युट्युबबाट हटाइयो ‘हे दैव’ बोलको गीत
काठमाडौँ — मेलिना राई र किरण गजमेरको स्वरमा रहेको ‘हे दैव’ बोलको गीत युट्युबबाट हटाइएको छ । रमेश एमके पौडेलको रचना तथा सुवास भुषालको संगीत भनिएको उक्त गीतको सुरुको हरफ नै आफ्नो रचनाबाट चोरी गरिएको गीतकार तथा सञ्चारकर्मी भुपेन्द्र खड्काले दाबी गरेपछि उक्त गीत अहिले हटाइएको छ ।
गीतकार खड्काको रचना तथा गायक कर्ण दासको स्वरमा रहेको ‘भेटिएर छुट्नुभन्दा नभेटिएकै जाती हुन्थ्यो, हामीबीचको सम्बन्ध यो अझै कति माथि हुन्थ्यो’ बोलको गीतबाट अनुमतिबिना नै सिधै चोरी गरिएको खड्काको आरोप छ ।
खड्काका अनुसार उक्त गीत २०६१ सालमा रेकर्ड भएर ०६२ मा एल्बम ‘आधा सपना’मार्फत सार्वजनिक गरिएको थियो । आफ्नो गीतको हरफ नै हुबहु टिपेर सार्वजनिक भएर बजारमा आउँदा समेत आफू अनभिज्ञ रहेको खड्काले कान्तिपुरसँगको कुराकानीमा बताए ।
‘आज कान्तिपुरमा गीतसंगीत चोरीसम्बन्धी समाचार आएको रहेछ‚’ उनले भने, ‘के रहेछ भनेर हेर्दा आफ्नै गीत पो चोरी भएको लेखिएको रहेछ । मलाई एकछिन रिंगटा नै चल्यो । त्यसपछि तुरुन्तै गीत हटाउन लगाएँ ।’
‘गीतसंगीत चोरीको बिगबिगी’ शीर्षकमा कान्तिपुर दैनिकले बुधबार समाचार प्रकाशित गरेको थियो ।
उक्त गीतबाट नै नेपाली गीति लेखनमा आफ्नो पहिचान स्थापित भएको खड्काले सुनाए । आफ्नो रचना समावेश भएको गीतको अडियो, भिडियो लगायतका कुनै पनि सामग्री पुनः प्रयोग गरिएको देखिएमा रचनाकार, संगीतकार तथा गायक-गायिकाविरुद्ध नै कानुनी लडाइँ लडेर क्षतिपूर्ति लिने खड्काले चेतावनी दिएका छन् । सम्बन्धित पक्षले गल्ती स्वीकार्दै आगामी दिनमा गल्ती नदोहोर्याउने वाचा गरेकाले अहिले गीतमात्र हटाइएको उनको भनाइ छ ।
स्रष्टाको प्रतिलिपी अधिकार संरक्षणका लागि नै आफूले ‘संगीत रोयल्टी संकलन समाज नेपाल’मा महासचिवका रुपमा चार वर्ष काम गरेको उनले सुनाए । उनले भने, ‘त्यही क्रममा मैले युरोप तथा अफ्रिकाका विभिन्न देशमा बौद्धिक अधिकारसम्बन्धी अभ्यासका बारेमा बुझेको थिएँ । युट्युबदेखि हरेक व्यक्तिको दिमागसम्म रहेको यति चर्चित गीतसमेत मान्छेले चोरी गर्ने आँट गर्छन् । संगीत क्षेत्रमा चोरीको घटना विकृतिका रुपमा आयो ।’ आफ्नो सिर्जनाका लागि सबै स्रष्टाहरूलाई सचेत र सजग रहन उनले आग्रह गरे ।
प्रकाशित : पुस २१, २०७८ १६:१७