रुसमा उत्कृष्ट बन्यो ‘सहायक श्रीमान्’- कला - कान्तिपुर समाचार
कान्तिपुर वेबसाईट
AdvertisementAdvertisement

रुसमा उत्कृष्ट बन्यो ‘सहायक श्रीमान्’

कान्तिपुर संवाददाता

काठमाडौँ — घरमा जति दाजुभाइ छन्, एउटै श्रीमती बिहे गर्ने संसारकै अनौठो चलन अहिले पनि नेपालका कतिपय हिमाली जिल्लामा पाइन्छ । चार वर्षअघि यही संस्कार खोतल्दै डकुमेन्ट्री निर्देशक गणेश पाण्डे कर्णालीको हुम्ला पुगे । कतै हिउँसित चिप्लिए, कतै स्थानीय जात्रा र पर्वहरूमा रम्दै बहुपति प्रथाका वास्तविक पात्रहरू खोजी गरे ।

यसरी तयार पारिएको डकुमेन्ट्री फिल्म ‘सहायक श्रीमान्’ (को–हजबेन्ड) ले शनिबार रुसमा सम्पन्न इन्टरनेसनल कान्स्क भिडियो फेस्टिभलको १९ औं संस्करणमा उत्कृष्ट बन्दा उनी बेहद खुसी भए ।

३५ मिनेटको यो डकुमेन्ट्री फिल्मले प्रथम पुरस्कारस्वरूप ग्रान्ड पिक्स अवार्ड पाएको हो । विभिन्न देशका फिल्महरू प्रतिस्पर्धामा रहेका यस महोत्सवमा बेलायतको फिल्म दोस्रो र पोर्चुगलको फिल्म तेस्रो भएको थियो । कोभिड–१९ को महामारीका कारण प्राय: चलचित्रकर्मीहरूले भर्चुअल रूपमै फेस्टिभलमा भाग लिएका थिए । आफ्नो फिल्म फेस्टिभलमै उत्कृष्ट भएको खबर आयोजकले दिएपछि ‘सहायक श्रीमान्’ का निर्देशक पाण्डेले काठमाडौंबाटै जुममार्फत अवार्ड समारोहलाई सम्बोधन गरे । ‘यो मेरा लागि मात्र नभई नेपाल र युवा चलचित्रकर्मीहरूका लागि ठूलो सम्मान हो,’ उनले भने ।

पाँच वर्षअघि महाभूकम्पमा परी रहस्यमय ढंगले बाँचेकाहरूमाथि ‘भाग्यले बाँचेकाहरू’ नामक डकुमेन्ट्री बनाएका पाण्डेको ‘सहायक श्रीमान्’ नयाँ डकुमेन्ट्री फिल्म हो । गत डिसेम्बरमा काठमान्डु इन्टरनेसनल माउन्टेन फिल्म फेस्टिभल (किम्फ) मा रिलिज गरिएको यो डकुमेन्ट्री फिल्मले यसअघि नेपाल इन्टरनेसनल फिल्म फेस्टिभल (निफ) मा पनि उत्कृष्ट अवार्डसहित १ हजार अमेरिकी डलर जित्न सफल भएको थियो ।

‘बाहिरी दुनियाँका लागि बहुपति प्रथाको विषयवस्तु आफैंमा अनौठो हो,’ निर्देशक पाण्डेले भने, ‘फेरि मैले हतार नगरी झन्डै चार वर्ष अनुसन्धान र छायांकनपछि बनाएको हुँ । यो प्रथामाथि धेरै चर्चा/परिचर्चा भए पनि डकुमेन्ट्रीमा उतारिएको पहिलोपटक हो ।’

हुम्लाको लामा समुदायमा अहिले पनि दाजुभाइका लागि एउटै श्रीमती बिहे गर्ने चलन छ । डकुमेन्ट्रीमा उनले वास्तविक पात्रहरूको कथा व्यथासँगै हुम्लाको संस्कृति, तिब्बतसँगको भेडा र चौंरी आधारित व्यापार, पालैपालो पतिहरूलाई काममा लगाउने परम्परागत कृषि प्रणालीजस्ता रोचक विषयसमेत समेटेका छन् । साइन मिडिया प्रालिले निर्माण गरेको यो डकुमेन्ट्रीको लेखनसमेत निर्देशक पाण्डेले नै गरेका हुन् ।

प्रकाशित : भाद्र १५, २०७७ १३:३६
प्रतिक्रिया
पठाउनुहोस्

एमटीभी भिडियो म्युजिक अवार्डमा लेडी गागाको वर्चस्व

एजेन्सी

न्युयोर्क — सीमित दर्शक र प्रस्तुतिबीच 'एमटिभी भिडियो म्युजिक अवार्ड' सम्पन्न भएको छ । कोरोना महामारीमा पनि शनिबार न्युयोर्कमा अवार्ड कार्यक्रम आयोजना गरिएको थियो ।

अवार्ड कार्यक्रममा विश्वचर्चित साउथ कोरियन ब्यान्ड बीटीएसले आफ्नो डेब्यू अंग्रेजी 'डायनामाइट'बोलको गीत प्रस्तुत गरेको थियो । ब्यान्डका सात सदस्यले संगीत कार्यक्रममा यसरी प्रस्तुति दिएको यो पहिलोपटक रहेको द हलिउड रिपोर्टरले उल्लेख गरेको छ ।

अवार्ड कार्यक्रममा बीटीएस बेस्ट-पप, बेस्ट के-पप, बेस्ट ग्रुपको विधामा मनोनित भएको थियो । यी तीनै विधामा ब्यान्डले अवार्ड पाए । 'अन'बोलको गीतबाट उनीहरुले बेस्ट कोरियोग्राफीको अवार्डसमेत प्राप्त गरे ।

आर्टिस्ट अफ द यिअरको अर्वाड ग्रहण गर्दै लेडी गागा तस्बिर : रोयटर्स

सन् २०१० मा स्थापना भएको यो ब्यान्डले एल्बम 'लभ योरसेल्फ: टियर एण्ड म्याप अफ दि सोल'बाट विश्वभर चर्चा कमाएको थियो । कोरोना महामारीका कारण यो वर्ष 'एमटीभी भिडियो म्युजिक अवार्ड' भर्चुअलजस्तै भयो ।

न्युयोर्क सहरको खुल्ला स्थानमा कार्यक्रमको केही प्रस्तुतिहरु भए सीमित दर्शक र सामाजिक दूरी कायम गर्दै आयोजना भएको अवार्ड कार्यक्रममा माइली साइरस, लेडी गागालगायतले प्रस्तुति दिएका थिए ।'ब्लाइन्डिङ लाइट्स'बाट द विकेन्डले 'भिडियो अफ दि इयर'को अवार्ड प्राप्त गरेको छ । द विकेन्डले यसै गीतबाट 'बेस्ट आर एन्ड बी' को समेत अवार्ड हात पार्‍यो ।

त्यस्तै लेडी गागाले आर्टिस्ट अफ द यिअरको अवार्ड हात पारेकी छिन् ।

त्यस्तै गायिका अरियाना ग्रान्डे र जस्टिन बिबरले 'बेस्ट भिडियो फ्रम होम' विधामा अवार्ड पाए । लेडीगागा र अरियानाले 'रेन अन मि'बाट 'सङ अफ दि इयर'को अवार्ड पाए । यसै गीतले बेस्ट सिनेमेटोग्राफीको पनि अर्वाड पायो ।

एमटीभी अवार्डको पूरा सूची हेर्न यहाँ क्लिक गर्नुहोस् ।

प्रकाशित : भाद्र १५, २०७७ १३:२१
पूरा पढ्नुहोस्
प्रतिक्रिया
पठाउनुहोस्
×