थिएटरको विकल्प ‘अन्‍नी घर’- कला - कान्तिपुर समाचार

थिएटरको विकल्प ‘अन्‍नी घर’

एलपी देवकोटा

(जुम्ला) — जुम्लाको कला, संस्कृति झल्किने गरी स्थानीय कलाकारले ‘अन्नी घर’ सञ्चालनमा ल्याएका छन् । जुम्लामा थिएटर नहुँदा नाटक र अन्य कला प्रस्तुत गर्न समस्या भएपछि ‘अन्नीघर’ सञ्चालनमा ल्याइएको हो । 

दुई महिनाअघि स्थानीय कलाकारले निर्माण व्यवसायी संघको हलमा ‘पम्फा फूल’ नाटक मञ्चन गरेका थिए । नाटकबाट उत्साही कलाकारले ‘अन्नी घर’ सञ्चालनमा ल्याएका हुन् । ‘पम्फा फूल’ नाटकका निर्देशक एवं कलाकार गोविन्द सुनारले ‘अन्नी घर’ को नेतृत्व गरिरहेका छन् ।


जुम्लाको मुटु मानिने खलंगामा कृष्णमन्दिर नजिकै ‘अन्नी घर’ खोलिएको हो । खस भाषामा ‘अन्नी’ भनेको खाजा हो । ‘अन्नी घर’ मा जम्मा हुने कलाकार र त्यहाँको सजावट हेर्दा जुम्लामा रंगमञ्चको नयाँ युग भित्रिएको अनुभव गरेको स्थानीय मानव चौलागाईंले बताए ।


‘काठमाडौंका थिएटरमा कर्णालीका कथालाई अब्बल तरिकाले प्रस्तुत गर्ने कर्णालीका कलाकारले अब जुम्लामै प्रयास थालेका छौं,’ उनले भने, ‘नयाँ सोच र सज्जासहित अन्नी घरको अवधारणा ल्याइएको हो ।’ ‘अन्नी घर’ सञ्चालनमा ल्याएपछि कला र संस्कृतिका विषयमा बहस तथा छलफल चलाउन पनि सजिलो भएको छ ।


सबै कलाकारलाई एकताबद्ध गर्न ‘अन्नी घर’ सञ्चालनमा ल्याइएको निर्देशक सुनारले बताए । उनका अनुसार युवाले ‘अन्नी घर’ मा कोरेका थ्रिडी आर्ट देशैभरि पुर्‍याउने योजना छ ।


युवा कलाकारले पुराना काम नलाग्ने वस्तुलाई सजावट गरी ‘अन्नी घर’ मा राखेका छन् । चन्दननाथ–३ खोलिकोटका असिम सेजुवालले दैनिक ‘अन्नी घर’ जान थालेको बताए । ‘अन्नी घर खुलेपछि नाटक र पेन्टिङको दैनिक अभ्यास गरिरहेको छु,’ उनले भने, ‘यहीं आएर रैथाने परिकार पकाउन पनि सिकेँ ।’ चन्दननाथ–५ का कलाकार गोविन्द सुनारले ‘अन्नी घर’ लाई जुम्लाको चिनारी बनाउन लागिपरेको बताए । उनका अनुसार ‘अन्नी घर’ मा रैथाने परिकारबाट खाजा बनाई बिक्री गर्ने र नाटकको अभ्यास गर्ने गरिएको छ । उनले पछिल्लो समय लोप हुँदै गएका रैथाने परिकार फापरको लगड, कोदाको रोटी, चिनो र कागुनोको खिर बनाएर अन्नी घरमा राख्ने गरिएको जनाए ।


युवाको कला देखेर जोकोही पनि उनीहरूका कुरा सुन्न र कला हेर्न जाने गरेको स्थानीय महेश नेपालीले बताए । ‘म पनि कलाकारलाई हौसला दिन र उनीहरूले थालेको अभियान सफल बनाउन दैनिक अन्नी घर जान्छु,’ उनले भने, ‘पहिले पहिले खाजा खान होटल, रेस्टुरेन्टमा जाने गरेका अधिकांशको रोजाइ अहिले अन्नी घर बनेको छ ।’

प्रकाशित : फाल्गुन १, २०७६ ०८:५८
प्रतिक्रिया
पठाउनुहोस्

तयार हुँदै १५ सय ढाका उद्यमी

माधव अर्याल

पाल्पा — तीन वर्षमा जिल्लामा १ हजार ५ सय ढाका उद्यमी तयार हुने भएका छन् । प्रत्येक वर्ष पाँच सयका दरले ढाका उद्यमी तयार गर्ने परियोजना सुरु भएको हो । यो परियोजना तीन वर्षको हुनेछ । 

पाल्पाली ढाकाको पहिचान मेटिने अवस्था आएपछि यसको अस्तित्व जोगाउन परियोजना सुरु गरेको पाल्पाली ढाका संघले जनाएको छ । संघीय, प्रदेश र स्थानीय सरकारले पनि ढाका उद्यमी तयार गर्न पहल थालेको अध्यक्ष तथा पाल्पाली ढाकाकी संस्थापक ८१ वर्षीया पूर्णमाया महर्जनले बताइन् । ‘अब पाल्पाली ढाकाले पुनर्जीवन पाउँछ कि भन्ने लागेको छ,’ उनले भनिन्, ‘सबैको ध्यान परम्परागत पाल्पाली ढाकामा पुग्न थालेको छ ।’

अन्तर्राष्ट्रिय गैरसरकारी संस्था यूकेएड, सीप परियोजनाको सहयोगमा संघीय र प्रदेश सरकार पाल्पाली ढाकाको अस्तित्व बचाउन अग्रसर भएको हो । बुधबार सहमति–पत्रमा हस्ताक्षर गर्दै प्रदेश ५ का मुख्यमन्त्री शंकर पोखरेलले यो कार्यक्रम सफल भयो भने अन्य जिल्लामा पनि यस्ता कार्यक्रम विस्तार गरिने बताए । ‘यसबाट स्थानीय तहका महिला स्वरोजगार बन्न सकून् भन्ने नै हाम्रो ध्येय हो,’ उनले भने, ‘पाल्पाली ब्रान्ड स्थापना गरेर पुनर्जीवन दिलाउन खोजिएको हो ।’ प्रदेशकै पहिचानका रूपमा पनि ढाका हुने उनले बताए । पाल्पाली ढाकालाई जोगाउन तालिम, तान निर्माण, महिला स्वरोजगार बनाउनेलगायत विषयमा सहमति भएको छ । मुख्यमन्त्री पोखरेलले पाल्पाली ढाका संघसँगको सहकार्य सफल भएमा यसले फेरि एकपटक देश र विदेशमा ख्याति कमाउने बताए । ‘अब यस्तो सीप हस्तान्तरण र हराउन लागेकालाई जोगाउने कर्तव्य प्रदेश सरकारको पनि हो,’ उनले भने, ‘अब पुरानै संस्कृतिमा मान्छे फर्किन लागेको अवस्थामा हातैले बुनेको तानबाट बनेका पाल्पाली ढाकाको खोजीखोजी बिक्री हुनेछ ।’

पाल्पाली ढाकाबाट महिलालाई स्वरोजगार बनाउने मुख्य उद्देश्य रहेको तानसेन नगरपालिका प्रमुख अशोककुमार शाहीले बताए । ‘बजारमा अब पाल्पाली ढाकाको ब्रान्ड, लेबल नै फरक हुनेछ,’ उनले भने, ‘त्यसका लागि नगरपालिका सघाउन तयार छ ।’ डिफिडका नथानेल विभन, युकेएड सीप परियोजनाका टिम लिडर दलजित बोहराले पाल्पाली ढाका उत्पादनसँगै बजारीकरणका लागि पनि सहयोग गर्ने बताए ।

तानसेन नगरपालिका–६ का वडाध्यक्ष तथा ढाका व्यवसायी सागरमान महर्जनले तानसेनका साथै जिल्लाका ग्रामीण भेगका महिलाले बढी फाइदा पाउने गरी परियोजना तयार भएको बताए । पहिलो वर्षमा चार करोड रुपैयाँबराबरको लगानी हुनेछ । परियोजनाअन्तर्गत सीप परियोजना, स्टेप, प्रदेश ५ सामाजिक विकास मन्त्रालय, पाल्पाली ढाका संघको संयुक्त लगानी रहनेछ ।

प्रकाशित : फाल्गुन १, २०७६ ०८:५५
पूरा पढ्नुहोस्
प्रतिक्रिया
पठाउनुहोस्
×