जलरङमा धनकुटा

ठाउँ–ठाउँ रोकिँदै स्ट्यान्डमा क्यानभास राखेपछि झोलाबाट रङ र कुची झिकेर आआफ्नै सुरमा धनकुटालाई जलरङ (वाटर कलर) मा उतार्दै गए । पर्यटन प्रवर्द्धनका लागि आयोजित कार्यशालाका सहभागीले धनकुटाका दृश्यलाई क्यानभासमा आकार दिएका हुन् ।

दुईदिने कार्यशालामा मुलुकभरबाट दुई दर्जन कलाकर्मी सहभागी भए । उनीहरूको अगुवाइ गरे अन्तर्राष्ट्रिय जलरङ समाज नेपालका अध्यक्ष एनबी गुरुङ, महासचिव दीपेन्द्रमान बनेपाली, सदस्य डीबी राई, प्रदेश १ का सदस्य महेन्द्र राईलगायतले । झापाको देहीआर्ट काँकडभिट्टाका छेतेन शेर्पा, मोरङको सखीआर्ट बेलबारी संयोजक गणेश लामा, विराटनगरको ललितकला संगमका जेपी चौधरी, धनकुटाका डिल्लीकृष्ण आलेलगायत २६ जना सहभागी थिए । उनीहरूले मठमन्दिर, गौंडा, बजार, वन र पर्यटकीय स्थलहरूलाई आ–आफ्नो क्यानभासमा उतारे । ती चित्र धनकुटाको हाम्रो बहुमुखी पाठशालामा प्रदर्शनीमा राखिएको छ ।