काठमा कुँदिएका कामकला

सुशीला तामा‌ङ

काठमाडौँ — काठमाडौं उपत्यकाभित्रका मठमन्दिरहरू नेपाली काष्ठकलाका अद्भुत नमुना मानिन्छन् । यी धार्मिक–सांस्कृतिक सम्पदामा लिच्छविकालदेखि मल्ल र शाहकालसम्मका कलाकृति हेर्न सकिन्छ । मल्लकालमा उत्कर्षमा पुगेको तन्त्रवाद होस् या कामसूत्र ज्ञान, मन्दिरका टुँडाल, झ्याल र काठे तोरणहरूमा कुँदिएका आकृतिबाटै प्रस्ट हुन्छ ।

यस्तै आकृतिबाट प्रभावित भएर उड कार्भिङ (काष्ठकला) मा लोभलाग्दो काम गरेका छन्, मूर्तिकार इन्द्रप्रसाद शिल्पकारले । एक सातादेखि उनको कलाकृति बौद्धस्थित तारागाउँ म्युजियममा प्रदर्शनरत छन् ।

आठौं शताब्दीदेखिको प्रभावलाई उनले मूर्तिमा उतारेका छन् । बौद्ध र हिन्दु देवी–देउताहरूको फिगरलाई यथार्थवादी शैलीमा ढालेका छन् । मूर्ति हेर्दै जाँदा काठमा कुँदिएका भगवान् संवाद गर्न तम्तयारझैं लाग्छन् । लोभलाग्दो त के भने उनले यी मूर्तिकला कल्पनाको आधारमा बनाएका हैनन्, काठमाडौं उपत्यकाभित्रका विभिन्न ऐतिहासिक सम्पदामाथि कुँदिएका आकृतिको कलात्मक नक्कल गरेका हुन् । उनका मूर्ति नियाल्दै जाँदा सिंगो उपत्यकाका मन्दिर, ढुंगेधारा, देवल, सत्तल र दरबार क्षेत्र घुमेको महसुस हुन्छ । १० औं शताब्दीतिरै काठमा कुँदिएको विद्याधर, १७ औँ शताब्दीको अन्त्यतिर मन्दिरका ढोकामा राख्न बनाइने गणेश, भैरव–भैरवी, सर्प र गरुडका आकृतिसहितको काठे तोरणमा नेपाली परम्परागत मूर्तिकलाको अद्भुत दृश्य मात्रै हैन, तत्कालीन नेपालीसमाजको सांस्कृतिक र धार्मिक लगाव पनि अनुभूत गर्न सकिन्छ ।

‘यी अनुपम कलाको महत्त्वबारे नयाँ पुस्ता लगभग बेखबरजस्तै बन्दै गइरहेको छ,’ भक्तपुरमा इन्द्रप्रसादले भने, ‘पुरानो कला शिल्प, ज्ञान र शैली युवा पुस्तामा हस्तान्तरण र प्रवर्द्धन गर्न सघाउ पुगोस् भन्ने मेरो चाहना हो ।’ त्रिभुवन विश्वविद्यालयबाट समसामयिक मूर्तिकलामा स्नातकोत्तर गरेका इन्द्रप्रसाद आफैंमा परम्परागत कलाका उत्तराधिकारीजस्तै हुन् । उनका अनुसार मल्लकालमा काष्ठकलाका कामशिल्पकार समुदायको उत्तरदायित्वभित्रै पर्न आउँथ्यो । उनका पुर्खाहरूका धेरैजसो समय काठमा भगवान् कुँदेरै बिते ।

विसं. १६७८ मा राजा जितामित्र मल्लले भक्तपुरको सुन्धरा बनाउन लगाउने क्रममा भगिरथ, गणेश र गंगाको मूर्ति बनाउन लाए । भक्तपुरका शिल्पकारले जितामित्रको आग्रहलाई दुरुस्तै उतारे । इन्द्रप्रसादले भने त्यही सुन्धाराको मूर्तिको प्रभावलाई काठमा कुँदेर ग्यालरीमा प्रदर्शनी गर्न ल्याए । उनले जस्ताको तस्तै उतारेको मूर्ति निकै लोभलाग्दो देखिन्छ । त्यस्तै नवौं शताब्दीतिर काष्ठकलामा पोखिएको नेवारी पौरखको प्रमाण दिने ‘सालाभान्जिका’ पाटन दरबार क्षेत्रमा पाइने १८ औं शताब्दीतिरको सिंहको ‘कीर्तिमुख’, गन्धर्व जातिको बाजा र संस्कृति देखाउने वाद्ययन्त्रसहितका मूर्तिकला निकै सुन्दर छन् ।

प्रदर्शनीमा शिल्पकारद्वारा नै निर्माण गरिएका पुराना मन्दिरमा पाइने कामसूत्रमा आधारित मूर्तिकला पनि राखिएका छन् । ‘प्राचीन समाजमा यौनशिक्षा दिने कुनै माध्यम नहुँदा तिनै कलामार्फत नै अभिव्यक्त भएको हुन सक्ने’ उनको अनुमान छ । ‘त्यतिबेलै कलामा त्यस्तो क्रान्तिकारी कदम चालिइसकिएको रहेछ,’ उनले आफ्नो अनुभवसमेत जोडेर भने, ‘हाम्रो समाज भने अझै पनि उतिसाह्रो खुल्न सकेको छैन । ती पुराना कलाकृति पनि सहजताका साथ हेर्न र चर्चा गर्न मानिस हिच्किचाउँछन् ।’ कामसूत्र झल्किने मूर्तिको प्रतिकृति तयार पार्न आफैंलाई पनि परिवारमा अप्ठ्यारो लागेको उनले सुनाए ।

सकसमा काष्ठकला
इन्द्रप्रसादका अनुसार परम्परागत कलाको प्राचीन इतिहास बुझन् हामीसँग गम्भीर र अनुसन्धानमूलक सामग्री तयार भइसकेका छैनन् । प्राज्ञिक रूपमा यसको जगेर्नाको काम पनि हुन सकेको छैन । यसलाई बुझेर उतार्ने दक्ष जनशक्ति पनि छैन । ‘सबैले पुराना मन्दिर र दरबारमा रहेका कलाकृति अवलोकन गरेकै आधारमा बनाइरहेका छन्,’ उनले भने, ‘यस्तो बाध्यताबाट हाम्रो मूर्तिकला अघि बढिरहेको छ ।’ आफूले पनि सैद्धान्तिक रूपमा भन्दा पनि पुर्ख्यौली पेसालाई नै आधार बनाएर यस क्षेत्रमा प्रवेश गरेको उनले बताए । ‘काष्ठकलाप्रति नयाँ पुस्ताको पनि चासो निकै कम रहेकोले पुस्तान्तरण हुन सकेको छैन,’ उनले भने, ‘भूकम्पपछि सांस्कृतिक सम्पदाको पुनर्निर्माणको माग भए पनि काम गर्ने मानिसको अभाव छ ।’

पुरानो प्रकृतिको काम गर्न काठको अभावसमेत हुने उनले सुनाए । ‘भनेजस्तो काठ पाउन मुस्किल छ’, उनले भने, ‘पाइए पनि व्यापारीहरूले मनलाग्दो मूल्य तोक्छन् । सरकारबाट कलाकर्मका लागि सहुलियत छैन ।’ त्यस्तै काष्ठकलाका पुराना अभिलेखहरू व्यवस्थित हुन नसक्दा पनि इतिहास लोप हुने खतरातिर अघि बढिरहेको छ । ‘मन्दिर, ढुंगेधारा, सत्तल लगायत पुरानो थलोमा रहेका कला पनि जीर्ण भएर गएका छन्,’ उनले भने, ‘संरक्षण गर्ने निकाय उदासिन छ ।’ उनको प्रदर्शनी पनि बुधबारसम्म जारी रहने छ ।

प्रकाशित : असार २५, २०७६ ०८:१०
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

राजदूतलाई बेलायतको समर्थन 

एजेन्सी

लन्डन — अमेरिकी राष्ट्रपति डोनाल्ड ट्रम्पले बेलायती राजदूतसँग ‘व्यवहारै नगर्ने’ भने पनि आफ्नो राजदूतप्रति ‘प्रधानमन्त्रीको पूर्ण समर्थन रहेको’ बेलायती सरकारले प्रतिक्रिया दिएको छ । 

बेलायती प्रधानमन्त्रीको आधिकारिक निवास तथा प्रधान कार्यालय ‘डाउनिङ स्ट्रिट’ ले आफ्ना राजदूत सर किम ड्यारोकप्रति ‘पूर्ण समर्थन’ रहेको मंगलबार दोहोर्‍याएको हो । बीबीसीका अनुसार ट्रम्पले ‘बेलायती राजदूतसँग लामो समय काम गर्न नसक्ने’ जनाए पनि ‘डाउनिङ स्ट्रिट’ ले सर किमप्रति आफ्नो समर्थन कायमै रहेको अडान दोहोर्‍याएको हो ।

अमेरिकी राष्ट्रपति ट्रम्पले वासिङटनस्थित बेलायती राजदूत सर किममाथि कडा रूपमा प्रस्तुत हुँदै ‘अब उनलाई कुनै वास्ता नगर्ने’ भनेका थिए । ट्रम्पले ट्वीट गर्दै बेलायती प्रधानमन्त्री टेरेजा मेमाथि आफ्नो रिससमेत पोखेका छन् । उनले भने, ‘यो सुखद खबर हो कि बेलायतले अब चाँडै नयाँ प्रधानमन्त्री प्राप्त गर्ने छ ।’ सर किमको केही ईमेल आइतबार चुहावट भएको थियो । ती ईमेलहरूमा उनले ट्रम्प प्रशासनलाई ‘अयोग्य र खराब’ भनेका थिए ।

टेरेजाले भनिन्, ‘मलाई सर किममाथि पूर्ण विश्वास छ तर उनीसँग सहमत छैन ।’ बेलायती प्रधानमन्त्रीका प्रवक्ताले चुहावट भएको ईमेल ‘पूर्ण रूपमा अस्वीकार्य’ भएको प्रतिक्रिया दिएका छन् । उनले भनेका छन्, ‘प्रधानमन्त्री कार्यालयले यो प्रकरणपछि हृवाइटहाउससँग सम्पर्क गरेको थियो ।’ ट्रम्पले चुहावट भएको ईमेलमाथि यसअघि नै आफ्नो प्रतिक्रिया दिइसकेका छन् । उनले भनेका थिए, ‘हामी ती व्यक्तिको ठूलो प्रशंसक होइनौँ र उनले सही तरिकाले बेलायतको सेवा गरेको जस्तो हामीलाई लागेको छैन ।’ ट्रम्पले सोमबार एकपछि अर्को ट्वीट गर्दै लेखेका छन्, ‘सर किमलाई अमेरिकामा कसैले मन पराउँदैनन् ।’

टेरेजाले सर किमलाई समर्थन गरेकोमा आक्रोशित हुँदै ट्रम्पले ब्रेक्जिटमाथि बेलायती प्रधानमन्त्रीको अडानको आलोचनसमेत गरे । उनले ‘यसमा गडबडी भएको’ प्रतिक्रिया दिएका छन् । बेलायती संसद्बाट ब्रेक्जिट सम्झौता पारित गराउन विफल भएपछि टेरेजा प्रधानमन्त्री पदबाटराजीनामा दिएकी थिइन् । अब कन्जर्भेटिभ पार्टीका दुई उम्मेदवार बोरिस जोन्सन र जेनेमी हन्ट प्रधानमन्त्री पदको दौडमा रहेका छन् ।

सर किमको ईमेल चुहावटपछि बेलायती सरकारले यसबारे जाँचको आदेश दिएको थियो । ‘बीबीसी’ का कूटनीतिक संवाददाता जेम्स लेन्डनका अनुसार ट्रम्पले सर किमप्रति जुन प्रतिक्रिया व्यक्त गरेका छन्, त्यो आफ्नो मुलुकबाट विदेशी कूटनीतिकलाई देशबाहिर पठाउने औपचारिक कानुनी प्रक्रिया हो । विशेष अन्तरवार्तामा अमेरिकी राष्ट्रपति डोनाल्ड ट्रम्पका बारेमा उनले भने, ‘उहाँ धेरै अस्थिर विचारधाराका मानिस हुनुहुन्छ ।’

राष्ट्रपति ट्रम्पले आफ्नो टीटमा जुन शब्दको प्रयोग गरेका छन्, त्यसलाई ध्यानमा राख्दै बेलायती सरकारले सर किमलाई अमेरिकाबाट ‘फिर्ता बोलाउनु’ भनेको समेत उनले अर्थ्याए । सर किम आगामी केही महिनाभित्रै अवकाश प्राप्त गर्दै छन् । यो प्रकरणपछि राजीनामा दिन सक्ने पनि उनले बताए । यदि ट्रमले सर किमसँग व्यक्तिगत रूपमा बेवास्ता गर्ने मात्रै बताएकाले उनी अमेरिकामा राजदूतका रूपमा रहन सक्ने र बेलायतमा नयाँ प्रधानमन्त्रीपछि अर्को नियुक्ति हुन सक्ने प्रतिक्रिया पनि उनको छ ।

प्रकाशित : असार २५, २०७६ ०८:०६
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×