गुरुदेवको सुरमय सन्ध्या

कान्तिपुर संवाददाता

काठमाडौँ — शास्त्रीय सङ्गीतकार एवं गायक गुरुदेव कामतले राजधानीमा सुरमय सन्ध्या कार्यत्रम आयोजना गरेका छन् । कार्यक्रममा क्लासिकल बाहेक १३ वटा गीत/गजल प्रस्तुत गरे । 

खचाखच भरिएको राष्ट्रिय नाचघरमा पण्डित होमनाथ उपाध्यायको रचना ‘मालिनी तिम्रो सुन्दर केशमा’ प्रस्तुत गरिरहँदा दर्शक र स्रोतादीर्घामा एकछिन सन्नाटा नै छाएको थियो । तर, बीच–बीचमा तालीको गडगडाहटले उनीहरू खुबै मनोरञ्जन प्राप्त गरिरहेको महसुस हुन्थ्यो ।

राग कला बन्तिमा गाइएको यो गीतमा अधिकांश युवा दर्शकहरू झुम्मिनु भनेको शास्त्रीय सङ्गीतका लागि सकारात्मक सङ्केत मान्न सकिन्छ । ठुमरी राग ‘मान्द’मा पण्डित होमनाथकै अर्को गीत ‘किन गयो प्रदेश प्रितमा’ले त श्रोताहरूलाई उठेरै ताली बजाउन बाध्य पारेको थियो । सिटमा उठ्नुको रहस्यबारे कार्यक्रममा सहभागी जनकपुरका प्रेम विदेहले भन्दै थिए, ‘ रचनाकार र गायक दुवैलाई सम्मान प्रकट गर्न उठेको हुनुपर्छ । ’

गुरुदेव कामतको सुरमय सन्ध्याको यो २३ औँ शृंखलामा शनिवार कालिप्रसाद रिजालको ‘मधुवन पनि नयाँ–नयाँ, मधुमास नयाँ–नयाँ ’ बोलको गीतले कार्यक्रममा उपस्थिति सबैलाई झुमाएकै थिए । यसैगरी, कालिकान्त तृषितको ‘सखुवा वृक्ष कहे फुलबरिया सुन भेलै हमरो प्रदेश हो रामा, कतेह गेलै सुरमा सलहेस’ बोलको मैथिली गीत कार्यक्रममा प्रस्तुत गरिएको थियो । गायकले आधा दर्जन नेपाली गजल प्रस्तुति गरेका थिए ।

कार्यक्रममा समाजसेवी तथा कलाप्रेमी प्रभातसागर सिंह प्रधानलाई गुरुकुल सङ्गीत पाठशालाले सम्मान गरेको थियो । गुरुदेवको यो प्रस्तुति सुन्न मुम्बईलाई आफ्नो कर्मथलो बनाएका गायक/अभिनेता मुरलीधरको समेत उपस्थिति थियो । गुरुकुल सङ्गीत पाठशालाको आयोजनामा भएको कार्यक्रमको सहआयोजक तराई–मधेस प्रतिष्ठान नेपाल रहेको थियो ।

प्रकाशित : चैत्र १८, २०७५ १८:०६
प्रतिक्रिया
पठाउनुहोस्
ADVERTISEMENT
ADVERTISEMENT

गीतमा मस्तिष्क पक्षाघात

कान्तिपुर संवाददाता

काठमाडौँ — अन्य रोग जस्तै मस्तिष्क पक्षाघात पनि नेपालमा सामान्य हुँदै गएको छ । यसबाट प्रभावितहरु बढिरहेका छन् । पीडितहरुप्रति समाजको दृष्टिकोण अपेक्षित रुपमा राम्रो रहेको पाइन्न । 

यही रोगका पीडितहरुका लागि काम गर्दै आएको नितिन मस्तिष्क पक्षाघात समाजले जनचेतनामूलक गीत निकालेको छ ।

मस्तिष्क पक्षाघातबाट प्रभावितहरुलाई सामान्य मानिसलाई झैं व्यवहार गर्नुपर्ने सन्देशसहितको गीतले भन्छ :
नभन मेरो भाग्य विधाताले नै कोरिदियो
नभन यो मेरो इच्छा नियतिले नै तोडिदियो...

नरेश प्रधानले लेखेको गीत रिदम कँडेलले संगीतबद्ध गरेका हुन् । उनैको संगीत संयोजन रहेको गीतमा गायक शिव परियारको स्वर सुन्न सकिन्छ । स्टुडियो साउन्ड मिलमा रेकर्ड भएको उक्त गीतको म्युजिक भिडियो पनि बनेको छ ।

निकेश खडका निर्देशित भिडियोमा सरोज खनाल, सूर्यमाला शर्मा, श्रीवानी थापा र रुपेश लामाले अभिनय गरेका छन् । बुद्ध थापाले खिचेको भिडियो विकास धमलाले सम्पादन गरेका हुन् ।

‘हाम्रो समाजमा मस्तिष्क पक्षाघात भएका बालबालिकालाई हेर्ने दृष्टिकोणमा परिवर्तन ल्याउन हामी तीन वर्षदेखि क्रियाशील छौं,’ समाज अध्यक्ष उर्मिला श्रेष्ठले विज्ञप्तिमा भनेकी छन्, ‘फरक क्षमताका बालबालिका र तिनका अभिभावकलाई गरिने व्यवहारमा सकारात्मक बदलाव ल्याउन सबैले हातेमालो गर्न जरुरी छ ।’

प्रकाशित : चैत्र १८, २०७५ १७:२९
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT