कान्तिपुर वेबसाईट
AdvertisementAdvertisement

कबड्डीमा चुपचाप इतिहास

फाइनल प्रवेश गरेसँगै नेपाली महिला कबड्डी टोलीले एउटा इतिहास बनाइसकेको छ । भारतलाई पन्छाएर के सागमा अर्को स्वर्णिम इतिहास रच्ला ?
राजेन्द्र नाथ

काठमाडौँ — हल्चोकस्थित सशस्त्र प्रहरीको कभर्डहलमा दशरथ रंगशाला र सातदोबाटोस्थित अन्तर्राष्ट्रिय खेल परिसरमा जस्तो तडकभडक छैन । न दर्शकको हल्ला सुनिन्छ । न त त्यहाँ धेरै मिडियाकर्मी नै पुगेका छन् । खेलाडी शान्त माहोलमा खेलिरहेको दृश्य आकर्षक देखिन्छ । कतिपयलाई थाहा नहुन सक्छ त्यही माहोलभित्र महिला कबड्डीले चुपचाप एउटा इतिहास लेखिसक्यो । अर्को स्वर्णिम इतिहास सन्निकट छ ।

दक्षिण एसियाली खेलकुद प्रतियोगिता (साग) को इतिहासमै नेपाली महिला कबड्डी टोली पहिलोपल्ट फाइनल पुगेकोछ । सोमबार हल्चोकमै नेपालले स्वर्णका लागि बलियो प्रतिद्वन्द्वी भारतको सामना गर्नेछ । यसअघिको भेटमा भारतले बाजी मारेको थियो । उसलाई नपन्छाए पनि रजत पदक भने पक्का छ ।


अरू खेलको चर्चाबीच महिला कबड्डीको सफलता भने ओझेलमा परेको छ, यसो हुनुको एउटा कारण खेलस्थल टाढा हुनु र त्यो ठाउँमा एउटै खेल आयोजना गरिनु पनि होला । तर मिडियाहरूले यथोचित स्थान नदिएकामा प्रशिक्षक र खेलाडी भने असन्तुष्ट सुनिए ।

कबड्डीका मुख्य प्रशिक्षक तारासिंह भाट शनिबार चिनारु पत्रकारलाई फोन गरेर फाइनलबारेमा जानकारी र आमन्त्रणको निम्तो दिइरहेका थिए । उनको चित्त दुखाई सामाजिक सञ्जालमा पनि देखियो । फेसबुकमा लेखेका छन्, ‘१३ औं सागमा महिला कबड्डी खेलाडीले नयाँ इतिहास कायम गरेका छन् । भलिबलमा जस्तै इतिहास बनाएर फाइनलका लागि तयार महिला कबड्डीको चर्चा मिडियामा नभएको प्रति खेलाडीमा निराशा छाएको छ ।’


महिला कबड्डी टोलीकी कप्तान कोषमाया बस्नेतको पनि त्यस्तै गुनासो छ । ‘मिडियाले चासो नै दिएनन् । अरू खेलको लाइभ आउँछ । हाम्रोमा समाचारकै लागि पनि पत्रकार पुग्दैनन् । घरबाट बुवाआमाको फोन आउँछ । टीभीमा समाचार हेर्नुस् भन्यो, आउँदैन,’ उनले भनिन्, ‘परिवारका अगाडि पनि लाज हुन्छ । भलिबलले झैं इतिहास बनायौं । तर कतै त्यसको अभिलेखीकरण नहुँदा दुःख लागेको छ ।’


मार्सल आर्ट्स र व्यक्तिगत स्पर्धाको कुरा बेग्लै । टिम गेममा फाइनलमा पुग्नुको अर्थ र महत्त्व धेरै छ । महिला कबड्डीले पनि आफ्नो घरेलु भूमिमा त्यही इतिहास कोरेको छ । साग सुरु हुनुभन्दा केही दिनअगाडि मात्रै महाराष्ट्रको कोलापुरबाट स्वदेश फिरेको कबड्डी टोलीको फाइनल प्रवेशलाई महत्त्वपूर्ण रूपमा हेरिएको छ । ‘यसअघि भारतसँग हारे पनि उसका कमजोरी पत्ता लगाएका छौं । दिमाग लगाएर खेल्नेछौं । इतिहास लेख्ने अवसर आएको छ । त्यो हातबाट फुत्किन दिनेछैनौं,’ कप्तान बस्नेतले भनिन् ।


पुरुष कबड्डीमा उल्लेख्य केही गर्न नसके पनि महिलाले भने आशा देखाएको मुख्य प्रशिक्षक भाटले बताए । टोलीको प्रदर्शनले सन्तुष्ट देखिएका भाटले भने, ‘भारतविरुद्ध जितका लागि त्यहीअनुरूप तयारी, रणनीति र योजना बनाएका छौं । हामी जिते नजिक पुगेका छौं ।’ भाट महिला र पुरुष दुवै टोलीलाई प्रशिक्षण दिँदै आएका छन् ।


भारत कबड्डीमा बलियो मानिन्छ । दक्षिण एसियाका अन्य मुलुकको तुलनामा उसको स्तर धेरै माथि छ । बंगलादेश र श्रीलंकालगायत देशको पनि स्तर नेपालको भन्दा उच्च थियो । यसपटक भने नेपाली टोलीले बंगलादेशलाई ३६–२५ र श्रीलंकालाई २८–२४ अंकले पन्छाएको थियो । भारतसँगको खेल भने गुमाएको थियो । केही दिनअघि भलिबलमा पनि यस्तै दृश्य दोहोरिएको थियो । बंगलादेश र श्रीलंकालाई जिते पनि भारतसँग हारेको महिला भलिबल टोली अंकका आधारमा फाइनलमा फेरि भारतसँगै भिडेको थियो । कबड्डीमा पनि त्यही परिदृश्य दोहोरिएको छ ।


दक्षिण एसियामा कबड्डीको ‘सुप्रिम पावर’ नै मानिन्छ भारत । बंगलादेशको राष्ट्रिय खेल नै कबड्डी भएबाटै बुझ्न सकिन्छ उसले यो खेललाई दिएको प्राथमिकता । भारत, श्रीलंका, बंगलादेश, पाकिस्तान र नेपालले यसपटकको सागमा भाग लिएका थिए ।


कबड्डीमा नेपालको अन्तर्राष्ट्रिय सहभागिताको इतिहास लामो भए पनि जितको संयोग भने बिरलै जुरेको छ । परम्परागत शक्ति भारतसँगको फाइनल प्रतिस्पर्धालाई निकै संघर्षपूर्ण आँकिएको छ । तर घरेलु मैदान र समर्थकमाझ परिणाम आफ्नो पक्षमा पार्ने ठूलो दबाबबीच महिला कबड्डी टोली गुज्रिरहेको छ । ‘मैदान र समर्थक हाम्रो साथमा छन्, खेलाडीले पनि त्यहीअनुरूप निकै मिहिनेत गरिरहेका छन्,’ मुख्य प्रशिक्षक भाटले भने, ‘महिला टोलीलाई फाइनलसम्म पुर्‍याउने सुरुआती लक्ष्य थियो । त्यो लक्ष्य पूरा भइसकेको छ । अब स्वर्ण हात पार्ने दाउमा छौं ।’


महिला खेलाडीलाई साउनदेखि नै मुख्य प्रशिक्षक भाट, सहायक प्रशिक्षकद्वय पार्वती राई र विष्णुदत्त भट्टले प्रशिक्षण दिँदै आएका छन् । बंगलादेशमा सम्पन्न ११ औं सागमा पुरुष खेलाडीले कांस्य पदक हात पारेका थिए ।

महिला खेलाडीले पनि बंगलादेश र तीन वर्षअघि भारतको गुवाहाटी–सिलोङमा सम्पन्न १२ औं सागमा देशका लागि कांस्य भित्र्याएका थिए । यसपल्ट पुरुषमा राम्रो नतिजा नआए पनि महिलामा भने नेपाल फाइनलमा पुगेको छ । गुवाहाटी सागमा महिलाले कांस्य जित्दाका खेलाडी कोषमाया र मेनुका राजवंशी टोलीका मेरुदण्ड बनेर मैदानमा छन् ।


महिला टिम

कोषमाया बस्नेत, मेनुका राजवंशी, अनुजा कुलुङ राई, मानमती विष्ट, गंगा धामी, कमला थापा, हरिना थापा, जयन्ती बडू, रविना चौधरी, इसुदा गिरी, पुस्तिका चौधरी र सरिता भुजेल


प्रकाशित : मंसिर २३, २०७६ १०:३०

प्रतिक्रिया
पठाउनुहोस्

बक्सिङमा नेपाल–भारत स्वर्णका लागि भिड्ने

कुशल तिमल्सिना

काठमाडौँ — १३ औं दक्षिण एसियाली खेलकुद (साग) अन्तर्गत बक्सिङको तेस्रो दिन आइतबार थप दुई नेपाली खेलाडीले फाइनलमा स्थान बनाएका छन् । कुल १६ स्वर्णका लागि भएको प्रतिस्पर्धामा नेपालका ९ खेलाडीले फाइनल खेल्नेछन् । फाइनल खेल सोमबार र मंगलबार हुनेछ । 

सातदोबाटोस्थित कराते हलमा जारी प्रतियोगितामा आइतबार महिला ५१ केजीमुनि माला राईले श्रीलंकाकी कोसाला निल्मिनीलाई पराजित गरी कम्तीमा रजत पदक पक्का गरिन् । मालाले स्वर्णका लागि भारतकी पिंकी रानीसँग प्रतिस्पर्धा गर्नेछिन् । सेमिफाइनलमा पिंकीले पाकिस्तानकी अजिज राजिया बानोलाई अंकका आधारमा हराइन् ।

पुरुष ६० केजीमुनि नेपालका सनिल शाहीले श्रीलंकाका जीवान्था निशान्कालाई अंककै आधारमा हराउँदै फाइनलमा भारतका वीरेन्दर सिंहसँगको भेट पक्का गरे । सेमिफाइनलमा वीरेन्दरले बंगलादेशका सुराकृष्ण चाकमालाई अंकका आधारमा हराएका हुन् ।

पुरुष लाइट हेभीवेट ८१ केजीमुनिमा नेपालका गणेश प्रधानले भारतका सचिन कुमारलाई आरएससीका आधारमा हराए फाइनलमा स्थान बनाए । उनले स्वर्णका लागि श्रीलंकाका रुमेश सन्दकेलुमसँग खेल्नेछन् । रुमेशले सेमिफाइनलमा पाकिस्तानका अवाइस अली खानलाई अंकका आधारमा ढाले ।

महिला ५७ केजीमुनि चन्द्रकला थापा श्रीलंकाकी कृष्मी अयोमा दुलान्जसँग अंकका आधारमा पराजित भएपछि कांस्यमै सीमित भइन् । दुलान्जले स्वर्णका लागि भारतकी सोनिया लाथरसँग प्रतिस्पर्धा गर्नेछिन् । सेमिफाइनलमा सोनियाले पनि पाकिस्तानकी मेहरिनलाई पराजित गरेकी हुन् । पुरुष ५२ केजीमुनिमा नेपालका तेजबहादुर देउवाले भारतका स्पर्श कुमारसँग अंकका आधारमा पराजय बेहोरे । फाइनलमा स्पर्श र पाकिस्तानका मोहम्मद अफिफ सायेदबीच प्रतिस्पर्धा हुनेछ । अफिफले सेमिफाइनलमा श्रीलंकाका इरान्डा लासिनुलाई पराजित गरेका हुन् ।

पुरुष ६९ केजीमुनि नेपालका विकास लामा पनि भारतका कृशन विकाससँग अंकका आधारमा पराजित हुँदै कांस्यमै सीमित भए ।

बक्सिङका ८ स्पर्धाका फाइनल सोमबार हुनेछ । सोमबार महिला ४८ केजीमुनि ललिता महर्जनले भारतकी कलाइभिनी श्रीनिवासनसँग प्रतिस्पर्धा गर्नेछिन् । ५४ केजीमुनिमा नेपालकी मीनु गुरुङले पनि भारतकी शिक्षासँग स्वर्णका लागि खेल्नेछिन् ।

६० केजीमुनि संगीता सुनारले भारतीय प्रभिनसँग नै खेल्नेछिन् । पुरुष ६९ केजीमुनिमा भूपेन्द्र थापाले भारतका मनीष कौसिकसँग खेल्नेछन् । यसबाहेक सोमबार पुरुष ४९ केजी, ५६ केजी, ७५ केजी र ९१ केजी तौलको फाइनल खेल हुनेछ । बाँकी ८ स्पर्धाको फाइनल १३ औं सागको अन्तिम दिन मंगलबार हुनेछ ।

नेपालका ८१ केजीका गणेश प्रधानबाहेक सबै खेलाडीको फाइनल प्रतिस्पर्धी भारतीय नै छ । नेपाली बक्सिङ टोलीका प्रशिक्षक प्रकाश थापामगरका अनुसार दक्षिण एसियाली क्षेत्रमा निकै बलियो टोली भारतीय बक्सरसामु फाइनलमा चुनौती पस्कन नेपाली बक्सरलाई घरेलु रिङ र समर्थकको हौसलाले थप सहयोग पुग्नेछ ।

‘सत्य कुरा भन्नुपर्दा दक्षिण एसियामा हामीभन्दा भारतको स्तर निकै माथि छ । उनीहरूले एसियाली खेलकुद र विश्व च्याम्पियनसिपमा पदक जितिसकेका छन् । हामीले २ देखि ३ वटासम्म स्वर्णको अपेक्षा गरेका छौं, हाम्रै भूमिमा आयोजना भएको प्रतियोगिता र घरेलु समर्थकले हाम्रा खेलाडीलाई थप हौसला पुर्‍याउने छन्,’ आठौं साफका स्वर्ण विजेता थापामगरले भने ।

प्रकाशित : मंसिर २३, २०७६ १०:०९
पूरा पढ्नुहोस्
प्रतिक्रिया
पठाउनुहोस्
×