कर्णालीमा पहिलोपटक मिस नेपालको अडिसन हुने- कला - कान्तिपुर समाचार
कान्तिपुर वेबसाईट
AdvertisementAdvertisement

कर्णालीमा पहिलोपटक मिस नेपालको अडिसन हुने

कृष्णप्रसाद गौतम

सुर्खेत — मिस नेपालका लागि कर्णाली प्रदेशमा पहिलोपटक अडिसनको आयोजना गरिने भएको छ । कर्णाली प्रदेश राजधानी वीरेन्द्रनगरमा बुधबार र बिहीबार अडिसन गरिने भएको हो ।

नेपालभरिका सुन्दरीहरू सहभागी गराउने गरी कर्णाली प्रदेशबाट पनि प्रतिस्पर्धी छनोट गर्न लागिएको आयोजक द हिडन ट्रेजरले जनाएको छ । आयोजकका अनुसार यो पटकदेखि मिस नेपाल पिजान्टमा केही परिवर्तन गरिएको छ । ‘प्रतियोगीको उचाइ ५ फिट ४ इन्चबाट घटाएर ५ फिट ३ इन्च उचाइको मापदण्ड बनाइएको छ,’द हिडन ट्रेजरका निर्देशक गीरेन्द्रमान राजवंशीले भने, ‘यसै वर्षदेखि प्रतियोगीको उमेर १८ वर्षदेखि २७ वर्ष कायम गरिएको छ ।’ उनका अनुसार यो वर्षको प्रतियोगिताका लागि वैशाख ३१ गतेसम्म आवेदन खुला गरिएको छ । त्यसका लागि नेपालगन्जमा अडिसन सकिएको छ भने शुक्रबारदेखि धनगढीमा र आइतबारदेखि धरानमा अडिसन हुनेछ ।

काठमाडौंमा भने जेठ ३ गते अडिसन हुने उनले जानकारी दिए । छानिएका प्रतियोगीलाई एक महिनाको बन्द प्रशिक्षण दिएपछि फाइनलमा सहभागी गराइनेछ ।

यो वर्ष मिस नेपाल-वर्ल्ड, मिस नेपाल-अर्थ र मिस नेपाल-इन्टरनेसनल गरी ३ वटा मुख्य ‘टाइटल’ रहनेछन् भने कान्तिपुर मिडिया ग्रुपले प्रायोजन गरेको ‘द काठमाडौं पोस्ट मिस इन्टिलेक्चुअल’सहित ७ वटा ‘सबटाइटल’ रहनेछन् । मिस नेपाल इन्टरनेसनल-२०२० सन्ध्या शर्माले कर्णाली चिनाउन पनि सुर्खेतमा पहिलोपल्ट अडिसन आयोजना गरिएको बताइन् । ‘यो यस्तो प्रतियोगिता हो‚ जहाँ जित्नका लागि आए पनि सबै प्रतियोगी हार्नसमेत तयार हुन्छन्,’ उनले भनिन्, ‘म पनि कुनै उपाधि जित्छु भनेर गएकी थिइनँ, केही सिक्नका लागि गएकी थिएँ तर उपाधि जितियो ।’

उनले आफैंले आफैंलाई विश्वास गर्न सके उपाधि धेरै टाढा नभएको बताइन् । ‘म मधेसी समुदायकी युवती, हाम्रो बाउन्डरी भनेको हाम्रो घर हो,’ उनले भनिन्, ‘घरलाई सकारात्मक बनाउन सके समाज आफैं बदलिन्छ ।’ नेपाली समाजले बिस्तारै ‘ग्ल्यामरस’ क्षेत्रबारे बुझ्दै गएको उनको भनाइ छ ।

मिस नेपाल वर्ल्ड-२०१५ इभाना मानन्धरले काठमाडौं र पोखरामा मात्र हुने प्रतियोगिताहरू कर्णाली आउँदा कर्णालीको महत्त्व झल्किएको बताइन् । ‘महिलालाई स्ट्रेन्थ बनाउन पनि यो प्ल्याटफर्म महत्त्वपूर्ण छ । म विदेशमा थिएँ; त्यही दौरानमा अडिसन दिएँ र सेलेक्सन पनि भएँ,’ उनले भनिन्, ‘ताज जितेपछि नेपालकै लागि केही गर्छु भन्ने सोच आयो; फेरि विदेश गएँ ।’ आफूमा क्षमता छ भन्ने आत्मविश्वास भए जुनसुकै परीक्षामा पनि उत्कृष्ट भइने उनको भनाइ छ । उनले यहाँका युवतीले आफ्नो इच्छालाई प्रष्फुटन गर्न सके आगामी मिस नेपाल कर्णालीले पाउन सक्ने बताइन् ।

प्रकाशित : वैशाख २१, २०७९ ११:०८
प्रतिक्रिया
पठाउनुहोस्

सुर्खेत र रुकुममा गठबन्धनको भागबन्डा मिलेन

हुम्ला, दैलेख, जाजरकोट, जुम्ला, हुम्ला, मुगु, कालीकोट र डोल्पामा भने भागबन्डा टुंगिएको छ
कृष्णप्रसाद गौतम

सुर्खेत — कर्णालीमा आइतबार साँझसम्म पनि सत्ता गठबन्धनमा कुरा नमिल्दा सबैजसो जिल्लामा कांग्रेस, माओवादी र एकीकृत समाजवादीका उम्मेदवारले मनोनयन दर्ता गराएका छैनन् । एमालेले पनि केही जिल्लामा मात्र उम्मेदवारको मनोनयन दर्ता गराएको छ । बिहीबारदेखि जारी गठबन्धनको बैठकले आइतबार साँझसम्म सुर्खेत र रुकुम पश्चिमको उम्मेदवारको टुंगो लगाउन सकेको छैन ।

हुम्ला, दैलेख, जाजरकोट, जुम्ला, हुम्ला, मुगु, कालीकोट र डोल्पामा भने भागबन्डा टुंगिएको छ । ‘सुर्खेतको सन्दर्भमा पनि कुराकानी करिबकरिब मिलिसकेको छ,’ गठबन्धन दलको बैठकमा सहभागी एकीकृत समाजवादीका नेता अम्मरबहादुर थापाले भने, ‘अब रुकुम पश्चिमको मात्र कुरा मिल्न बाँकी छ ।’ उनले विवादको जिम्मा मिलाउने जिम्मा शीर्ष नेतालाई दिइएको बताए । ९ स्थानीय तह रहेको सुर्खेतमा २०७४ सालको स्थानीय तहको निर्वाचनमा कांग्रेसले ६ वटामा प्रमुख र ५ वटामा उपप्रमुख जितेको थियो भने रुकुम पश्चिममा माओवादीको एकलौटी जनाधार छ । एउटा पनि पालिका नजितेको कांग्रेसले रुकुममा र माओवादीले सुर्खेतमा भाग माग्दा गठबन्धनमा कुरा मिल्न नसकेको बैठकमा सहभागी एक नेताले बताए ।

सल्यानमा ४ जनाले मात्र उम्मेदवारी दिएका छन् । आइतबार स्वतन्त्रसहित माओवादी केन्द्र, राप्रपा र जनता समाजवादीका १/१ जनाले मात्र सल्यानमा उम्मेदवारी दिए । बाग्चौर नगरपालिकामा प्रमुखका लागि समाजवादीका चित्रबहादुर डाँगी, छत्रेस्वरीमा अध्यक्षका स्वतन्त्रबाट लोकमान खत्री, राप्रपाका मोतीलाल ओली र दार्माको अध्यक्षमा माओवादी केन्द्रका निमबहादुर केसीले मात्र उम्मेदवारी दर्ता गराएको मुख्य निर्वाचन अधिकृतको कार्यालयले जनाएको छ । कालीकोटमा एमालेले ६ वटा स्थानीय तह प्रमुखमा उम्मेदवारी दर्ता गरेको छ ।

सत्ता गठबन्धनले पालिका भाडबन्डा सकेर सोमबार उम्मेदवारी दर्ता गर्ने जनाएको छ । एमालेले खाडाचक्रको प्रमुखमा निवर्तमान नगर प्रमुख जसिप्रसाद पाण्डेलाई दोहोर्‍याएको छ । अन्य पालिकामा नयाँ अनुहारलाई उम्मेदवार बनाएको छ । सान्नीत्रिवेणीमा ब्यासी तिरुवा, नरहरिनाथमा टेकबहादुर बुढा र शुभकालिकामा भरतराज धितालले एमालेबाट अध्यक्षमा उम्मेदवारी दिएका छन् । रास्कोटमा दयाराम सिम्खडा र तिलागुफामा महेन्द्र्रबहादुर शाहीले प्रमुखका लागि मनोनयन दर्ता गरेका छन् । एमाले जिल्ला इन्चार्ज नगिन्द्र शाहीले पचालझरना, पलाता र महाबैमा एमालेले उम्मेदवारी दर्ता नगराएको बताए । गठबन्धनको निर्णय नआउँदै तिलागुफामा भने कांग्रेस नेता शंकरप्रसाद उपाध्यायले उम्मेदवारी दर्ता गराएका छन् ।

जाजरकोटमा १ जनाको मात्र उम्मेदवारी परेको छ । सत्ता गठबन्धनले नलगाड नगरपालिकामा माओवादीलाई टुंगो लगाए पनि नेकपा समाजवादीका सत्यलाल गौतमले प्रमुखमा उम्मेदवारी दर्ता गराएका छन् ।

प्रकाशित : वैशाख १२, २०७९ ०८:२६
पूरा पढ्नुहोस्
प्रतिक्रिया
पठाउनुहोस्
×