अत्तरियामा मोहनी लगाउने...
अत्तरिया — पछिल्लो समय कलाकारहरू पनि विकेन्द्रित हुन थालेका छन् । यसको ताजा उदाहरण हुन् गायक राजेश पायल राई । हालै अमेरिका, अस्ट्रेलियालगायत मुलुकमा आफ्नो ‘वर्ल्ड टुर’ कन्सर्ट दिएर मुलुक फिरेका उनी हतारोकै बिच शनिबार अत्तरियामा जारी सुदूरपश्चिम प्रादेशिक महोत्सव–२०७६ मा प्रस्तुत भए ।
महोत्सवका मुख्य आर्कषण नै उनी थिए । लगातार डेढ घण्टा गाएका उनले ‘मोहनी लगाउने मायाको मिठो बोलीले...’ बाट प्रस्तुति थालेका थिए ।
यसपछि ‘दर्शन नमस्ते...’, ‘किन यति धेरै माया लाग्छ नि हौ...’, ‘मरी लानु के छ र...’ ‘नाइँ नभन्नु ल...’, ‘म त मर्छु कि क्या हो ठुली...’, ‘राई इज किङ...’ ‘नौजाले मायाले...’, ‘टल टल टल्किने...’ ‘हुरुक्कै भएँ म...’, ‘तीन तारा तीनतिर...’ लगायतका गीत गाए । उनले गाउँदै गर्दा तन्नेरीदेखि पाकासम्मका दर्शक/श्रोताले नाचेर साथ दिए ।
रोचक के भने उनले गाउँदै गर्दा एक युवती फ्यानले मफलर अर्पण गरेकी थिइन् । ‘तपाईंहरू सबैलाई मेरो माया...’ भन्दै फेरि गाउन थाल्दा दर्शकले पनि साथ दिँदै हुटिङ गरेका थिए । उद्योग वाणिज्य संघ अत्तरियाले गरेको महोत्सवपछि उनी चितवनको ठोरीमा हुने अर्को कन्सर्टमा जाने बताए ।
कन्सर्टकै लागि दुई सातापछि युरोप टुरमा जान लागेका उनले पछिल्लो समय नेपाली गीत–संगीतले मोफसल तताउन थालेको दाबी गरे ।