फेरि ‘पुतलीको घर’- कला - कान्तिपुर समाचार
कान्तिपुर वेबसाईट
AdvertisementAdvertisement

फेरि ‘पुतलीको घर’

महानगरपालिकाको सहयोगमा वर्ष दिन नाटक देखाउने घोषणा गर्दै गुरुकुलको पुनरागमन भयो भनिए पनि संस्थापकसँग न स्थायी टुंगो छ न त पुरानो समूह
कान्तिपुर संवाददाता

काठमाडौँ — आरोहण गुरुकुलले ‘पुतलीको घर’ नाटकमार्फत् रंगमञ्चमा औपचारिक पुनरागमन गरेको छ । थापागाउँस्थित कुञ्ज नाटकघरमा शुक्रबार औपचारिक शुभारम्भसहित गुरुकुलले मञ्चन सुरु गरेको हो । हेनरिक इब्सनको नाटक ‘अ डल्स् हाउस’ को नेपाली अनुवादसँगै निर्देशन रंगकर्मी सुनील पोखरेलले गरेका हुन् । गुरुकुलले यो नाटक यसअघि देशविदेशमा गरी २१६ हौं पटक मञ्चन गरिसकेको थियो ।

नाटकले परिवारमा श्रीमान् र श्रीमतीबीचको आपसी समझदारी र सम्बन्धलाई दिगो राख्न दुवैको भूमिका कति महत्त्वपूर्ण हुन्छ भन्ने पक्षलाई उजागर गर्ने जमर्को गरेको छ । कुनै पुरुषका लागि उसकी श्रीमती उसको खुसी एवं सन्तान मात्र भनी घरभित्र थुनिएर बस्नु, उसकै लागि सजिनु भनेको उनको त्याग र तपस्याको रूपमा बु∆न नाटकले श्रीमान्हरुलाई सजग बनाएको छ । यसले महिलालाई आत्मनिर्भर र सशक्तीकरणका लागि आफ्नै सहअस्तित्व तथा पहिचान निर्माणका लागि सचेत हुन पनि सन्देश बोकेको छ ।

माघ २२ सम्म मञ्चन हुने नाटकमा मुख्य भूमिका रंगकर्मी निशा शर्माको छ । नाटकमा उनीसहित कलाकारहरु पोखरेल, शेखर चापागाईं, अञ्जु देउजासमेतको अभिनय छ । पुरानो नाटक पुनः मञ्चनसँगै गुरुकुल समूह सक्रिय भएको घोषणा कुञ्ज नाटकघरमा गरियो । बन्द भएको एक दशकपछि गुरुकुल पुनः उदाएको अवसरमा नाट्यकर्मीसहित ललितकला र साहित्यका स्रष्टाहरुले आ—आफ्ना सिर्जनामार्फत पुनरागमनलाई उत्सवमय बनाए । चित्रकारहरु किरण मानन्धर, राधेश्याम मुल्मी, सम्झना राजभण्डारी, आशा डंगोल लगायतले थिएटरको आँगनमा बसेर चित्रहरु सिर्जना गरे भने शारदा शर्मा, विप्लव प्रतीक, मणि लोहनी, मोमिला जोशी लगायतका कविहरुले कविता सुनाए ।


नेपाली रंगमञ्चलाई आधुनिक धारमा ल्याएर व्यावसायिक फड्को मार्न गुरुकुलको ठूलो योगदान रहेको सुनाउँदै मानन्धर र नाट्यकर्मी हरिहर शर्माले फेरि नाट्य क्षेत्रमा गुरुकुलको आगमनले अत्यन्तै हर्षित बनाएको बताए । ‘नेपाली रंगमञ्चको शिक्षालाई आधुनिक रुपमा फराकिलो बनाउन गुरुकुलको भूमिका सधैं अग्र भागमा रहन्छ,’ शर्माले भने,‘ रंगमञ्चको इतिहासमा शिक्षासँगुगै कलाकारहरु उत्पादनमा सुनील पोखरेलको योगदान इतिहासमा रहिरहनेछ ।’ रंगमञ्चको जग बलियो बनाउन गुरुकुलले थमाएको नाम र प्रतिष्ठाको प्रशंसा गर्दै शर्माले गुरुकुलको आगामी थप यात्रा र ऊर्जाको कामना गरे ।

गुरुकुलको आफ्नै जग्गा थिएन । जग्गाधनीका कारण पुरानो बानेश्वरको नाटकघर उठाउनुपरेपछि स्थायी नाटकघर बनाउने ठाउँ भएन । समूहमा रहेका कलाकर्मी पनि छिन्न्भिन्न भएका थिए । कतिपय नेपाली चलचित्र क्षेत्रमा पुगे भने कतिपयले बेग्लै समूह बनाए । सन् २०११ मा बन्द भएको गुरुकुललाई थापागाउँस्थित कुञ्जको एउटा हलमा पुनरागमन भएको घोषणा गरिए पनि यसले आगामी दिनमा नाट्य क्षेत्रमा सक्रियता देखाइरहने हो/होइन भन्ने निश्चित छैन । गुरुकुलका संस्थापक पोखरेलका अनुसार काठमाडौं महानगरपालिकाले एक वर्षको भाडा प्रदान गर्ने सहमति भएपछि कुञ्जको एउटा हल एक वर्षका लागि गुरुकुलको नाममा सञ्चालन हुने सम्झौताअनुसार सञ्चालनमा आएको हो ।

प्रकाशित : माघ १, २०७८ २०:३८
प्रतिक्रिया
पठाउनुहोस्

बाघको आक्रमणबाट मृत्यु भएका व्यक्तिका परिवारलाई राहत

रुपा गहतराज

नेपालगन्ज — प्रदेश सरकारले ‘मानव वन्यजन्तु द्वन्द्व न्युनीकरण कार्यक्रम' मार्फत् बाँकेमा बाघको आक्रमणबाट मृत्यु भएका व्यक्तिका परिवारलाई राहत प्रदान गरेको छ ।

डिभिजन वन कार्यालय बाँकेका प्रमुख ददिलाल कंडेलले मृतकको घरमै पुगेर प्रति परिवार ५० हजारका दरले चेक हस्तान्तरण गरे। दुवै पीडित परिवारलाई ५०/५० हजार हस्तान्तरण गरिएको डिभिजन वन कार्यालय बाँकेका प्रमुख कंडेलले बताए ।

बाघले आक्रमण गर्दा राप्ती सोनारी ६ फत्तेपुरकी २९ वर्षीया चाँदनी थारु र राप्ती सोनारी ४ पर्सोनाकी ५३ वर्षीया लिला विष्टको गत साता मृत्यु भएको थियो।

यस्तै वन तथा वातावरण संरक्षण समन्वय समिति कम्दी बाँकेले पनि फत्तेपुरका पीडित परिवारलाई काजकिरिया खर्चस्वरुप १० हजार प्रदान गरेको छ।

समन्वय समितिका अध्यक्ष लवराज खरेलले शुक्रबार सो रकम हस्तान्तरण गरेका थिए । समन्वय समितिको कार्यक्षेत्रअन्तर्गत पर्ने सामुदायिक वन उपभोक्ता मृतक चाँदनीका परिवारलाई किरिया खर्च दिएको खरेलले बताए।

यसअघि राप्ती सोनारी गाउँपालिकाले पनि बाघको आक्रमणबाट ज्यान गुमाएका लिला र चाँदनीको परिवारलाई किरिया खर्च बापत २०/२० हजार रुपैयाँ हस्तान्तरण गरेको थियो ।

प्रकाशित : माघ १, २०७८ २०:२३
पूरा पढ्नुहोस्
प्रतिक्रिया
पठाउनुहोस्
×