ट क्लव अफ नेपालको आयोजनामा शुक्रबार धनगढीमा भ्रष्टाचारविरुद्ध र सदाचारको पक्षमा सन्देश प्रवाह गर्न 'निसाना' शिर्षकमा कार्टुन प्रदर्शनी भएको छ । शनिबारसम्म सञ्चालन हुने प्रदर्शनीमा नेपालका अग्रज र नयाँ पुस्ताका गरी ३६ जना कार्टुनिस्टका ५० कार्टुन प्रदर्शन गरिएको छ ।

पहिलो पटक राजधानी काठमाडौं बाहिर सातै प्रदेशमा यस प्रकारको प्रदर्शनी गरिएको कार्टुनिस्ट क्लव अफ नेपालका निवर्तमान अध्यक्ष अविन श्रेष्ठले बताए । गत वैशाख ४ गते कामाडौंबाट सुरु भएको प्रदर्शनीको अन्तिम प्रदर्शन शुक्रबार सुदूरपश्चिम प्रदेशको अस्थायी राजधानी धनगढीमा पुगेर समापन हुन लागेको हो ।

कैलालीको जन पुस्तकालयको सभाकक्षमा आयोजित प्रदर्शनीमा क्लवका अध्यक्ष वासु क्षितिजले यसप्रकारको प्रदर्शनी केवल प्रदर्शनी मात्र नभइ भ्रष्टाचारविरुद्धका सिर्जनात्मक अभियानको सुरुवात भएको बताए ।

‘हामीले यस पटक भ्रष्टाचारविरुद्धमा निसाना गरेर यसलाई सांकेतिक रुपमा प्रदर्शनीमा ल्याएका हौं,’उनले भने, ‘यो संकेतलाई वास्तविकतामा उतार्न सम्पूर्ण कार्टुनप्रेमी भ्रष्टाचारविरोधीहरूमा आग्रह पनि गर्दछौं ।’

सुदूरपश्चिम प्रदेशसभाका उपसभामुख निर्मला जोशी बडालले उद्घाटन गरेको प्रदर्शनी हेर्न धनगढीका विभिन्न विद्यालयका विद्यार्थीलगायत नागरिक समाज, राजनीतिक दल र संघसंस्थाका प्रतिनिधिहरू पुगेका थिए ।

प्रकाशित : भाद्र २४, २०७९ १९:४४
प्रतिक्रिया
पठाउनुहोस्

स्वास्थ्य कार्यालय र स्थानीय तहमा लमजुङ प्रथम

आश गुरुङ

लमजुङ — गण्डकी प्रदेश स्वास्थ्य तथा जनसंख्या मन्त्रालयले गरेको कार्यसम्पादन मूल्यांकमा स्वास्थ्यसँग सम्बन्धित लमजुङका २ कार्यालय प्रथम भएका छन् । प्रदेशभित्रका ११ जिल्लामध्ये स्वास्थ्य कार्यालय लमजुङ प्रथम भएको छ ।


एउटा महानगरपालिका, २६ नगरपालिका र ५८ गाउँपालिका गरी जम्मा ८५ स्थानीय तहमध्ये कार्यसम्पादनमा स्वास्थ्य शाखा अन्तर्गत लमजुङकै मध्यनेपाल नगरपालिका प्रथम भएको छ । लमजुङ गण्डकी प्रदेश स्वास्थ्य तथा जनसंख्या मन्त्री मधु अधिकारी गुरुङको गृहजिल्ला पनि हो ।

जिल्ला अस्पतालमा म्याग्दीको बेनी अस्पताल र आयुर्वेदतर्फ धौलागिरि आयुर्वेद औषधालय प्रथम भएका छन् । स्वास्थ्य निर्देशक खिमबहादुर खड्काका अनुसार निर्देशनालयले आर्थिक वर्ष २०७८/०७९ मा सञ्चालित स्वास्थ्य कार्यक्रमहरुको सम्पादनका आधारमा मूल्यांकन गरिएको हो । यसका लागि प्राविधिक कार्य समूह गठन गरिएको र उनीहरुले पेस गरेको प्रतिवेदन मूल्यांकनका आधारमा अवस्था मापन गरिएको थियो ।

मन्त्रालयका अनुसार स्वास्थ्य कार्यालय लमजुङले ८३ दशमलव ८ अंक ल्याएर प्रथम भएको हो । स्वास्थ्य कार्यालय म्याग्दी ८१ दशमलव ३ अंकका साथ दोस्रो भएको छ । स्वास्थ्य कार्यालय नवलपरासी ७९ दशमलव २ अंकका साथ तेस्रो भएको छ ।

अस्पतालतर्फ प्रथम हुने बेनी अस्पतालले ७८ अंक प्राप्त गरेको छ । ७० दशमलब २८ प्रतिशत अंक ल्याएर कास्कीको मातृशिशु मितेरी अस्पताल दोस्रो र जिल्ला अस्पताल पर्व ६९ दशमलब ७० तेस्रो भएका छन् । आयुर्वेद औषधालयतर्फ धौलागिरि आयुर्वेद अस्पताल बाग्लुङ ८१ दशमलब २६ अंकका साथ प्रथम, जिल्ला आयुर्वेद स्वास्थ्य केन्द्र पर्वत ६७ अंकका साथ दोस्रा र जिल्ला आयुर्वेद स्वास्थ्य केन्द्र मुस्ताङ ६४ दशमलब ९७ अंकका साथ तेस्रो भएका छन् ।

कार्य समूह अन्तर्गत गठित उपसमितिका संयोजक रमेशप्रसाद अधिकारीले राष्ट्रिय खोप कार्यक्रम, पोषण, बालरोगको एकीकृत व्यवस्थापन, परिवार नियोजन, मातृ तथा नवजात शिशु स्वास्थ्य सेवा, महिला सामुदायिक स्वास्थ्य स्वयंसेविका, गाउँघर क्लिनिक, क्षयरोग नियन्त्रण, एड्स तथा यौनरोग नियन्त्रण, औलो रोग निवारण, उपचारात्मक सेवा, स्वास्थ्य व्यवस्थापन तथा आपूर्ति व्यवस्थापन कार्यक्रमलगायतको मूल्यांकन गरिएको थियो ।

स्वास्थ्यमन्त्री मधु अधिकारी गुरुङले प्राविधिक समूहको सर्वेक्षण, अध्ययन, अनुसन्धान तथा समग्र अनुगमन मूल्यांकन र सुझावका आधारमा संस्थागत सुधार तथा हौसला प्रदान गर्न कार्यक्रम ल्याइएको बताइन् । उनीहरुलाई बेंसीसहरमा बुधबार आयोजित प्रदेशस्तरीय समीक्षा कार्यक्रममा प्रमाणपत्र वितरण गरिएको थियो । स्वास्थ्य कार्यालय लमजुङका प्रमुख अमर दवाडीले सबै स्वास्थ्यकर्मी, कर्मचारी, सरोकारवाला, नागरिकको साथ सहयोगबाट प्रथम हुन सफल भएको दाबी गरे ।

स्वास्थ्य कार्यक्रम सम्पादनका आधारमा स्थानीय तहमध्ये प्रथम हुन सफल मध्यनेपाल नगरपालिकाले ८७ दशमलव ४ अंक प्राप्त गरेको छ । पर्वतको पैयुँ गाउँपालिका ८६ दशमलव १ अंकले दोस्रा भएका छन् । म्याग्दीको बेनी नगरपालिका ८५ अंकका साथ तेस्रो भएको छ । स्वास्थ्य तथा जनसंख्या मन्त्रालयका सचिव डा. श्रीराम तिवारीले प्रदेश अन्तर्गतको स्वास्थ्य संस्थाले गएका वर्षमा गरेका कार्यसम्पादनभन्दा पछिल्ला कार्य सम्पादनमा प्रगति भएको देखिएको बताए ।

अस्पतालतर्फ प्रथम हुने बेनी अस्पतालले ७८ अंक प्राप्त गरेको छ । ७० दशमलव २८ प्रतिशत अंक ल्याएर कास्कीको मातृशिशु मितेरी अस्पताल दोस्रो र जिल्ला अस्पताल पर्वत ६९ दशमलब ७० तेस्रो भएका छन् । आयुर्वेद औषधालयतर्फ धौलागिरि आयुर्वेद अस्पताल बाग्लुङ ८१ दशमलव २६ अंकका साथ प्रथम, जिल्ला आयुर्वेद स्वास्थ्य केन्द्र पर्वत ६७ अंकका साथ दोस्रा र जिल्ला आयुर्वेद स्वास्थ्य केन्द्र मुस्ताङ ६४ दशमलब ९७ अंकका साथ तेस्रो भएका छन् ।

प्रकाशित : भाद्र २४, २०७९ १९:४१
पूरा पढ्नुहोस्
प्रतिक्रिया
पठाउनुहोस्
×