शैलीको भर्चुअल राष्ट्रिय बाल नाटक महोत्सव- कला - कान्तिपुर समाचार

शैलीको भर्चुअल राष्ट्रिय बाल नाटक महोत्सव

कान्तिपुर संवाददाता

काठमाडौँ — लामो समयदेखि बाल रंगमञ्चको क्षेत्रमा सक्रिय शैली थिएटरको भर्चुअल राष्ट्रिय बाल नाटक महोत्सव सुरु भएको छ ।

बालबालिकाहरुको सर्वाङ्गीण विकाससँगै उनीहरुकै विषय तथा मुद्दालाई रंगमञ्चका माध्यमबाट प्रस्तुत गर्ने उद्देश्यले महोत्सव सुरु गरिएको हो ।

रंगमञ्चमा शैलीले तेह्र वर्षमा प्रवेश गरेको अवसरमा गरिएको यो १२ औं संस्करणको महोत्सव हो । चैत १ गते चुलाचुली रंगमञ्च इलामको प्रस्तुतिमा नाटक ‘रिट्ठु’को प्रसारणसँगै महोत्सवको थालनी गरिएको छ । सन्तोष गिरीको लेखन तथा चेतन आङथुपोको निर्देशनमा तयार गरिएको नाटकमा १० वर्षे जनयुद्धमा आम मानिस तथा बालकालिकाको भोगाइलाई चित्रण गरिएको छ ।

त्यस्तै महोत्सवको दोस्रो दिन एभरेष्ट एकेडेमी अत्तरिया कैलालीबाट रंगकर्मी पुष्पराज अवस्थीको लेखन तथा निर्देशनमा नाटक ‘भूमिका’ को भिडियो प्रसारण गरियो । सुदूरपश्चिमको भाषा, लय तथा संगीत संयोजनमा प्रस्तुत गरिएको नाटकमा बालिकाको बलात्कारपछि हत्या गरिएको घटनालाई उठान गरिएको थियो । महोत्सवको तेस्रो र चौथो दिन भने क्रमश: मर्निङस्टार इन्टरनेसनल बोर्डिङ स्कुल विरेन्द्रनगर सुर्खेतबाट रञ्जित सिंहको लेखन तथा निर्देशनमा ‘अक्षर’, नवलपरासीबाट सुनिल शर्मा ढुंगानाको लेखन तथा निर्देशनमा ‘भुन्टे’ नाटकका भिडियो प्रस्तुत गरिएको थियो ।

कोरोना महामारी त्रासका कारण भौतिक रुपमा बालबालिकाको उपस्थितिमा नाटक मञ्चन गर्ने माहोल बनिनसकेकाले भर्चुअल महोत्सव गर्ने निर्णय गरिएको महोत्सवका निर्देशक नवराज बुढाथोकीले बताए । देशैभरिबाट प्राप्त भएका बाल नाटकहरुलाई भिडियोमा प्रस्तुत गर्नु परेकोले विगतका नाटक महोत्सवभन्दा यो वर्ष नयाँ अनुभव भएको बुढाथोकीले सुनाए । उनका अनुसार फागुन १५ गतेसम्म देशैभरिबाट प्राप्त झन्डै तीन दर्जन भिडियो नाटकहरुमध्ये २८ प्रतियोगी नाटकलाई महोत्सवमा सहभागी गराइएको छ । सहर केन्द्रित भएर नाटकका गतिविधि सञ्चालन भइरहेको अवस्थामा भर्चुअल माध्यमका कारण देशका सबैजसो क्षेत्रलाई महोत्सवले समेट्न सक्नु सकरात्मक पक्षको रुपमा लिनुपर्ने उनले बताए ।

रंगकर्मी लुनिभा तुलाधर, समालोचक तथा लेखक अशोक थापा निर्णायक रहेको समूहले छनोट गरेका नाटक शैलीले हरेक दिन साँझ ७ बजे आफ्नो अफिसियल युटुब च्यानलमार्फत प्रसारण गरिरहेको छ । निर्णायकहरुको मुल्यांकनको आधारमा उत्कृष्ट ठहरिएका तीन नाटकलाई पुरस्कृत गरिनेछ । महोत्सवको नतिजा भने चैतको तेस्रो साताभित्र प्रकाशित गरिने महोत्सव संयोजक सरस्वती अधिकारीले बताइन् ।

चैत १२ गतेसम्म चल्ने महोत्सवमा ‘के समाज अझै सुध्रिएको हो त’, ‘महिला हिंसा’, ‘इमान्दार दाउरे’ लगायतका नाटकहरु प्रसारण हुनेछन् ।

प्रकाशित : चैत्र ५, २०७७ १५:४३
प्रतिक्रिया
पठाउनुहोस्

शंकर लामिछाने निबन्ध पुरस्कार रसिकलाई

कान्तिपुर संवाददाता

काठमाडौँ — शैली र शिल्पी आधारमा निबन्ध लेखनमा प्रेरक नाम बनाएका स्रष्टा शंकर लामिछानेको नाममा स्थापित निबन्ध पुरस्कार संस्मरण लेखक एवं गायक गणेश रसिकलाई प्रदान गरिएको छ ।

बिहीबार आयोजित एक समारोहमा नेपाल प्रज्ञा प्रतिष्ठानका कुलपति गंगाप्रसाद उप्रेतीले ‘निबन्ध लेखन तथा विधागत उन्नयनमा योगदान गरेबापत’ रसिकलाई ५० हजार रुपैयाँ नगदसहितको पुरस्कार प्रदान गरेका थिए । निबन्ध–संस्मरणका विधामा ‘दशगजामा उभिएर’, ‘जब सिस्नोहरु टेक्दै हिँडे’, ‘छपक्कै मनमा बसेका’ लगायतका कृति प्रकाशित छन् भने उनका आख्यान, गीत, कविताका संग्रह पनि प्रकाशित छन् ।

समारोहमा २५ हजार रुपैयाँ राशीको शंकर लामिछाने युवा पुरस्कार निबन्धकार प्रतीक ढकाललाई प्रदान गरिएको थियो । यसैगरी, ९३ वर्षीय वरिष्ठ पत्रकार भैरव रिसाललाई अभिनन्दन गरिएको थियो ।

समारोहमा शंकर लामिछाने प्रतिष्ठानका अध्यक्ष राधेश्याम लेकाली, पद्मावती सिंह, प्रमोद प्रधान लगायतले मन्तव्य राखेका थिए । यसअघि कृष्णचन्द्रसिंह प्रधान, दुर्गाप्रसाद भण्डारी, बालकृष्ण पोखरेल, श्यामप्रसाद शर्मासहितले शंकर लामिछाने निबन्ध पुरस्कार पाइसकेका छन् ।

प्रकाशित : चैत्र ५, २०७७ १५:२५
पूरा पढ्नुहोस्
प्रतिक्रिया
पठाउनुहोस्
×