पुम्सेमा ७ स्वर्ण

कान्तिपुर संवाददाता

काठमाडौँ — तेक्वान्दोको पुम्से विधामा नेपालले १३ मध्ये ७ स्वर्ण जितेको छ । तेक्वान्दो प्रतियोगिताको पहिलो दिन पुम्सेका कुनै पनि नेपाली खेलाडी पदकविहीन हुनुपरेन । नेपालले १ रजत र ५ कांस्य पनि जितेको छ । 

सातदोबाटोस्थित तेक्वान्दो एकेडेमीको हलमा पुम्सेतर्फ महिलाको स्पर्धामा नेपालले क्लिनस्विप गर्‍यो । महिला एकल र टिम पुम्सेको ५ स्पर्धामा सबै नेपाली खेलाडीले स्वर्ण जिते । एकलतर्फ १७–२३ वर्ष उमेर समूहमा सिना मादेन लिम्बूले स्वर्ण जितिन् । उनले १० पूर्णांकमा ८.१५० स्कोर गरिन् । ८.२५० स्कोर गरेकी भारतकी रूपा बायोरले रजत तथा श्रीलंकाकी इसुरीसुसारा र बंगलादेशकी अनिका अख्तरले कांस्य जिते ।

२३–२९ वर्ष उमेर समूहमा पार्वती गुरुङले ८.२५० स्कोरसहित स्वर्ण जितिन् । श्रीलंकाकी रान्पातिपुरा देवागे जयावीराले रजत जित्दा बंगलादेशकी नूरनाहर अख्तर र भारतकी हर्षा सिंघाले कांस्य जिते । २९ वर्षमाथि उमेरमा आयशा शाक्यले स्वर्ण जितिन् । उनले ७.९४० स्कोर गरिन् । भारतकी प्रजाक्ता प्रकाश एंकोलकरले ७.६४० अंकसहित रजत तथा श्रीलंकाकी गायथ्री सान्दामाली पारावहेरा मेहेन्ची अराचचिगे ७.५५० र पाकिस्तानकी मेहरू निशा ७.३६० अंकसहित कांस्य जित्न सफल भए ।

पार्वती र सिनाका लागि यो पहिलो ठूलो अन्तर्राष्ट्रिय पदक थियो । चितवनकी २४ वर्षीया पार्वतीले तेक्वान्दो खेल्न थालेको दशकभन्दा बढी भयो । राष्ट्रिय टोलीमा परेर अन्तर्राष्ट्रिय स्वर्ण जित्ने उनको कल्पना थियो । चौथो डान पार्वतीले भनिन्, ‘धेरै मिहिनेत गरेकी थिएँ, त्यसैले स्वर्ण जित्नेमा आशावादी थिएँ । प्रदर्शन पनि राम्रो भयो,’ उनले भनिन्, ‘राष्ट्रिय टोलीबाट खेलेर यहाँसम्म पुग्छु भन्ने सोचेको थिइनँ तर मैले तेक्वान्दो छाडेकी पनि थिइनँ । अब अरू ठूलो उपलब्धिका लागि प्रयास गर्नेछु ।’

टिम स्पर्धामा १७–२३ वर्ष उमेर समूहमा निशा दर्नाल, स्वस्तिका तामाङ र सन्जिला तिमल्सिनाले ७.९८० स्कोरसहित स्वर्ण जिते । यस स्पर्धामा भारतीय टोलीले रजत तथा बंगलादेश र श्रीलंकाको टोलीले कांस्य जिते । २३ वर्षमाथि स्पर्धामा निता गुरुङ, प्रशंसा क्षेत्री र सुशीला राईसम्मिलित नेपाली टोलीले ७.९२० स्कोरसहित स्वर्ण जितेको हो । ३ टोलीसम्मिलित यस स्पर्धामा श्रीलंकाले रजत र पाकिस्तानले कांस्य जिते ।

यसबाहेक पुरुष एकलतर्फ २३–२९ वर्ष उमेर समूहमा कमल श्रेष्ठले ८.२७० स्कोरसाथ स्वर्ण जिते । नेपाल पुलिस क्लबबाट व्यावसायिक तेक्वान्दो खेल्ने कमलले आठौं राष्ट्रिय खेलकुदमा ३ स्वर्ण जितेका थिए । यस स्पर्धामा भारतका राहुल जैनले रजत जिते । पाकिस्तानका मोहम्मद मुमताज र श्रीलंकाका निशानका जयले कांस्य जिते ।

‘स्वर्ण जित्छु भन्ने आशा त गरेको थिएँ, त्यहीअनुसार सोचेजस्तो प्रदर्शन पनि भयो,’ उनले भने, ‘एसियन गेम्समा राम्रो गर्न सकेको थिइनँ, अहिले यो उपलब्धिबाट खुसी छु । ७ वर्षअघि नेपाल पुलिसमा भर्ना भएपछि उनले तेक्वान्दो खेल्न सुरु गरेका थिए ।

एकल पुरुषमा १७–२१ वर्ष उमेर समूहअन्तर्गत नेपालका कृष्णबहादुर तामाङले रजत जिते । उनले ८.२०० स्कोर गरेका थिए । यस स्पर्धामा भारतका रानुका प्रभात मेनिकले ८.२५० स्कोरसहित स्वर्ण जिते । बंगलादेशका कमरुल इस्लाम र भारतका लाल्था मुआनपुइयाले कांस्य जिते । पुरुष एकलकै २९ वर्षमाथि उमेर समूहमा बंगलादेशका दिपुचाकमाले स्वर्ण तथा श्रीलंकाका लक्ष्मनी लान्दारिगेले रजत र नेपालका रेजिन रिमाल तथा भारतका गंगफुङ गांसाले कांस्य जिते ।

एकलतर्फ स्वर्ण जितेकी सिना अस्मिन राउतसँगको युगल स्पर्धामा भने कांस्यमा सीमित भइन् । यस स्पर्धामा श्रीलंकाले स्वर्ण र भारतले रजत जिते । नेपालसँगै बंगलादेशले पनि कांस्य जित्यो । युगलको २३–२९ वर्षमुनि उमेर समूहमा एकलतर्फको स्वर्ण विजेता पार्वनी र जितबहादुर बोट पनि कांस्यमै समेटिए । यस स्पर्धामा भारतले स्वर्ण जितेको छ । श्रीलंकाले रजत जितेको छ ।

पुरुष टिमतर्फ दुवै स्पर्धामा नेपालको प्रदर्शन कमजोर रह्यो । १७–२३ वर्षमुनि उमेर समूहमा शिशिर श्रेष्ठ, अस्मिन राउत र दीपेन्द्र गुरुङ तथा २३ वर्षमाथि उमेर समूहमा कमल श्रेष्ठ, जितबहादुर बोट र प्रेमबहादुर लिम्बूले कांस्य पदकमै चित्त बुझाए । १७–२३ वर्ष उमेर समूहमा भारतले स्वर्ण तथा श्रीलंकाले रजत जित्यो । २३ वर्षमाथि उमेर समूहमा श्रीलंकाले स्वर्ण तथा भारतले रजत जित्यो ।

राष्ट्रिय पुम्से टिमका प्रशिक्षक नोर्बु लामाले नतिजाबाट सन्तुष्ट रहेको प्रतिक्रिया दिए ।

प्रकाशित : मंसिर १७, २०७६ ०८:३८
प्रतिक्रिया
पठाउनुहोस्
ADVERTISEMENT

भुटानको आश्चर्यजनक अग्रता

हिमेश

काठमाडौँ — दशरथ रंगशालामा फेरि एकपल्ट सोमबार फुटबल औपचारिक रूपमा फर्केको छ । भूकम्पपछि त्यहाँ फुटबल हुन सकेको थिएन । यो संयोग भुटानका लागि पनि सुखद रह्यो । भुटानले दक्षिण एसियाली खेलकुद इतिहासमै पहिलोपल्ट बंगलादेशलाई हरायो । भुटानले पुरुष यू–२३ फुटबलमा सम्झनालायक जित निकाल्यो ।

भुटानको तर्फबाट भएको एकमात्र गोल चेन्चो ग्याल्चिनको नाममा रह्यो । ‘भुटानी रोनाल्डो’ को नामले चिनिने ग्याल्चिनले ६५ औं मिनेटमा निर्णायक गोल गरे । फुब थिन्लेको पास सदुपयोग गर्दै उनले नजिकको दूरीबाट गोल गरे । ग्याल्चिनसँग भारतको आईएसएलमा खेलेको अनुभव छ र अहिलेको टिम उनकै नेतृत्वमा छ ।

खेलपछि यी भुटानी फुटबलका अहिलेसम्मकै सबैभन्दा ठूला स्टारले भने, ‘आजको खेलमा हाम्रो उद्देश्य ३ अंक प्राप्त गर्नु थियो र हामी यसमा सफल रह्यौं ।’ यस्तै प्रशिक्षक पेमाले भने खेलको सुरुमा टिमलाई केही गाह्रो भएको स्वीकार्दै त्यसयता भने आफ्नो टिमले लय समातेको बताए ।

उनले भने, ‘आजको नतिजामा हामी स्वाभाविक रूपमा खुसी छौं ।’ पेमाले मंगलबार नेपालविरुद्ध हुने खेललक्षित गर्दै थपे, ‘नेपालविरुद्धको खेलमा सबै आफ्नै टिमको समर्थनमा हुनेछ । हामी आशा गर्छौं, हाम्रोप्रति पनि केही समर्थन हुनेछ ।’

यस्तै बंगलादेशका प्रशिक्षक जेम्स डेले आफ्नो टिम हारका लागि पूर्ण रूपमा हकदार भएको माने । उनले भने, ‘आज हाम्रा कोही पनि खेलाडीले खेल्न सकेनन् । सबैको प्रदर्शन बिर्सनलयाक रह्यो । आजको कमजोर प्रदर्शनबाट हाम्रा खेलाडी शिक्षा लिनुपर्छ । आजको दिन हाम्रा लागि वास्तवमै खराब रह्यो ।’ राष्ट्रिय र सबै खाले उमेर समूहको फुटबलमा भने यो भुटानको बंगलादेशमाथि दोस्रो जितमात्र हो । यसअघि सन् २०१५ मा भुटानले पहिलोपल्ट थिम्पुमा बंगलादेशलाई हराएको थियो ।

दोस्रो खेलमा भने माल्दिभ्स र श्रीलंकाले गोलरहित बराबरी खेले । श्रीलंका खेलको अन्तिम १० मिनेट १० खेलाडीमा सीमित रहेर माल्दिभ्सलाई बराबरीमा रोक्न सफल भएको हो । दोस्रो खेलको विश्लेषण गर्दै श्रीलंकाली प्रशिक्षक एमएम प्याकिरालीले आफ्ना लागि बराबरीको नजिजा सुखद रहेको बताए ।

माल्दिभ्सका प्रशिक्षक पिटर सेगर्टले आफ्नो टिमको प्रदर्शन कमजोर रहेको तथ्य स्वीकार्दै जितका लागि गोल गर्नुपर्ने र यसमा आफ्नो टिम सफल रहेको माने । उनले पहिलो खेलको उदाहरण गर्दै त्यसमा बंगलादेश पराजित रहनुले पूरा प्रतियोगितामा सबै टिम समान रूपमा उपाधिको दाबेदार रहेको बताए ।

प्रकाशित : मंसिर १७, २०७६ ०८:३६
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT
×