काठमाडौ, फाल्गुन १६ - 'भलाद्मी पुरुष पनि महिला सिटमै बस्छन्' टिचिङबाट कोटेश्वर जाँदै गरेकी कञ्चन पाण्डेले सोमबार नेपाल यातायातमा अनुगमन गर्न आएका समूहलाई आफ्ना भोगाइ बताइन् ।  

नेपाल यातायातमा आरक्षण सिट कार्यान्वयनबारे पुतलीसडकमा अनुगमनमा आएकालाई कञ्चन जस्तै थुप्रै महिलाले आफ्नो अनुभव सुनाए । नेपाल यातायात मिनि बस सेवा समिति, पत्रकार महासंघ, नागरिक न्यायिक उपभोक्ता मञ्च लगायत संघ-संस्थाले अनुगमन थालेका हुन् । महिला, अपांग, अशक्त र वृद्ध यात्रुलाई सहज बनाउन सरकारले आरक्षण सिट व्यवस्था गरे पनि त्यसको प्रभावकारी कार्यान्वयन नभएको समितिका सचिव गोपाल चन्द्र गुरुङले बताए । 'सचेतनाकै कमीले आरक्षण सदुपयोग हुन नसकेको हो,' उनले भने । महिला सिटलाई 'पहिला' भनेर बिगारिएका यातायातलाई तत्काल सच्याउन समेत भनिएको उनले बताए ।

उपभोक्ता मञ्चका महासचिव प्रकाश सुवेदीले महिलालाई आफ्नो सिटको सुरक्षा आफैं गर्न सल्लाह दिए । 'महिलाले पनि आफ्नो सिटमा बस्छु भन्ने आँट गर्नुपर्छ नि,' उनले बस रोकाउँदै यात्रुलाई भन्दै थिए, 'यो तपाईंको अधिकार हो चुप लागेर बस्नु हुँदैन ।'

पुतलीसडकबाट तीनकुने जान नेपाल यातायात चढेकी रञ्जु अर्यालले महिलाभन्दा पुरुष अझ सचेत हुन जरुरी रहेको सुनाइन् । महिला सिटबारे सम्झाउँदा सबै समान भन्ने अनि आरक्षण पनि भन्दै उल्टै प्रश्न गरेका घटना उनले सुनाइन् । 'त्यस्तासँग के बोल्नु ?' उनले भनिन् ।

सिटमा बस्न आग्रह गर्दा कतिपय महिलाले असक्षम भनेर नहेप्न भनेको दाबी एक युवाले गरे । 'मैले दुईपटक सिटमा बस्नु भनेरै गाली खाएको छु,' पुष्कर कँडेलले भने । नेपाल यातायातका सहायक श्याम श्रेष्ठले चाहिँ आरक्षण सिटबारे जनचेतना फैलाउनुपर्ने बताए । उनले महिला मात्रै होइन, अपांगता र वृद्ध यात्रुलाई सिटमा बसाउन अरू यात्रुसँग धेरै अनुरोध गर्नुपरेको अनुभव सुनाए । 'खास सचेत नागरिकलाई अनुरोध गर्नुपर्ने थिएन,' उनले भने, 'कसैले बस्न दिन्छ भने कोहीचाहिँ चुप लागेर बस्छन् ।'

आरक्षण सिटबारे हरेक यातायात समितिले सदुपयोग भए/ नभएकोबारे बेलाबेलामा अनुगमन गनुपर्ने पत्रकार महासंघका उपाध्यक्ष टीबी विरहीले बताए । उनले यातायात समिति, ट्राफिक र नागरिक सबैको संयुक्त चासो भए समस्यामा न्यूनीकरण हुने दाबी गरे । 'ट्राफिकले आरक्षणको महत्त्व बुझाउन आवश्यक छ मात्रै, बाटो काट्ने होइन,' उनले भने, 'महिलाले पनि यसको विरुद्ध तत्कालै बोल्नुपर्छ ।'

 

प्रकाशित मिति: २०६९ फाल्गुन १६ १२:१०