बालबालिकालाई चित्रकला र गीतसंगीत सिकाउन मेला
काठमाडौँ — बालबालिकालाई चित्रकला तथा गीतसंगीत सिकाउने उद्देश्यले आरम्भ संगठनले काठमाडौंमा मेला आयोजना गरेको छ । टेकुस्थित जनउद्धार सेवा समितिको बालआश्रममा शनिबार आयोजित मेलामा विभिन्न कलाकारको सहयोगमा बालबालिकाहरूले चित्र कोर्नुका साथै गीतसंगीत प्रस्तुत गरेका छन् ।
मेलामा विभिन्न कलाकारले कोरेका चित्रहरू प्रदर्शन गरिने र त्यसको बिक्री तथा चन्दाबाट उठेको रकम बालबालिकालाई गीतसंगीत तथा चित्रकला सिकाउन खर्च गरिने संगठनका सदस्य सुमन मगरले बताए । ‘कार्यक्रममार्फत गीतसंगीत तथा चित्रकलामा रुची हुनेहरूले त्यसबारे सिक्न सक्ने र सिकाउनेलाई पनि रोजगारीको अवसर प्राप्त हुन्छ,’ मगरले भने ।
खासगरी असहाय बालबालिकाका लागि लक्षित गरी आयोजना गरिएको मेला नियमितरुपमा आयोजना गर्दै जाने मगरले जनाए । ‘आगामी दिनमा हामीले राजधानीका विभिन्न स्थानमा यस्ता मेलाहरू गर्ने तयारीमा छौं,’ उनले भने । तत्कालका लागि कम्तीमा पनि तीन महिनामा एउटा कार्यक्रम गर्ने योजना संगठनको छ ।
संगठनले असार १५ गते काठमाडौंको शिवपुरीमा रोपाइँ जात्रा आयोजना गर्ने जनाएको छ । कार्यक्रममा जय महांकाल युवा समूहले असहाय बालबालिकाका लागि नि:शुल्क खाना वितरण गरेको थियो ।
तस्बिर : सुजन गोपाली/कान्तिपुर
प्रकाशित : असार ४, २०७९ २१:२१