पानी जाँदैन खेर- कला - कान्तिपुर समाचार

पानी जाँदैन खेर

रमेशकुमार पौडेल

चितवन — हिमाल पग्लेर नदी बन्छ; नदी गएर समुद्रमा मिसिन्छ । सबै कुरा सामान्य भएमा मात्रै हो नदी समुद्रसम्म सजिलै पुग्ने तर अचेल सबै कुरा सामान्य छैनन् । हिजोआज नदी रोक्ने, छेक्ने, सुकाउने अनेक काम चलेका छन् र नदी समुद्रमा नपुग्दै रोकिएका छन् ।

यो कथा बोकेको नाटक ‘हिउँको पृथ्वी यात्रा’ नारायणगढको नारायणी कला मन्दिरमा मञ्चन गरिएको छ ।

नाटकका पात्र नै तीनवटा नदी छन् । रंगमञ्चमा नदीहरू अगाडि बढ्छन् र हाम्रासामु राख्छन् जीव, जनावर, मान्छे र समाजका कुरा । विकासका लागि हुने विनाशका दृश्यहरू देखा पर्छन् । आदिवासी बस्तीमा खानेपानीको हाहाकार छ । गर्मीले मुसाहरू जमिनभित्र बस्न सक्दैनन् । जंगली हात्तीहरू कराउँदै यताउता भौंतारिन्छन् । माझीले खोलामा माछा मार्दा निकुञ्जको कानुन लाग्छ तर सक्नेले नदी पनि थुनेर ‘विकास’ गरेका छन् ।

शिल्पी थिएटरको प्रस्तुति रहेको ‘हिउँको पृथ्वी यात्रा’ घिमिरे युवराज र अमजद प्रवेजले लेखन निर्देशन गरेको नाटक हो । पवित्रा खड्का, संगीता उराव, झकेन्द्र बीसी, ज्योति पोखरेल, रविन परियार, गोविन्द ओली, हिमाल भुजेल, सुशीला लोहार र ज्याक बराल नाटकका पात्रहरू नदीदेखि समुद्रसम्म, मान्छेदेखि मुसा र माछासम्म बनेर कथालाई अगाडि बढाएका छन् । नाटकले समाज र पर्यावरणको मुद्दालाई उठाएको छ ।

बग्नु नदीको चरित्र हो तर मान्छेहरू नदी बगेको विषयलाई पानी खेर गएको भनेर अर्थ्याउँछन् । नाटकमा नदीको प्रश्न छ ‘के म बग्नु भनेको खेर जानु हो ?’ नदी आफैंले निर्माण गर्ने आफ्नो बाटो भएर बग्न नपाए या नसके भोलि पृथ्वीमा पर्ने असर देखाउन खोजेको छ नाटकले । बगेको नदी अगाडि बढ्न नसकेपछि नाटक सकिन्छ । ‘अब यो नदीलाई कसरी अगाडि बढाउने’ घिमिरे युवराज दर्शकसँग यही प्रश्न गर्छन् ।

प्रकाशित : जेष्ठ ३०, २०७९ १२:२३
प्रतिक्रिया
पठाउनुहोस्

रातारात करका दर हेरफेरबारे एमालेद्वारा अर्थमन्त्रीको स्पष्टीकरण माग

कान्तिपुर संवाददाता

काठमाडौँ — प्रमुख प्रतिपक्षी नेकपा (एमाले)ले कर, भन्सार र राजस्वको दर परिवर्तन कसरी भयो भनेर अर्थमन्त्री जनार्दन शर्माले संसद्‌मा स्पष्टीकरण दिनुपर्ने माग गरेको छ । प्रतिनिधिसभाको सोमबारको बैठकमा एमाले सांसद योगेश भट्टराईले विशेष समय लिएर सञ्चारमाध्यममा आएका विषयमा अर्थमन्त्रीले जवाफ दिनुपर्ने माग गरेका हुन् । 

सांसद भट्टराईले भने, 'विगतका बैठकहरूमा नीति तथा कार्यक्रम र बजेटमाथिको छलफलमा राजस्वका दर, भन्सार र करमा भएका कतिपय प्रावधानमा टिप्पणी गर्दै आएका छौं । आजका सञ्चार माध्यमहरूले उक्त विषयलाई गम्भीरताका साथ उठाएको छ । यसको म सभामुखमार्फत त्यस विषयमा गम्भीर ध्यानाकर्षण गराउन चाहन्छु ।'

सांसदहरूले विद्युतीय सवारी साधनमा किन अन्तःशुल्क लगाइयो, किन भन्सार महसुल बढाइयो लगायतका विषय उठाएको; स्वास्थ्य बिमा किन प्राइभेट कम्पनीलाई दिइँदैछ; जुत्ता र स्यानिटरी प्याडमा कर किन लगाइयो भनेर प्रश्न उठाएको तर सरकारले जवाफ नदिएको भट्टराईको भनाइ थियो ।

'कुनै अमूक व्यक्तिलाई अर्थमन्त्रीले अर्थमन्त्रालयमा बोलाउनुभयो । कार्यकक्षमा भएका अर्थमन्त्रालयका सचिव, राजस्वका सचिव, बजेट शाखा प्रमुखलगायतलाई उहाँले ती व्यक्तिको भनाइ नै आफ्नो भएको भन्नुभयो । मध्यरातमा अर्कै व्यक्तिको माध्यमबाट कर, भन्सार र राजस्वका दरमाथि तलमाथि गर्न खोजेर के गर्न खोजिएको हो,' उनले सोधे, 'पदमा रहँदा वा नरहँदा राज्यका कुनै पनि गोपनियता भंग गरिँदैन भन्ने शपथ खाएका हुन्छौं । बजेट निर्माणको एक प्रक्रिया छ । बजेट निर्माणको १ महिना अगाडिदेखि बजेट शाखामा र अर्थ मन्त्रालयमा कुनै पनि मानिसलाई प्रवेश दिइँदैन तर यो राष्ट्रका नाममा खाएको शपथको खिलाफ हो । यो राष्ट्रघात पनि हो ।' त्यसरी बजेटमा गरिएको हेरफेरले स्वदेशी उद्योग धराशायी भएको उनको भनाइ थियो ।

सञ्चारमाध्यममा आएका ती विषयमा अर्थमन्त्री शर्माले जवाफ दिनुपर्ने भट्टराईको माग थियो । 'अर्थमन्त्रीले यसको स्पष्टीकरण दिनुपर्छ भन्ने माग गर्दछु । यसमा प्रधानमन्त्रीको र सत्तारुढ दलका भनाइ के छ ?,' उनले संसद्को पनि ध्यानाकर्षण हुनुपर्ने बताए ।

प्रकाशित : जेष्ठ ३०, २०७९ १२:१३
पूरा पढ्नुहोस्
प्रतिक्रिया
पठाउनुहोस्
×