नेपालद्वारा भुटान ४-० गोल अन्तरले पराजित

हिमेश

काठमाडौँ — नेपालका लागि भुटान अब फुटबलमा पहिलेजस्तो सजिलो प्रतिद्वन्द्वी रहेन । तर अझै प्रिय प्रतिद्वन्द्वी भने हो । किनभने नेपालले भुटानविरुद्धको खेल भनेपछि राम्रो खेल्छ, भुटानले नेपाल भनेपछि आत्तिएर खेल्छ । १३ औं दक्षिण एसियाली खेलकुद (साग) को मंगलबार पुरुष फुटबलमा यी दुई देशबीचको खेलको वास्तविक कथा यही रह्यो । यो कथा हो, दशरथ रंगशालामा नेपाली फुटबल औपचारिक रूपमा फर्केको अवसर पनि ।

ZenTravel

भूकम्प गएयता नेपालका खेलाडीले दशरथ रंगशालामा खेल्न पाएको यो नै पहिलोपल्ट हो । यही निहुँमा विशेषत: नेपाली यू–२३ का खेलाडी खुसी देखाए । यो खुसीलाई खेलाडीले मैदानमा राम्रो प्रदर्शनमा परिणत पनि गरे । वास्तवमा यो खेल नेपालले लय समातेको अवसर थियो । नेपालको फुटबल हेर्न लामो समयपछि दशरथ रंगशाला पुगेका ७ हजार दर्शक पनि खुसी रहे । प्रशिक्षक बालगोपाल महर्जनले भने, ‘दशरथ रंगशालामा फुटबल खेल्न पाउनु नै सबैभन्दा ठूलो खुसी हो ।’

अझ कप्तान सुजल श्रेष्ठले यतिसम्म भने, ‘फुटबल खेलाडीको रूपमा हामी जन्मेहुर्केको नै यहीं हो ।’ सुरुमै सुजलको गोलले अग्रता लिएपछि नेपालले भुटानमाथि दबाब सिर्जना गर्न सफल रह्यो । भुटानी डिफेन्डर जिग्मे छिरिङ दोर्जेले आफ्नो पेनाल्टी एरियामा बल राम्रोसँग क्लियर गर्न नसकेपछि प्राप्त अवसरमा सुजलले छैटौं मिनेटमा नजिकको दूरीबाट प्रहार गर्दै गोल गरे । दोस्रो गोल सुजलकै नाममा रह्यो । उनले ५१ औं मिनेटमा चलाखीपूर्ण गोल गरे ।

भुटानी गोलरक्षक किन्ले तेन्जिङ अगाडि बढेको मौका छोपेर उनले बललाई हल्का उचाइ दिए । त्यसले पोस्टको दिशा लियो । अभिषेक रिजालले ६६ औं मिनेटमा तेस्रो गोल गरे । सुनील बलको फ्रि–किकलाई अनन्त तामाङले हेड गर्दै पास मिलाए । त्यसैलाई अभिषेकले निर्णायक हेड गरे । मिक्चेन तामाङले गरेको चौथो गोल अझ सुन्दर थियो । उनले ७७ औं मिनेटमा प्राप्त फ्रि–किकमा बललाई घुमाउरो बाटो तय गर्न लगाए । त्यही बल सबैलाई छक्याउँदै पोस्टतर्फ प्रवेश गर्‍यो ।

खेलपछि भुटानी प्रशिक्षक पेमाले आफ्नो टिमको हारमा प्रस्तुत गरेको तर्क भने न्यायसंगत थियो । भुटानले २४ घण्टाभन्दा कम समयमा खेल्नुपरेको थियो, त्यसैले उनका खेलाडी थाकेका थिए । थाकेको सुरुमा भुटानी खेलाडीले राम्रो गर्न सकेनन् । भुटानले अघिल्लो दिनमात्र संघर्षपूर्ण खेलमा बंगलादेशलाई हराएको थियो । लगातार दुई खेलपछि अब भुटानले आरामको अवसर पाउनेछ भने नेपाल बुधबार नै श्रीलंकाविरुद्ध अर्को खेलमा ओर्लिने छ ।

भुटानी प्रशिक्षक पेमालाई रेफ्रीको निर्णयमा गुनासो थियो । मंगलबारै दोस्रो खेलमा माल्दिभ्स र बंगलादेशले १–१ को बराबरी खेले । बंगलादेशले सुरुमा अग्रता लियो । त्यो आत्मघाती गोल रह्यो । माल्दिभ्सका कप्तान अक्रम अब्दुल घानीले ३० औं मिनेटमा त्यो दुर्भाग्यपूर्ण गोल गरे । माल्दिभ्सले ७० औं मिनेटमा बराबरी गोल फर्कायो । इब्राहिम महोदीले नजिकबाट यो गोलका लागि शक्तिशाली प्रहार गरेका थिए ।

नेपाल पाँच टिमसम्मिलित प्रतियोगिताको राउन्ड रोबिनको शीर्षस्थान छ । दुई खेलिसकेको भुटान भने समान ३ अंकमा दोस्रो स्थानमा छ । माल्दिभ्स लगातार दोस्रो बराबरीपछि २ अंक लिएर तेस्रोमा छ । १–१ अंकमा श्रीलंका र बंगलादेश छन् । शीर्ष दुई स्थानमा रहने टिमले फाइनल यात्रा गर्नेछन् ।

प्रकाशित : मंसिर १७, २०७६ १५:१५
ADVERTISEMENT
प्रतिक्रिया
पठाउनुहोस्
ADVERTISEMENT

सर्तकताको घण्टी बज्यो : नेपाल

उपनिर्वाचनले नेकपा दबाबमा 
बबिता शर्मा

काठमाडौँ — ५२ पदका लागि भएको उप–चुनावमा बहुमत सीट आफ्नो खातामा गए पनि एउटा प्रदेशसभा र एक उपमहानगरपालिका गुमाएपछि नेकपामाथि दबाब बढेको छ । 

पार्टी एकता भएको र प्रधानमन्त्री केपी शर्मा ओलीले सरकारले राम्रो काम गरिरहेको दावी गरिरहँदा दुई महत्वपूर्ण ठाँउमा भएको हारले नेकपामाथि दबाब सिर्जना भएको हो। पार्टीका शीर्ष नेताले नै अपेक्षाकृत नतिजा नआएको भनेर पार्टी र सरकारको कामको समीक्षा गर्नुपर्ने माग गर्नाले पनि बढ्दो दबाबको संकेत गर्छ।

यसबाहेक नेकपाको खाताबाट एउटा प्रदेशसभा र एक उपमहानगरपालिका खोस्न सफल भएको प्रमुख प्रतिपक्षी दल कााग्रेसले उपचुनावपछि पार्टीको आत्मबल बढेको भनेर नेकपामाथि दबाब बनाउने रणनीति शुरु गरिसकेको छ। यस्तोमा चुनावी समीक्षा नेकपाका लागि अव अनिवार्य बन्न गएको छ, जुन विषय शीर्ष नेताहरुले समेत उठाउन थालिसकेका छन्।

नेकपा वरिष्ठ नेता माधवकुमार नेपालले उपनिर्वाचनमा अपेक्षा अनुरुको परिणाम नआएको भन्दै पार्टी बैठकमा समीक्षा हुने बताए।

‘नतिजाले के–के फ्याक्टरले गर्दा हामीले चुनावमा अपेक्षित सफलता हासिल गर्न सकेनौं, अपेक्षा गरिएको ठाउँमा जित्न सकेनौं,’ नेता नेपालले भने, ‘बलियो पकड भएको ठाउँमा गुमायौं। पार्टीको बैठकमा यसबारे राम्रो समीक्षा हुन्छ।’

नेता नेपालले उपनिर्वाचनको नतिजाले सतर्कको घण्टी बजेको बताए। ‘राम्रो संकेत छैन। तर नराम्रो भइहाल्यो भन्ने निश्कर्षमा पुग्न हुँदैन,’ नेता नेपालले कान्तिपुरसँग भने, ‘एउटा घण्टी बज्यो, सतर्क हुने घण्टी बजेको हुँदा समीक्षा गर्नुपर्छ।’

नेकपा नेता झलनाथ खनालले चुनावले नेकपालाई समीक्षा गर्नुपर्ने ठाँउमा पुर्‍याएको प्रतिक्रिया दिएका छन्। चुनावी नतिजालगत्तै उनले संचारमाध्यमहरुलाई दिएको प्रतिक्रियामा धरान र भक्तपुरको हार पार्टी बैठकमा समीक्षा हुने बताएका छन्।

सरकारमाथि प्रश्न उठाउन मिल्दैन : सल्लाहकार
प्रधानमन्त्रीका प्रेस सल्लाहकार तथा नेकपाका प्रचार विभाग उपप्रमुख सूर्य थापा भने चुनावी नतिजालाई लिएर सरकारको काममाथि प्रश्न उठाउने ठाँउ नरहेको बताउँछन्। सरकार र पार्टीको अनुचित आलोचना जनताले अस्वीकार गरेको थापाको दावी छ।

थापाले सामाजिक सञ्जालमा लेखेका छन्, ‘स्थानीय, प्रदेश र संघीय संसदका रिक्त ५२ स्थानमा भएको उपनिर्वाचनमा नेकपाले ३१ (५९ दशमलव ८५) स्थानमा विजय हासिल गरेको छ। ‘एकताअघि दुई पार्टीले २८ स्थान (५३.८५) जितेको थियो। अहिले ३ सीट (५ दशमलव ८५) बढी हासिल भयो।’

नेकपाकै विदेश विभाग उपप्रमुख विष्णु रिजालले भने नेकपाका लागि उपनिर्वाचनको परिणाम सुखद् नरहेको टिप्पणी गरेका छन्। ‘पार्टी एकताको संक्रमण, विभिन्न तहका सरकारहरूका काम, उम्मेद्वार चयन जस्ता कारणहरू आˆनो ठाउँमा छन्, यस परिणामले हामीलाई थप सजग पक्कै बनाएको छ। समय छ, परिणाममुखी काम गरेर मात्रै यसको क्षतिपूर्ति हुन्छ, तर्कले होइन,’ रिजालले सामाजिक संजालमा लेखेका छन्।

५२ स्थानमध्ये नेकपा नेतृत्वको वाम गठबन्धनले ३१ स्थानमा जित निकालेको छ। कांग्रेसले १३, समाजवादी पार्टीले ४, राष्ट्रिय जनता पार्टीले ३ र स्वतन्त्रले १ स्थानमा जितेका छन्। तर, २०७४ मा जितेको भक्तपुर १ ‘ख’ को प्रदेशसभा सदस्य र धरान उपमहानगरपालिका प्रमुख भने नेकपाले गुमाएको छ। यद्यपि यसअघि कांग्रेसले जितेको पाँचथरको फाल्गुनन्द गाउँपालिका र महोत्तरीको पिपरा गाउँपालिकाको अध्यक्ष नेकपाको हातमा आएको छ।

नेकपालाई दबाबमा राख्ने कांग्रेसको रणनीति
चुनावी नतिजा लगत्तै विपक्षी कााग्रेसले पनि नेकपालाई दवावमा राख्ने रणनीति लिने संकेत दिइसकेको छ।

‘अनेक प्रतिकूलताकाबीच मतदाताले मत प्रदान गरेर नेपाली कांग्रेसलाई विगतमा भन्दा समग्रमा बढी मत दिनुको अर्थ हो बितेको २१ महिनामा कांग्रेसले प्रस्तुत गरेको जिम्मेवार र शालिन प्रतिपक्षी भूमिकाको अनुमोदन’ भनेर कांग्रेसले सरकार र नेकपामाथि प्रश्न उठाएको छ।

चुनावी नतिजाले पार्टीका हौसला बढेको कााग्रेसको बुझाई छ। ‘२०७४ को तुलनामा नेपाली कांग्रेस र नेकपाका बीचको मतान्तर २०७६ मंसिर १४ मा आइपुग्दा घटेको छ। यसले एकातर्फ नेपाली कांग्रेसको सांगठनिक आत्मबलमा अभिवृद्धि गराएको छ भने अर्कोतर्फ आगामी निर्वाचनको लक्ष्य हासिल गर्ने दृढतामा अघि बढ्न उपनिर्वाचनको मैदानको झै ‘बाहिर गति र भित्र अन्तविश्वास’ बढाउन खुला सन्देश सिंगो पार्टी पंक्तिलाई प्राप्त भएको छ।’

कांग्रेसको विज्ञप्तीमा अव थप आक्रामक विपक्षी हुने संकेत छ। यसले कांग्रेस अव अर्को चुनावसम्म नेकपामाथि दवाव बनाईराख्न चाहन्छ भन्ने सन्देश दिएको छ।

र, दवावसहित कांग्रेसले नेकपलाई सचेत बनाएको छ, ‘व्यापक प्रभाव राख्ने केही सन्देशमूलक वडा, एक उपमहानगरपालिका नेतृत्व अनि एक प्रदेश क्षेत्रको परिणामले नेकपालाई ‘आजै सच्चिने की भोलि सक्कीने’ सन्देश दिएको छ। ‘सक्कीने’ शब्दलाई भोलिको परिणाम झनै प्रतिकूल आउने तर्फ गरिएको संकेत भनेर प्रष्ट्याई रहनु नपार्ला।’

प्रकाशित : मंसिर १७, २०७६ १५:१४
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×