मंसिर २४ देखि तामाङ सेलो संगीत महोत्सव - कला - कान्तिपुर समाचार
कान्तिपुर वेबसाईट
AdvertisementAdvertisement

मंसिर २४ देखि तामाङ सेलो संगीत महोत्सव 

कान्तिपुर संवाददाता

काठमाडौँ — नेपाल तामाङ कलाकार संघले यही मंसिर २४ र २५ गते तामाङ मौलिक सेलो संगीत महोत्सव गर्ने भएको छ । महोत्सव बौद्धस्थित होटल हायातको खुल्ला मैदानमा हुने कलाकार संघले बिहीबार काठमाडौंमा पत्रकार सम्मेलन गरेर जानकारी दिएको हो ।

तामाङ समुदायको उत्पत्ति तथा सभ्यतासँगै जोडिएको डम्फू अर्थात् ताम्बा संस्कृतिको संरक्षण, संवर्द्धन गर्दै नयाँ पुस्तामा हस्तान्तरण गर्ने ध्येयले महोत्सव आयोजना गरेको संघको बतायो । महामारीका कारण अघिल्लो वर्ष भने संघले महोत्सव गर्न सकेन ।

संघका अध्यक्ष विश्व दोङले डम्फू अर्थात् ताम्बा संस्कृतिसँगै आउने तामाङ सेलो संगीतमार्फत तामाङ जातिको पुर्खा, इतिहास, पहिचान तथा सभ्यताको जगेर्ना गर्न सेलो संगीत महोत्सव गर्दै आएको बताए । ‘डम्फू संस्कृति हाम्रो विधि, विधान र संस्कृतिको एउटा कानुन हो’, दोङले भने,‘डम्फूले हाम्रो जन्मदेखि मृत्युसम्मको सबै विधिको ऐतिहासिक कुरा गर्छ । यो तामाङ समुदायको दर्शन पनि भएकोले यसलाई जोगाउन अति आवश्यक छ ।’ डम्फूको तालमा गाउने तामाङ सेलोमा म्हेन्दोमाया, खन्दोके, फापरे गीतहरु समुदायमा प्रचलित रहेको सुनाउँदै महोत्सवमा ती सबैलाई समेटिने उनले सुनाए ।

महोत्सवमा मूल आकर्षकका रुपमा ताम्बा संस्कृति रहनेछ । ताम्बाहरुद्वारा डम्फूको महत्वमाथि समेत परिचर्चाहरु हुनेछन् । दोङका अनुसार ताम्बा तथा मौलिक सेलो गीतहरुको समेत प्रस्तुति रहने महोत्सवले समग्रमा तामाङ समुदायको सभ्यता र संस्कृतिको झल्को दिनेछ ।


प्रकाशित : मंसिर ९, २०७८ २१:१२
प्रतिक्रिया
पठाउनुहोस्

नेपाली दर्शनका तीन कृति

कान्तिपुर संवाददाता

काठमाडौँ — अन्तर्राष्ट्रिय दर्शन दिवसका अवसरमा नेपाली दर्शनका तीन अनुसन्धानात्मक कृति सार्वजनिक भएको छ । नेपाल प्रज्ञा प्रतिष्ठान दर्शनशास्त्र विभागले गोपीरमण उपाध्यायको ‘वैदिक साम्यवाद र वैज्ञानिक समाजवादको तुलनात्मक अध्ययन’, अशोकविक्रम जिसी (समीर सिंह) को ‘साङ्ख्य दर्शन र माक्र्सवाद’ र प्रतिष्ठानकै ‘दर्शनावली भाग–८’ प्रकाशन गरेको हो । त्यसैगरी, साहित्यकार प्राडा. उषा ठाकुरको ‘नेपाली साहित्य सर्वेक्षण र समीक्षा’ समालोचना पनि सार्वजनिक गरिएको छ ।

बिहीबार आयोजित ‘वर्तमान सन्दर्भमा मानवतावादको महत्त्व’ विषयक विचार–गोष्ठीमा प्रतिष्ठानका कुलपति गंगाप्रसाद उप्रेतीले पुस्तक सार्वजनिक गरेका हुन् । कार्यक्रममा प्राध्यापक वीरेन्द्रकुमार मिश्रले वर्तमान युग मानवतावादको युग भएको बताए । ‘मानवतावादको मोटिभेसन करुणा हो,’ उनले भने, ‘हरेकलाई आफ्नो भाग्यरेखा कोर्ने, जीवनको अस्तित्व बचाउने वातावरण चाहिन्छ ।’ प्रतिष्ठानका सदस्यसचिव जगत्‌प्रसाद उपाध्यायले जयपृथ्वीबहादुर सिंहले नेपालमा मानवतावादी दर्शनको प्रवर्तन गरेको उल्लेख गरे । ‘सन् १९२३ मा जयपृथ्वीबहादुर सिंहले जातभात, छुवाछूतविरुद्ध बोल्नुभयो, लेख्नुभयो,’ उनले भने, ‘नेपालको सन्दर्भमा त्यो नै मानवतावादको पहिलो चरण थियो ।’

इतिहासविद् प्रा. दिनेशराज पन्तले नेपाली दर्शनका ग्रन्थ प्रकाशन भएसँगै नेपालले छुट्टै ‘दर्शन दिवस’ मनाउनुपर्ने आवश्यकता रहेको बताए । युनेस्कोले सन् २००२ मा विश्व दर्शन दिवस मनाउन प्रस्ताव गरेको थियो । महासभाले २००५ मा निर्णय गरेपछि हरेक वर्ष नोभेम्बर तेस्रो साताको बिहीबार यो दिवस मनाउने गरिएको छ । २०६६ सालमा दर्शन विभाग गठन गरेका प्रतिष्ठानले हालसम्म दर्शनावलीका आठ भाग प्रकाशन गरेको छ ।

प्रकाशित : मंसिर ९, २०७८ २१:०१
पूरा पढ्नुहोस्
प्रतिक्रिया
पठाउनुहोस्
×