तयारी सकियो, ग्रान्ड रिहर्सल आज- १३औं साग खेलकुद - कान्तिपुर समाचार
कान्तिपुर वेबसाईट
AdvertisementAdvertisement

तयारी सकियो, ग्रान्ड रिहर्सल आज

कुशल तिमल्सिना

काठमाडौँ — १३ औं दक्षिण एसियाली खेलकुद (साग) को तयारी अन्तिम चरणमा पुगेको छ । साग कार्यकारी समितिका संयोजक राष्ट्रिय खेलकुद परिषद (राखेप) सदस्य–सचिव रमेशकुमार सिलवालले खेल सञ्चालन र व्यवस्थापनको तयारी पूरा भएको जानकारी दिएका छन् । 

मंसिर १५ देखि २४ सम्म काठमाडौं, पोखरा र जनकपुर सहरमा हुने सागका खेल बुधबार नै सुरु भइसकेको छ । तर उद्घाटन र समापनसहित मुख्य खेलस्थल दशरथ रंगशाला, सातदोबाटोस्थित पौडी पोखरी र कीर्तिपुर कभर्डहलको काम सम्पन्न भइसकेका छैनन् । शुक्रबारसम्म सबै तयारी पूरा हुने बिहीबार आयोजित पत्रकार सम्मेलनमा सदस्य–सचिव सिलवालले जानकारी दिए ।


‘सबैको चासो प्रतियोगिता सुरु हुँदासम्म पनि पूर्वाधार तयार हुन्छन् त भन्ने थियो,’ सिलवालले भने, ‘अब धन्न तयार भयो भन्नुस्, दशरथ रंगशाला र पौडीपोखरीको काम भोलिसम्म सम्पन्न हुनेछ । पोखरीमा पानी हालेर १४ गतेदेखि नेपाली टोलीले प्रशिक्षण गर्नेछ ।’


सदस्यसचिवका अनुसार सबै खेल सामग्री सम्बन्धित खेलस्थलमा पुगिसकेको छ । पोखरा रंगशालाको निर्माण सम्पन्न भइरहेकोमा उनले खुसी व्यक्त गरे । ‘हाम्रो अर्को चिन्ता पोखरा रंगशालामा थियो । तर त्यहाँ हामीले १० हजार दर्शक क्षमताको प्यारापिट जोड्ने भनेका थियौं, तर १३ हजार कुर्ची जडान भइसकेको छ । हाम्रो महिला टोलीले हिजोदेखि प्रशिक्षण सुरु गरिसकेका छन्, त्यसैले मैदानको पनि प्रश्न रहेन ।’ सागका लागि सुरक्षा, खेलस्थल व्यवस्थापन, यातायातलगायत आवश्यक सबै प्रबन्ध गरिसकिएको जानकारी सदस्य–सचिवले दिएका छन् । उद्घाटन समारोहको ‘ग्रान्ड रिहर्सल’ शुक्रबार हुँदै छ ।


खेलस्थलमा विशेष सुरक्षा

१३ औं दक्षिण एसियाली खेलकुदका लागि तीन सहरमा १८ हजारभन्दा बढी सुरक्षाकर्मी परिचालन गरिनेछ । १३ औं साग सुरक्षा समितिका संयोजकसमेत रहेका प्रहरी महानिरीक्षक सर्वेन्द्र खनालले सुरक्षाको प्रत्याभूतिका लागि आवश्यक परेमा थप सुरक्षाकर्मीलाई तयारी अवस्थामा राखिने जनाए । ‘हामीले दुवै प्रहरी, नेपाली सेना तथा राष्ट्रिय अनुसन्धान विभागको समन्वयमा सुरक्षा योजना तयार पारेका छौं,’ पत्रकार सम्मेलनमा उनले भने, ‘खेल मैदानभित्र र मैदानबाहिर खेलाडी अफिसियल र भीआईपी/भीभीआईपीको सुरक्षा हाम्रो मुख्य चासो हुनेछ ।’


प्रहरीले सुरक्षा योजनालाई वर्गीकरण पनि गरिसकेको छ । भीभीआईपी सुरक्षा, खेलाडी तथा अफिसियलको सुरक्षा, विमानस्थल र होटल (निवास) सुरक्षा, सपिङ मल, मनोरञ्जन भ्रमणका क्रममा हुने सुरक्षा, समारोह तथा खेलस्थलको सुरक्षा, कारकेट तथा मोटरकेट स्कर्टिङ, सवारी मार्गको सुरक्षा र पार्किङ व्यवस्थापनलगायतका योजना बनिसकेको महानिरीक्षक खनालले बताए । सेलिब्रेटी छवि भएका खेलाडीको सुरक्षा तथा मैदानभित्र हुनसक्ने सुरक्षा खतराबारे सम्बन्धित खेलका अफिसियलसँगको समन्वयमा सुरक्षा योजना पनि तर्जुमा गरिएको छ ।


प्रतियोगिताका क्रममा हुने मुख्य चुनौती रूपमा रहेको पार्किङ व्यवस्थापनका र ट्राफिक व्यवस्थापनको योजना तर्जुमा भइसकेको छ । सागमा भारत र पाकिस्तानका खेलाडी, अफिसियल र भीआईपी पाहुनाको उपस्थिति हुने भएकाले त्यसबारे निम्तन सक्ने सुरक्षा चुनौतीबारे पनि सुरक्षा निकाय चनाखो रहेको आईजीपी खनालले जानकारी दिए । ‘ठूलो सुरक्षा चुनौती छैन । खेलाडी र अफिसियलका लागि हामीले आवश्यक सुरक्षा प्रबन्ध मिलाउने छौं,’ उनले भने ।


प्रहरी संगठनको प्रमुख नै खेलकुद प्रतियोगिताको सुरक्षा समिति प्रमुखको जिम्मेवारीमा रहनु कत्तिको सुरक्षा संवेदनशील हो भन्ने आरोपप्रति आईजीपीले खण्डन गरे । यसक्रममा हुनसक्ने दुर्घटनाको जिम्मेवारी आफैंले लिने उनको उद्घोष छ । ‘खेलस्थलको सुरक्षा तथा यसबारे जानकार भएको नाताले मलाई उचित लाग्यो । सन् १९९९ को साफमा पनि म रंगशालाको फिल्ड कमान्डर थिएँ,’ उनले थपे, ‘गृहमन्त्रीज्यू सागको उच्चस्तरीय निर्देशन समितिमा हुनुहुन्छ । उहाँमातहतको समितिमा बसेर मैले पदीय हिसाबमा कुनै कमजोरी गरेको छैन । समिति संयोजकको नाताले सागका क्रममा हुने सबै सुरक्षा चुनौती र योजनाको जिम्मेवार म नै हुन्छु ।’


मंसिर १५ आइतबार उद्घाटन र मंसिर २४ मंगलबार समापनको दिन चक्रपथभित्र जोर–बिजोर प्रणालीमा यातायात चलाइने आईजीपी खनालले जानकारी दिए । प्रहरीले दशरथ रंगशालामा यातायातको चाप कम गर्न सागभर एकतर्फी यातायात चलाउने योजना बनाइरहेको छ । यो चाहिँ आवश्यक पर्दाको समयमा मात्र लागू हुनेछ । रंगशालामा नेपालको खेल भएका दिन यो योजना लागू हुनसक्छ । जसमा सहिदगेटबाट त्रिपुरेश्वर हुँदै जाने सवारी एकतर्फी हुनेछ । टेकुबाट त्रिपुरेश्वर हुँदै सुन्धारा जान पाइने छैन । सुन्धारा जाने सवारीले थापाथली हुँदै भद्रकालीको बाटो प्रयोग गर्नुपर्नेछ । साग अवधिभर त्रिपुरेश्वरेको राष्ट्रिय खेलकुद परिषद र दशरथ रंगशालामा आउनेका लागि टुँडिखेलमा पार्किङको व्यवस्था गरिएको आईजीपी खनालले जानकारी दिए । काठमाडौं मलअगाडिको गेटमार्फत टुँडिखेलमा पार्किङ गर्नुपर्नेछ ।


चार खेल हेर्न टिकट

सागमा समावेश काठमाडौंमा हुने ४ खेलको प्रतिस्पर्धा हेर्न दर्शकले टिकट लिनुपर्ने भएको छ । दशरथ रंगशालामा हुने पुरुष फुटबल, त्रिपुरेश्वरस्थ्ति कभर्डहलमा हुने भलिबल (महिला र पुरुष) र बास्केटबल तथा त्रिवि क्रिकेट मैदानमा हुने पुरुष क्रिकेटका खेलका लागि टिकट लिनुपर्ने हुन्छ ।


राखेपले त्यसका लागि ई–सेवासँग सहकार्य गरेको छ । त्रिवि मैदानमा भने ईसेवा र नेपालयबीच सहकार्य छ । पुरुष फुटबलका समूह चरणका खेलमा साधारण प्यारापिटतर्फ ५ सय र भीआईपी प्यारापिटतर्फ १ हजार टिकट शुल्क निर्धारण गरिएको छ । सेमिफाइनल र फाइनलका लागि साधारणतर्फ १ हजार र भीआईपीतर्फ २ हजार शुल्क हुनेछ । भलिबल र बास्केटबलका लागि ५ सय टिकट शुल्क निर्धारण गरिएको छ । त्रिवि क्रिकेट मैदानमा नेपालको खेल हुँदा ५ सय र अन्य खेलका २ सय रुफैयाँ टिकट शुल्क निर्धारण गरिएको छ । १५ हजार ९ सय दर्शक क्षमता रहेको दशरथ रंगशालामा १४ हजार टिकट विबी गरिने सदस्यसचिव सिलवालले बताए । टिकट शुल्कबाट संकलित रकमको १५ प्रतिशत ईसेवाले कमिसन पाउनेछ । कमिसनमध्ये आधा उसैले राख्नेछ भने आधा खेलकुदको पूर्वाधार विकासमा भएका कामका लागि अनुदान प्रदान गर्ने सहमति भएको छ ।


भूकम्पले क्षति पुर्‍याएको दशरथ रंगशाला पुनर्निर्माणपछि पहिलोपल्ट ठूलो प्रतियोगिताको आयोजना हुँदै छ । यसपल्ट रंगशालामा पहिलोपल्ट कुर्ची जडान गरिएको छ भने कुर्चीमा नम्बर उल्लेख गरिएको छ । ईसेवाका सीईओ रोशन लामिछानेका अनुसार टिकटमै कुर्सीको नम्बर उल्लेख गरिएको हुनेछ । उनले टिकटमा उल्लेख भएकै सिट नम्बरमा बसिदिन पनि सबैमा अनुरोध गरेका छन् । रंगशालामा फुटबल हेर्न जाँदा टिकटसँगै फोटोसहितको परिचयपत्र पनि बोक्नुपर्नेछ । टिकटमा नाम उल्लेखित व्यक्तिले मात्र रंगशाला प्रवेश पाउने उनले बताए । ‘टिकटमा कालोबजारी र नक्कली दर्शकलाई निरुत्साहित गर्न हामीले त्यसो गरेका हौं,’ पत्रकार सम्मेलनमा उनले भने ।

प्रकाशित : मंसिर १३, २०७६ ०८:१९
प्रतिक्रिया
पठाउनुहोस्

महिला भलिबल : भारतसँग गुमेको लय

कान्तिपुर संवाददाता

काठमाडौँ — १३ औं दक्षिण एसियाली खेलकुदको महिला भलिबलमा नेपाल अघिल्लो दिनको लय कायम गर्न सकेन । बिहीबार त्रिपुरेश्वरस्थित राखेप कभर्डहलमा नेपाली टिम भारतसँग सोझो सेटमा हार बेहोरेको छ । यो लगातार सातौं अन्तर्राष्ट्रिय खेलपछि नेपालको पहिलो हार हो । बुधबार नेपालले बंगलादेशमाथि सजिलो जित पाएको थियो । 


समूहको अन्तिम खेलमा भारतले बंगलादेशलाई हराएमा नेपाल समूह उपविजेता बन्दै सेमिफाइनल पुग्नेछ ।

दक्षिण एसियामै बलियो तथा साबिक विजेता भारतसँग नेपाली टोलीले पहिलो सेटमा उत्कृष्ट प्रदर्शन गरेको हो । तर निर्णायक मोडमा चुक्दा नेपालले सेट २४–२६ ले गुमायो । २२–२४ को अग्रतामा रहँदा नेपालले लगातार रिसिभमा कमजोरी गर्दा सेट गुमाउनुपरेको हो । भारतकी कप्तान निम्मीले सर्भिसबाट लगातार ३ अंक जोडेर सेट जोगाइन् । जित्दाजित्दै पहिलो सेट हारेपछि लड्खडाएको नेपालविरुद्ध बाँकी दुई सेटमा जित निकाल्न भारतलाई सजिलो भयो । उसले क्रमश: १२–२५ र १६–२५ ले खेल आफ्नो पक्षमा पार्‍यो । नेपालका प्रशिक्षक जगदीश भट्टले पहिलो सेट जित्न सकेको भए नतिजा अर्कै हुने दाबी गरे । ‘बंगलादेशलाई हराएपछि हामी लगभग सेमिफाइनलमा पुगिसकेका थियौं, त्यसैले बिनादबाब खेल्ने रणनीति थियो । पहिलो सेटमा पराजित भएपछि खेलाडीको मनोबल पनि आधा खस्कियो,’ उनले भने, ‘दोस्रो र तेस्रो सेटमा हामीले रिसिभ र स्पाइकमा अपेक्षाअनुसार प्रदर्शन गर्न सकेनौं । भारतसँग लामो समयपछि खेलेका थियौं, यसबीचमा उसको खेल हेर्न पनि पाएका थिएनौं ।’

पहिलो सेटमा २३–२४ को अग्रता हुँदा प्रशिक्षक भट्टले अपोजिक स्पाइकर रेश्मा भण्डारीलाई प्रतिस्थापन गरी ओपन स्पाइकर निरूता ठगुन्नालाई कोर्टमा पठाए । भारतीय कप्तान निम्मीको सर्भिसमा उनै निरूताले रिसिभ गर्न नसक्दा भारतले स्कोर बराबरीमा ल्यायो । प्रशिक्षक भट्टको भनाइ मान्ने हो भने उनले रिसिभमा सुधारकै लागि निरूतालाई पठाएका थिए तर भाग्यले साथ दिएन ।

‘जम्प सर्भिस आउँछ भनेर मैले चार जना रिसिभर राख्न खोजेको हो । निरूता राम्रो रिसिभ गर्नसक्ने खेलाडी पनि हो, दुर्भाग्य रिसिभमै लगातार ३ अंक गुम्दा सेट गुमाउनुपर्‍यो,’ उनले थपे ।

कप्तान अरुणा शाहीले भारतसँग अग्रता लिएपछि खेलाडी अनावश्यक दबाबमा परेको बताइन् । ‘हामीले भारतसँग हारे पनि सेमिफाइनल खेल्ने पक्काजस्तै थियो । हामी दबाबमा थिएनौं तर पहिलो सेटमा अग्रता लिएपछि खेलाडीहरू जसरी पनि जित्नुपर्छ भन्ने ध्यानमा उच्च दबाबमा देखिए,’ उनले भनिन् ।

कात्तिक अन्तिम साता नेपालले बंगलादेशमा एभीसी सेन्ट्रल जोन सिनियर वुमन्स भलिबलमा लगातार ५ खेलमा शतप्रतिशत जित निकाल्दै स्वर्ण जितेको थियो । उच्च मनोबलमा रहेको नेपाली टिमका लागि यो हार ६ खेलको जितयात्रामा पूर्णविराम मात्र लागेको छैन, सागमा पहिलोपल्ट फाइनल पुग्ने योजनामा पनि धक्का लागेको छ । नेपालले सन् २०१७ जनवरीमा विश्व च्याम्पियनसिपको सेन्ट्रल जोन छनोटमा इरानसँग २५–१२, २५–१२, २५–१२ को सेटमा हार बेहोरेको थियो । त्यसयता ६ खेलमा टोली अपराजित थियो ।

सेमिफाइनलमा सम्भवत: नेपालले श्रीलंकासँग खेल्नेछ । ठूला प्रतियोगितामा नेपालले श्रीलंकालाई पनि अहिलेसम्म हराउन सकेको छैन । प्रशिक्षक भट्टले सेमिफाइनलमा श्रीलंकालाई हराएर फाइनलमा पुन: भारतसँग खेल्न चाहेको सुनाए ।

प्रकाशित : मंसिर १३, २०७६ ०८:१६
पूरा पढ्नुहोस्
प्रतिक्रिया
पठाउनुहोस्
×