‘सनैया’ सार्वजनिक- कला - कान्तिपुर समाचार

‘सनैया’ सार्वजनिक

कान्तिपुर संवाददाता

काठमाडौँ — खाडी मुलुक पुगेका श्रमिकहरूको कथा समेटिएको कृति ‘सनैया’ सार्वजनिक भएको छ । कान्तिपुरकर्मी होम कार्कीद्वारा लिखित पुस्तकमा वैदेशिक रोजगारीका क्रममा अरबको मरुभूमिमा कष्ट खेपेर मुलुकलाई रेमिट्यान्स पठाउने नेपाली युवाको जीवन कथा उनिएको छ ।

कार्कीले डेढ दशकदेखि परिवारबाट बिछोडिएका पात्रको कथा लेखेपछि स्वदेश फर्किएका बुटवलका यमनाथ चापागाईं र उनकी पत्नी खिमकलाले शनिबार राजधानीमा आयोजित कार्यक्रममा उक्त पुस्तक सार्वजनिक गरे ।

‘उहाँ श्रीमान् फर्केर आउनुहुन्न जस्तो लागेको थियो । तपाईंहरूको सहयोगले आउनुभयो,’ खिमकलाले पुस्तक सार्वजनिक गर्दै भनिन्, ‘लामो समय श्रीमान् विदेशमा अलपत्र हुँदा महिलालाई हेर्ने दृष्टिकोण फरक र नराम्रो हुँदोरहेछ ।’ यमनाथले गैरकानुनी रूपमा कतारमा बस्दा जीवनमा धेरै आरोह–अवरोह आएको सुनाए ।

कार्की कान्तिपुर दैनिकको कतार ब्युरो प्रमुखका रूपमा दोहामा चार वर्ष थिए । त्यही बेला कतार, साउदी, यूएई, बहराइन, ओमन र कुवेतमा स्थलगत रिपोर्टिङका सिलसिलामा उनले बटुलेका कथा पुस्तकमा समेटिएका छन् । ‘कार्कीले २८ वर्षको उमेरमा पत्रकारका रूपमा कतार पुगेर आफ्नै उमेरका श्रमिकका कथा लेखेका छन्,’ पुस्तकबारे समाजशास्त्री एवं श्रमविज्ञ गणेश गुरुङले भने, ‘बनावटीभन्दा पनि तथ्य तथ्यांकसहितको कथा दिएर उनले वास्तविकता उजागर गरेका छन् ।’ पुस्तकमा १ सय १८ वटा तथ्यांक रहेको गुरुङले उल्लेख गरे ।

श्रमिक अधिकारका पक्षमा आवाज उठाउँदै आइरहेकी सांसद बिन्दा पाण्डेले पुस्तकमा नेपाली नागरिक वैदेशिक रोजगारीमा जाँदा, अरबमा बस्दा र फिर्दाको त्रासदी कथा रहेको बताइन् । ‘नेपाल सरकारले युवालाई रोजगारीमा पठाउँदा उसको क्षमता, ज्ञान, सीपअनुसारको पेसामा पठाउन नसक्नु कमजोरी हो,’ उनले भनिन्, ‘नेपालमा एउटा पेसा भनिन्छ, अरब पुगेपछि जे पायो त्यही काममा लगाइँदा अनाहकमै ज्यान गुमेर बाकसमा युवाका शव फर्काइएका छन् । सयौं कोमामा छन् ।’

पूर्वसचिव पूर्णचन्द्र भट्टराईले पुस्तकमा वैदेशिक रोजगारीको इतिवृत्तान्त रहेको बताए । ‘सबैभन्दा पहिले सन् १९८७ मा कतार पुगेकादेखि भर्खरै खाडी मुलुक पुगेकाहरूको दु:खसुख समेटिएको छ,’ उनले भने, ‘राज्यको भूमिका कमजोर हुनु र कतिपय अवस्थामा वैदेशिक रोजगारीमा गएका नागरिकले दायित्व पूरा नगर्दा समस्या जेलिएको छ ।’ उनले नेपालीले खाडीमा सस्तो पाखुरी बेच्नुपरेको बाध्यता किताबमा पाएको बताए ।

लेखक कार्कीले कतार बसेर नेपालीका कथा लेख्दा कुनै पनि बेला देश निकालामा परिने मनस्थितिमा पुगेको स्मरण गर्दै पुस्तकमा आफूले देखे, भोगेका नेपालीको यथार्थ कथा समेटेको बताए । पुस्तक किताब पब्लिसर्सले प्रकाशन गरेको हो ।

प्रकाशित : चैत्र २१, २०७७ २०:३२
प्रतिक्रिया
पठाउनुहोस्

धनकुटाको सदरमुकाम नजिकै भीषण डढेलो

रमेशचन्द्र अधिकारी

धनकुटा — धनकुटा सदरमुकामसँगै रहेको चुलिवन क्षेत्रमा शनिबार दिनभर डढेलो लागेको छ। जंगलको आगो बस्तीमा पसेपछि दुई घरमा क्षति पुगेको छ ।

धनकुटा नगरपालिका ७ चुलिवन क्षेत्रमा शनिबार लागेको डढेलो । डढेलो बस्तीमा पस्दा दुई घर गोठ जलेका छन् । तस्बिर: रमेशचन्द्र अधिकारी/कान्तिपुर

स्थानीय धनबहादुर पौडेल र इन्द्रबहादुर रसाइलीको दुई घर/गोठ जलेको प्रहरीले जनाएको छ । मानवीय क्षति नभएपनि पौडेलको घरमा आगो सल्किँदा लाखौंको धनमाल क्षति र दुई वटा खसी मरेका छन् । जोखिमयुक्त घरबस्ती जोगाउन धनकुटाका दुईसहित धरान, विराटनगर, इटहरी, दमक, वसन्तपुरसहित ७ वटा दमकल प्रयोग गरिएको प्रहरी नायब उपरीक्षक सन्तुलाल प्रसाद जैशवालले जानकारी दिए । टेकुनाला क्षेत्रबाट सल्किएको आगो ७ नम्बर वडाको मगर बस्ती, कालिकास्थान र लाफा चोक आसपासका बस्ती जोखिममा रहेको प्रहरीले जनाएको छ । घटनास्थलमा नेपाल सेना, सशस्त्र प्रहरी, तथा नेपाल प्रहरीका सयौं जनशक्ति परिचालन गरिएको छ ।

सल्लाको रुख रहेको वनमा डढेलो लाग्दा त्यसले भीषण रुप लिएको स्थानीयले जनाए । बस्ती भन्दा झन्डै पाँच सय मिटर नजिक लागेको डढेलो क्षणभर मै बस्तीमा प्रवेश गरेको खटिएका सुरक्षाकर्मीले बताए । क्षतिको विवरण प्राप्त हुन बाँकी रहेको प्रशासनले जनाएको छ।

धनकुटा-६ को पात्ले पाङ्सिन सामुदायिक वनमा पनि शनिबार साँझ बस्ती नजिकै जंगलबाट डढेलो सल्किएको स्थानीयले बताए । यस्तै, धनकुटा ८ स्थित सिकावा र हिर्चने सामुदायिक वनमा भीषण डढेलो लाग्दा दुवै वनमा ९० प्रतिशत बढी क्षति पुगेको छ । धनकुटामा पछिल्लो दुई साताको अवधिमा ३५ बढी सामुदायिक वनमा डढेलोले क्षति भएको सामुदायिक वन उपभोक्ता महासंघका अध्यक्ष नीलबहादुर थापाले जानकारी दिए ।

भिरालो भागमा रहेको जंगलको डढेलोमा हावाको वेगसहित आगोको लप्का बस्तीमा सल्किएको धनकुटा-७ का वडाध्यक्ष जंगबहादुर राईले बताए । हावाको वेग नघटेपछि साँझपखसम्म आगो नियन्त्रण बाहिर गएको थियो ।

चुलिवन छेउमा रहेको निजामती आवासीय विद्यालय समेत डढेलोको जोखिममा रहेको छ । विद्यालय क्षेत्रमा धनकुटा नगरपालिकाको दमकलसहित सुरक्षाकर्मी तैनाथी अवस्थामा राखिएको प्रजिअ बासुदेव दाहालले जानकारी दिए ।

प्रकाशित : चैत्र २१, २०७७ २०:२७
पूरा पढ्नुहोस्
प्रतिक्रिया
पठाउनुहोस्
×