कान्तिपुर वेबसाईट
AdvertisementAdvertisement

तेक्वान्दोमा सबैले जिते पदक

कुशल तिमल्सिना

काठमाडौँ — १३ औं दक्षिण एसियाली खेलकुद (साग) मा तेक्वान्दोतर्फ नेपालले १२ स्वर्ण पदक जितेको छ । यो २० वर्षअघि नेपालमै भएको आठौं दक्षिण एसियाली खेलकुदयता सबैभन्दा उत्कृष्ट नतिजा हो । २९ स्वर्णका लागि भएको स्पर्धामा नेपालका कुनै पनि खेलाडी पदकविहीन रहेनन् ।

सातदोबाटोस्थित राष्ट्रिय तेक्वान्दो एकेडेमीको हलमा प्रतियोगिताको चौथो तथा अन्तिम दिन बिहीबार ६ स्वर्णको छिनोफानो हुँदा ३ नेपाली खेलाडी फाइनलमा पराजित हुन पुगे । प्रतियोगिताको अन्तिम स्पर्धाको रूपमा पुरुष ८७ केजीमुनि भूपेन श्रेष्ठले नेपालका लागि १२ औं स्वर्ण दिलाएका हुन् । आठौं साफमा १६ स्वर्णमध्ये नेपालले १४ स्वर्ण र २ रजत जितेको थियो । यसपल्ट २९ स्वर्णका लागि भएको स्पर्धामा नेपालले १२ स्वर्ण, ६ रजत र ११ कांस्य जितेको छ । यसमध्ये पहिलोपल्ट समावेश भएको पुम्सेबाट ७ स्वर्ण, १ रजत र ५ कांस्य तथा ग्योरोगीतर्फ नेपालले ५ स्वर्ण, ४ रजत र ७ कांस्य पदक जितेको छ ।


बिहीबार भूपेनले भारतका अक्षय हुडालाई २९–२७ अंकको प्रतिस्पर्धात्मक खेलमा पराजित गरी स्वर्ण जितेका हुन् । पहिलो राउन्डमा ८–७ को अग्रता बनाएका भूपेनले दोस्रो चरणमा १४–१२ को जितसहित १९–२० को झिनो अग्रता बनाए । तेस्रो चरणमा लगातार दुई ब्याक किक प्वाइन्टसँगै भूपेनले खेल आफ्नो पक्षमा पारेका हुन् । ‘अगाडि हाम्रा साथीहरू लगातार पराजित हुँदा दबाब परेको थियो । सेमिफाइनलमा बंगलादेशी खेलाडीसँग त्यति कठिन भएन,’ कोटेश्वर डोजाङका उत्पादन २१ वर्षीय भूपेनले भने, ‘फाइनलमा गाह्रो भएको थियो । विपक्षी खेलाडी थाकिसकेका थिए त्यसैले उनको कमजोरी पत्ता लगाएर खेल्न सकें, देशका लागि पदक जित्न पाउँदा खुसी छु ।’


अन्तिम दिन तीन खेलाडी फाइनलमा पराजित हुन पुगे । ७३ केजीमुनि सन् २००६ मा श्रीलंकामा सम्पन्न दसौं सागकी स्वर्ण विजेता मनिता शाहीले फाइनलमा भारतकी मार्गरेट मारिया रेगीसँग १५–० को लज्जास्पद स्कोरमा पराजय बेहोरिन् । कुनै पनि राउन्डमा विपक्षीलाई चुनौती दिन नसकेकी मनिताले तीन राउन्डमा क्रमशः ६–०, ७–० र २–० को हार बेहोरेकी हुन् । यसअघि मनिता श्रीलंकाकी सचिता प्रमोदिनीविरुद्ध २९–२ को जित निकाल्दै फाइनल पुगेकी थिइन् । मार्गरेटले सेमिफाइनलमा बंगलादेशकी श्रवणी विश्वासलाई हराएकी थिइन् । ८० केजीमुनिमा किरणबहादुर आले फाइनलमा पाकिस्तानका रब नवाजसँग ३३–७ अंकले पराजित भए ।


नवाजले एकपक्षीय जित निकालेको खेलको तेस्रो राउन्डमा किरणले पुनरागमन प्रयास गर्दा ढिला भइसकेको थियो । सुरुआती दुई राउन्ड ३–१४, ०–१६ ले पछि परेका उनले तेस्रो राउन्ड ४–३ ले जितेका थिए । किरण पहिलो चरणमा बंगलादेशका मोहम्मद मासुम खानलाई ४५–७ र सेमिफाइनलमा भारतका लक्ष्यलाई ३६–२१ को स्कोरमा पराजित गरी फाइनलमा पुगेका हुन् । पाकिस्तानका नवाजले सेमिफाइनलमा श्रीलंकाका सुरङगा दिहानलाई पराजित गरेका थिए ।


६७ केजीमुनि फाइनलमा अप्सरा कार्कीले भारतकी रुचिका श्रीरांग भाबेसँग ८–५ को स्कोरमा हार बेहोरिन् । पहिलो राउन्डमा ०–४ ले पछि परेकी उनले दोस्रो राउन्डमा २–३ र तेस्रो राउन्डमा ३–१ ले गुमाइन् । अप्सराले सेमिफाइनलमा बंगलादेशकी मोस्ट सल्मा खातुनलाई ८–० को स्कोरमा हराइन् । स्वर्ण विजेता रुचिकाले सेमिफाइनलमा भुटानकी सोनम याङसोलाई ३१–१ स्कोरमा हराएकी थिइन् ।


पुरुष ५८ केजीमुनि तौलमा गोविन्दबहादुर आले सेमिफाइनलबाट माथि जान सकेनन् । पाकिस्तानका हारुन खानसँग ३४–२६ को स्कोरमा पराजित उनले पहिलो चरणमा भुटानका दोर्जी छिरिङलाई ५८–१६ को स्कोरमा पराजित गरे । उनै हारुनले भारतका नीरज दिलीप चौधरीलाई हराएर स्वर्ण जिते । निकै प्रतिस्पर्धात्मक बनेको फाइनलमा हारुनले तेस्रो राउन्डमा सानदार पुनरागमन गर्दै १४–९ ले पछि रहेको स्थिति उल्टाएर २७–१८ को जित निकालेका हुन् ।


नेपालले स्वर्णको आशा गरेकी युनिशा राई पनि सेमिफाइनलमै पराजित भइन् । ४९ केजीमुनि युनिशाले पहिलो चरणमा बंगलादेशकी फरहाना नाज्निन लिपालाई ५६–१७ को स्कोरमा हराइन् । तर भारतकी पूर्वा दत्तात्रय दीक्षितसँग २७–२२ को प्रतिस्पर्धात्मक स्कोरमा पराजित भएपछि उनको स्वर्ण सपना तुहियो । उनै दीक्षितले श्रीलंकाकी इरांगानी पुष्पालाई १४–३ को स्कोरमा हराउँदै स्वर्ण जितिन् ।


तेक्वान्दोका पदक विजेता

स्वर्ण १२

पुम्से

कमल श्रेष्ठ, पुरूष एकल (२३–२९ वर्ष)

सिना मादेन लिम्बू, महिला एकल (१७–२३ वर्ष)

पार्वती गुरूङ, महिला एकल (२३–२९ वर्ष)

आयशा शाक्य, महिला एकल (२९ वर्षमाथि)

सञ्जीवकुमार ओझा र आयशा शाक्य,

युगल (२९ वर्षमाथि)

निशा दर्नाल, स्वस्तिका तामाङ र सन्जिला तिमल्सिना, महिला टिम (१७–२३ वर्ष)

नीता गुरूङ, प्रशंसा क्षेत्री, सुशीला राई, महिला टिम (२३ वर्षमाथि)

ग्योरोगी

काजल श्रेष्ठ (४६ केजीमुनि)

संगीता बस्याल (६२ केजीमुनि)

वीरबहादुर महरा (६८ केजीमुनि)

भूपेन श्रेष्ठ (८७ केजीमुनि)

सक्षम कार्की (८७ केजीमाथि)

रजत– ६

पुम्से

कृष्णबहादुर तामाङ, पुरूष एकल (१७–२३ वर्ष)

ग्योरोगी

निमा गुरूङ (५७ केजीमुनि

अप्सरा कार्की (६७ केजीमुनि)

मनिता शाही (७३ केजीमुनि)

निशा रावल (७३ केजीमाथि)

किरणबहादुर आले (८० केजीमुनि)

कांस्य–११

पुम्से

रेजिन रिमाल, पुरूष एकल (२९ वर्षमाथि)

अस्मिन राउत र सिना मादेन लिम्बू,

युगल (१७–२३ वर्ष)

जितबहादुर बोट र पार्वती गुरूङ, युगल (२३–२९ वर्ष)

शिशिर श्रेष्ठ, अस्मिन राउत र दीपेन्द्र गुरूङ, पुरूष टिम (१७–२३ वर्ष)

कमल श्रेष्ठ, जितबहादुर बोट र प्रेमबहादुर लिम्बू,

पुरूष टिम (२३ वर्षमाथि)

ग्योरोगी

युनिशा राई (४९ केजीमुनि)

अस्मिता खड्का (५३ केजीमुनि)

गोविन्दबहादुर आले (५८ केजीमुनि)

मनोज मल्ल (५४ केजीमुनि)

ज्ञानेन्द्र हमाल (६३ केजीमुनि)

निश्चलमान श्रेष्ठ (७४ केजीमुनि) प्रकाशित : मंसिर २०, २०७६ ०९:४१

प्रतिक्रिया
पठाउनुहोस्

संगीता र सक्षमको उस्तै खुसी

कुशल तिमल्सिना

काठमाडौँ — १३ औं दक्षिण एसियाली खेलकुदको तेक्वान्दोमा बुधबार नेपालले २ स्वर्ण पदक थपेको छ । अनुभवी खेलाडी सक्षम कार्की र नयाँ खेलाडी संगीता बस्यालले आ–आफ्नो स्पर्धामा सफलता पाए । समानता के रह्यो भने दुवैको पहिलो अन्तर्राष्ट्रिय स्वर्ण थियो । 

सक्षमले ८७ केजीमाथि हेभीवेटमा पाकिस्तानका वाकर अलीलाई २७–९ अंकमा हराएर स्वर्ण सपना पूरा गरे ।

परिवारसहित घरेलु समर्थकको उल्लेख्य साथ पाएका उनले पहिलो राउन्डमा ३–३ को बराबरी खेले । सुरुमा सुस्त देखिए पनि दोस्रो राउन्डमा दुई ब्याककिक र दुई पन्च प्रहारपछि सक्षमले दोहोरो अंक बनाउन सके । यस राउन्डमा १६–४ ले अगाडि बढेका उनले तेस्रो राउन्डमा पनि ८–२ को एकपक्षीय अग्रता निकाले ।

‘म राष्ट्रिय टोलीमा अनुभवी खेलाडीको रूपमा चिनिन्छु । हिजो (मंगलबार) को स्पर्धामा वीर (महरा), काजल (श्रेष्ठ) स्वर्ण जिते । मनोज (मल्ल) र निमा (गुरुङ) ले स्वर्ण जित्न नसक्दा हामीलाई पनि दबाब बढेको थियो । साथीहरूले मिहिनेत गर्दागर्दै स्वर्ण चुकेको देखेपछि आफूलाई अझै राम्रो गर्नुपर्छ भन्ने छुट्टै खाले दबाव हुँदोरहेछ,’ फाइनलमा सफलता पाएपछि सक्षमले भने ।

यसअघि सक्षमले पहिलो चरणमा बंगलादेशका मोहम्मद मिजानुर रहमानलाई हराए । सेमिफाइनलमा श्रीलंकाका सिया बालापिटियागेमाथि ३२–११ अंकको जित रचे । यो जितलाई उनले बदलाको रूपमा अर्थ्याएका छन् । सन् २०१६ मा सक्षमले ८० केजीमुनि स्पर्धाको फाइनलमा भारतका नवजित मानसँग हार बेहोरेका थिए ।

‘यो अहिलेसम्मको अनुभवमा सबैभन्दा खुसीको दिन रह्यो किनभने आफ्नै घरमा स्वर्ण जित्नु भनेको एउटा खेलाडीका लागि यो भन्दा धेरै खुसी अरु हुँदैन,’ उनले थपे, ‘एक प्रकारको बदलाजस्तै भएको छ । त्यतिबेला पनि जितनजिक पुगेर हार्नुपरेको थियो, धेरै अंकअन्तर थिएन । मनमा खिन्न चाहिँ भइरहेको थियो । नेपालले ३ स्वर्ण जित्यो । तेक्वान्दोले एउटै जित्न सकेन । स्वर्ण र रजतको फरक त्यतिबेला बुझिएको थियो । यसपल्ट देशले धेरै स्वर्ण जितेको छ मेरो तर्फबाट पनि एउटा थप्न पाउँदा गर्व लागेको छ ।’

कोटेश्वर डोजाङका उत्पादन २३ वर्षे सक्षमले सागका कीर्तिमानी दीपक विष्टलगायतको प्रशिक्षण टिमलाई जितको श्रेय दिए । ‘चीनमा हामीले महत्त्वपूर्ण प्रशिक्षण र प्रतियोगिता खेल्यौं, यसले शारीरिक र मानसिक रूपमा तयार बनाउन सहयोग गर्‍यो । तयारीअनुसार नै यो सफलता मिलेको हो,’ उनले थपे, ‘म २०१३ मा राष्ट्रिय क्याम्पमा परेको थिएँ । त्यतिबेला दीपक गुरुले भन्नुभएको थियो कि ‘आई वाज द वान, आई एम द वान एन्ड आई वील बी द वान’ । गुरुको त्यो भनाइले मलाई थप मिहिनेत गर्न उर्जा मिलेको छ ।’

सक्षम दक्षिण एसियाली खेलकुदको इतिहासमा नेपालका लागि सयौं स्वर्ण जित्ने खेलाडीसमेत बनेका छन् । १३ संस्करणसम्म आइपुग्दा नेपालले बुधबार सय स्वर्ण पदको कोसेढुंगा छोएको छ । १२ औं संस्करणसम्म पुग्दा ७१ स्वर्ण जितेको नेपालले यस संस्करणको २९ औं स्वर्ण सक्षमले जितेका छन् । ‘यो त अर्को ठूलो समाचार भयो । यो खुसी कसरी व्यक्त गर्ने, केही सोच्नै सकेको छैन । म भाग्यमानी रहेछु,’ उनले हाँस्दै भने ।

संगीताको स्वर्ण
चितवनकी २५ वर्षीया संगीताले तेक्वान्दो खेल्न थालेको ७ वर्ष भयो । यसअघि १२ औं सागको छनोटमा आयशा शाक्यसँग पराजित भएपछि उनको साग सपना धकेलिएको थियो । १२ औं सागबाट फर्किएपछि आयशा निस्क्रिय भएपछि संगीतालाई अवसर आयो । १८ औं एसियाली खेलकुदमा पहिलोपल्ट राष्ट्रिय टोलीमा परेकी उनी पहिलो खेलमै फिलिपिन्सकी डर्लेन अर्पोनसँग पराजित भइन् ।

यसपल्ट सागको पहिलो सहभागितामै उनले स्वर्ण जित्ने क्रममा भारतकी गंगाजोत गिललाई १९–८ को स्कोरमा पराजित गरिन् । संगीताले पहिलो राउन्डमा ७–३ को अग्रता लिइन् । दोस्रोमा ४–२ र तेस्रोमा ८–३ को अग्रतासहित पहिलो अन्तर्राष्ट्रिय स्वर्णको स्वाद घरेलु एरिनामै लिन पाइन् ।

संगीताले यसअघि श्रीलंकाकी मनीषा साम्राजिवालाई ४९–५ ले हराएकी थिइन् । ‘मैले आफ्नो योजनाअनुसार खेल्न सकिनँ । घरेलु दर्शकको साथ भए पनि फाइनलमा अर्कैखाले डर र दबाब थियो । त्यसबाट माथि उठेर आफूले सकेको खेल्न सकें । देशका लागि स्वर्ण जित्न पाउँदा धेरै खुसी छु । विपक्षीहरू राम्रा थिए,’ संगीताले स्वर्ण जितेपछि भनिन्, ‘आज हाम्रा साथीहरू लगातार हारिरहेका थिए । फाइनलमा पुगेपछि मलाई जित्ने अवसर आएको थियो, जसरी पनि जित्नुपर्छ भन्ने सोचेर खेलेको थिएँ ।’

संगीताले आफ्नो स्वर्ण प्रशिक्षकप्रति समर्पित गरिन् । ‘गुरुहरूले धेरै हौसला दिनुभएको थियो । उहाँहरूको अपेक्षालाई मर्न दिइनँ,’ उनले थपिन्, ‘मेरा लागि यो उपाधि धेरै नै महत्त्वपूर्ण किन छ भने यसले अझै मिहिनेत गरेर यो भन्दा ठूलो सफलताका लागि सधैं प्रेरित गरिरहने छ ।’

राष्ट्रिय तेक्वान्दो एकेडेमीको हलमा बुधबार ग्योरोगीतर्फ ६ स्वर्णका लागि भएको स्पर्धामा २ नेपाली खेलाडीले पहिलो स्थान हासिल गर्न सफल रहे । ओलम्पियन निशा रावल ७३ केजीमाथिको फाइनलमा भारतकी रोदाली बारुवासँग ३२–९ अंकले पराजित भइन् ।

श्रीलंकाकी नुवान्थी लक्मलीलाई ३६–१० ले हराएर फाइनलमा पुगेकी उनको प्रदर्शन अपेक्षाकृत कमजोर रह्यो । उनले पहिलो राउन्डमा १–९, दोस्रो राउन्डमा ३–७ र तेस्रो राउन्डमा ६–१६ ले पछाडि रहिन् । फाइनलको अन्तिम सेटमा उनको स्टामिना पनि निकै खस्किएको थियो । महिला ५३ केजीमुनि अस्मिता खड्का, पुरुष ६३ केजीमुनिमा ज्ञानेन्द्र महाल र पुरुष ७४ केजीमुनि निश्चलमान श्रेष्ठ सेमिफाइनलमा पराजित भए ।

बंगलादेशकी निगर सुल्तानमाथि ४०–९ को स्कोरमा प्रभावशाली जित निकालेर सेमिफाइनलमा पुगेकी अस्मिताले भारतकी लतिका भण्डारीसँग ३४–११ को स्कोरमा हार बेहोरिन् । उनै लतिकाले पाकिस्तानकी अनेला अयशा अफ्सरलाई ४०–१० ले हराई स्वर्ण जितिन् । अफ्सरले सेमिफाइनलमा श्रीलंकाकी दसुनी निमेशालाई पराजित गरेकी थिइन् ।

निश्चलमान पनि भुटानका गावाङ योङतेनलाई ११–४ को स्कोरमा जित निकाल्दै सेमिफाइनल पुगेका थिए । उनी भारतका जर्नेल सिंहसँग २५–११ को स्कोरमा पराजित भए । भारतीय सिंहले फाइनलमा पाकिस्तानका जबरान असद खानलाई ४१–२६ ले हराए । खानले श्रीलंकाका दर्शना नुवानलाई पराजित गरी सिंहसँगको फाइनल भेट पक्का गरेका थिए । ज्ञानेन्द्र हमाल सेमिफाइनलमा भारतका सौरभसँग २५–२४ को झिनो स्कोरमा पराजित भए ।

उनले भुटानका मिग्मा वाङचुक तामाङलाई पराजित गरी सेमिफाइनल पुगेका थिए । ज्ञानेन्द्रलाई हराएका सौरभ फाइनलमा पाकिस्तानका महमुद खानसँग टाइब्रेकमा पराजित भए । फाइनलमा दुवैको १८–१८ अंक भएपछि टाइब्रेकमा खानले पहिलो अंक बटुल्दै स्वर्ण जिते ।

तेक्वान्दोको तेस्रो दिन नेपालले २ स्वर्ण, १ रजत र ३ कांस्य जित्यो । योसँगै तेक्वान्दोको २९ मध्ये २३ स्वर्णको छिनोफानो भएको छ । त्यसमध्ये नेपालले ११ स्वर्ण, ३ रजत र ९ कांस्य जितेको छ । अन्तिम दिन बिहीबार ६ स्वर्णको छिनोफानो हुनेछ ।

प्रकाशित : मंसिर १९, २०७६ ०८:१९
पूरा पढ्नुहोस्
प्रतिक्रिया
पठाउनुहोस्
×