टिम इभेन्टमा दुई कांस्य

कान्तिपुर संवाददाता

पोखरा — श्रीलंकासँग सेमिफाइनलमा पराजित भएपछि १३ औं दक्षिण एसियाली खेलकुदमा ब्याडमिन्टनको टिम इभेन्टमा नेपालले कांस्य पदकमै खुम्चिएको छ । टिम इभेन्टको महिला र पुरुषमा दुवैमा नेपाल सोमबार श्रीलंकासँग पराजित भएको हो । 

ZenTravel

Meroghar

पोखरा रंगशालास्थित कभर्डहलमा पुरुषतर्फ श्रीलंकाले नेपाललाई ३–१ तथा महिलातर्फ ३–० ले हरायो । पुरुषमा नेपालका रत्नजित तामाङ श्रीलंकाका निशान पेर करुणारत्नेसँग २२–२०, २१–९ को सेटमा पराजित भए । दीपेश धामीले सचिन प्रेमासन अन्गोडा भिडानेजसँग २४–२२, १८–२१, १६–२१ को सेटमा हार्दा दीपेश र रत्नजितको जोडी थरिन्डु डी डुम्बुकोला र सचिन प्रेमासनसँग ११–२१, १५–२१ को सोझो सेटमा पराजित भएको थियो । नेपालका प्रिन्स दाहालले सान्त्वना जित निकाले । प्रिन्सले श्रीलंकाका रन्थुस्का ससिन्डु करुणाथिलाकेलाई २१–१८, १९–२१, २१–१९ को सेटमा हराए ।

पाकिस्तानलाई हराउँदै भारत फाइनलमा पुगेको छ । भारतले पाकिस्तानलाई सोझो सेटमा पराजित गर्दै श्रीलंकासँगको उपाधि भिडन्त पक्का गरेको हो ।

महिला खेलाडीले नेपाललाई खुसी दिलाउन सकेनन् । नङसलदेवी तामाङ श्रीलंकाकी थिलिनी प्रोमाडिकासँग २१–२, १६–२१ को सोझो सेटमा, अनुमाया राई डिल्मी प्रेम्सिकासँग २१–८, २१–८ तथा सीमा राजवंशी अचिनी निमलेसिकासँग २१–१८, २१–८ को सेटमा पराजित भएका थिए । श्रीलंकाले फाइनलमा भारतसँग खेल्नेछ । भारतले पाकिस्तानलाई ३–० ले हराएको थियो ।

भारतकी साइ उत्तेजिथा रावले पाकिस्तानकी महुर शाहजादालाई २१–१२ र २१–१८, गायत्री गोपीचन्दले पल्वासा बसिरले २१–१४ र २१–११ तथा स्रियंशी प्रदेशीले गजला सिद्धिकीलाई २१–१४ र २१–१२ को सेटमा पराजित गरे ।

प्रकाशित : मंसिर १७, २०७६ ०८:३०
ADVERTISEMENT
प्रतिक्रिया
पठाउनुहोस्
ADVERTISEMENT

नेपालको पहिलोपल्ट श्रीलंकाविरुद्ध जित

राजेन्द्र नाथ

काठमाडौँ — सन् १९९१ मा पाकिस्तानको इस्लामाबादमा भएको पाँचौं दक्षिण एसियाली खेलकुद प्रतियोगिता (साग) मा टेबलटेनिसबाट ऐतिहासिक स्वर्णपदक भित्र्याउँदा त्यस खेलकी प्रमुख सदस्य थिइन्, गीता क्षेत्री शाह । १३ औं संस्करणमा भने उनी दर्शकदीर्घामा भेटिइन् । जहाँ सोमबार पुरुष टिम इभेन्टमा नेपालले श्रीलंकाविरुद्ध सनसनीपूर्ण जित पाएको छ । 

घरेलु दर्शकको साथमा लैनचौरस्थित टेबलटेनिस हलमा श्रीलंकन खेलाडीमाथि हाबी भएका नेपाली खेलाडीले लिग चरणको पहिलो खेलमा सुखद सुरुवात गरे । शिवसुन्दर गोथे, स्यान्टु श्रेष्ठ र पुरुषोत्तम वज्राचार्यको जोडीले दाबेदार श्रीलंकन खेलाडीलाई पन्छाए ।

अब नेपालले सेमिफाइनल पुग्न मंगलबार माल्दिभ्ससँग खेल्नेछ । महिला टिम इभेन्टमा भने श्रीलंकाले नेपाललाई हरायो । अर्को समूहको बलियो मानिएको भारतले अनुमान गरिएझैं सबै खेलमा जित निकालेको छ ।

पुरुष टिम इभेन्टमा नेपालले पहिलो खेल गुमायो । शिवसुन्दर गोथे श्रीलंकन खेलाडीसँग ११–६, ११–८, १२–१० ले पराजित भए । त्यसपछि स्यान्टु श्रेष्ठ र पुरुषोत्तम वज्राचार्यले भने लय समाते । स्यान्टुले ११–९, ११–४, ११–२ अंकसाथ जित निकाले । पुरुषोत्तमलाई भने श्रीलंकनले कडा चुनौती दिए । उनले एक सेट गुमाए । तीन सेट समान १२–१० ले आफ्नो पक्षमा पारे ।

अन्तिम निर्णायक खेलमा स्यान्टुले पनि कडा मिहिनेत गर्नुपर्‍यो । पहिलो सेट ११–८ ले गुमाए पनि घरेलु दर्शकको हुटिङमाझ उनले दोस्रो सेटमा श्रीलंकन खेलाडीसँग ११–८ अंककै बदला लिए । श्रीलंका फेरि खेलमा फर्कियो र ११–८ कै नतिजा दोहोर्‍यायो । चौथो र पाँचौं सेटमा भने स्यान्टुले क्रमश: ११–९, ११–६ अंक जोड्दै नेपाललाई अर्को चरणमा प्रवेश गराए । स्यान्टु, पुरुषोत्तम र शिवसुन्दर अनुभवी खेलाडी हुन् ।

उनीहरूले अपेक्षाअनुरूप राम्रो खेलेर खुसी बाँडेको प्रशिक्षक मोहनदास बासुकलाले बताए । ‘अरू चरण बाँकी नै छन् । जति स्रोतसाधन लगानी गरिएको छ । त्यहीअनुरूप खेलाडीले राम्रो नतिजा दिनेमा ढुक्क छु,’
उनले भने । स्यान्टुले बिना दबाब खेलेको प्रतिक्रिया दिए । ‘अघिल्लो सेट जितेपछि मनोबल बढ्यो । तनाव नलिई खेलें,’ उनले भने । स्यान्टु साग छनोटको अघिल्लो दिन मोटरसाइकल दुर्घटनामा घाइते भएका थिए । ४० दिनको आरामपछि प्रशिक्षणमा फर्किएका थिए ।

मंगलबारै अर्को समूहको खेलमा भारतले पाकिस्तान र बंगलादेशलाई हरायो । दुवै खेलमा विजयी भएको भारत सेमिफाइनल पुगिसकेको छ । श्रीलंकाले यसअघि भएको पहिलो खेलमा माल्दिभ्सलाई पराजित गरेको थियो । महिला टिम इभेन्टमा पनि भारतले माल्दिभ्स र पाकिस्तानलाई निराश पार्‍यो । श्रीलंकाले बंगलादेशलाई हरायो । भारत महिलातर्फ पनि सेमिफाइनलमा पुगिसकेको छ । नेपाली टोली भने श्रीलंकासँग पराजित भयो । नेपालले मंगलबार बंगलादेशसँग खेल्ने तालिका छ ।

सन् १९८७ मा भारतको कोलकातामा भएको तेस्रो संस्करणमा पहिलोपल्ट टेबलटेनिस सहभागी भएको थियो । त्यसयता निरन्तर सहभागिता रहँदै आएको छ । टेबलटेनिस खेलमा हालसम्म नेपालले १९ पदक
ल्याएको छ । त्यसमा एक स्वर्ण, तीन रजत र १५ कांस्य पदक छन् । यसपटक सागमा टेबलटेनिसतर्फ विभिन्न ७ विधामा प्रतिस्पर्धा भइरहेको छ ।

प्रकाशित : मंसिर १७, २०७६ ०८:२९
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
×